ទីក្រុងបាងកកៈ នាយកដ្ឋានចរចាពាណិជ្ជកម្ម (DTN) របស់ប្រទេសថៃបានឲ្យដឹងកាលពីថ្ងៃចន្ទថា ប្រទេសនឹងវាយតម្លៃឡើងវិញនូវគុណសម្បត្តិ និងកត្តាវិបត្តិនៃកិច្ចព្រមព្រៀងពាណិជ្ជកម្មសេរីនៃភាពជាដៃគូអន្តរប៉ាស៊ីហ្វិកគ្រប់ជ្រុងជ្រោយ និងជឿនលឿន (CPTPP) បន្ទាប់ពីប្រទេសចិនបានចុះហត្ថលេខាលើកតិកាសញ្ញាកាលពីសប្តាហ៍កន្លងទៅ។
លោកស្រី Auramon Supthaweethum អគ្គនាយកនៃនាយកដ្ឋានចរចាបាននិយាយថា ទំហំទីផ្សារ CPTPP នាពេលនេះកាន់តែធំជាងទីផ្សារដែលមានប្រទេស ១១ ចុះហត្ថលេខី ដែលរួមមានប្រទេសជប៉ុន អាស្ត្រាលី នូវែលសេឡង់ កាណាដា ម៉ិចស៊ិក ប៉េរូ ឈីលី សិង្ហបុរី ប្រ៊ុណេ ម៉ាឡេស៊ី និង វៀតណាម។
លោកស្រីបាននិយាយថា៖ «ជាមួយការចូលជាសមាជិករបស់ប្រទេសចិន ប្រជាជនក្នុងតំបន់ CPTPP នឹងពង្រីកទៅដល់ ១,៩ ពាន់លាននាក់ ឬក៏ ស្មើនឹង ២៥ ភាគរយនៃប្រជាជនសកលលោក ដែលមានផលិតផលក្នុងស្រុកស្រុកសរុប [GDP] ប្រហែល ២៥,៣ ពាន់ពាន់លានដុល្លារ ឬក៏ ៣០ ភាគរយនៃ GDP ពិភពលោក»។
ទោះបីជាបែបណាលោកស្រីបានបន្ថែមថា CPTPP នៅមានទំហំតូចជាង កិច្ចព្រមព្រៀងភាពជាដៃគូសេដ្ឋកិច្ចគ្រប់ជ្រុងជ្រោយតំបន់ (RCEP) ដែលមានប្រទេស ១៥ ជាសមាជិក ដូចជា ឥណ្ឌូនេស៊ី ម៉ាឡេស៊ី ហ្វីលីពីន សិង្ហបុរី ថៃឡង់ដ៍ ប្រ៊ុយណេ វៀតណាម ឡាវ មីយ៉ាន់ម៉ា កម្ពុជា ចិន ជប៉ុន កូរ៉េខាងត្បូង អូស្ត្រាលី និង នូវែលសេឡង់។
RCEP ជាកិច្ចព្រមព្រៀងពាណិជ្ជកម្មសេរីធំបំផុតនៅក្នុងពិភពលោក ដែលគ្របដណ្តប់ប្រជាជន ២,៣ ពាន់លាននាក់ ឬស្មើនឹង ៣០ ភាគរយនៃប្រជាជនសរុប ដោយមានផលិតផលក្នុងស្រុកសរុប (GDP) ២៨,៥ ពាន់ពាន់លានដុល្លារ ឬស្មើនឹង ៣៣,៦ ភាគរយនៃ GDP សកលលោក។
លោកស្រីនិយាយថា៖ «ការសម្រេចចិត្តរបស់ចិនដើម្បីចូលរួមកិច្ចព្រមព្រៀង CPTPP នឹងជួយពង្រីកពាណិជ្ជកម្ម និងឱកាសវិនិយោគក្នុងចំណោមប្រទេសជាសមាជិក ជាពិសេសការចូលរួមក្នុងច្រវ៉ាក់ផ្គត់ផ្គង់តំបន់ ដោយសារចិនជាធនធានវត្ថុធាតុដើមសំខាន់ និងជាមូលដ្ឋានផលិតកម្មក្នុងតំបន់»។
លោកស្រីបន្ថែមថា៖ «ទន្ទឹមនឹងនោះដែរ វាបានបង្ហាញថា ចិនរួចរាល់ដើម្បីធ្វើឲ្យប្រសើរឡើងនូវស្តង់ដារ និងច្បាប់ដើម្បីឲ្យស៊ីគ្នាជាមួយប្រទេសជាសមាជិក ដូចជា ការការពារកម្មសិទ្ធបញ្ញា សិទ្ធិមនុស្ស ពាណិជ្ជកម្មអេឡិចត្រូនិក និង ប្រតិបត្តិការរបស់សហគ្រាសរដ្ឋ»៕ The Nation (Thailand)-ANN/RR