The Phnom Penh Post Search

Search form

Logo of Phnom Penh Post newspaper Phnom Penh Post - ព្រឹទ្ធសភា​អនុម័ត​សេចក្តី​ព្រាងច្បាប់ RCEP និង​កិច្ចព្រមព្រៀង​ (FTA) ​កម្ពុជា-ចិន




ព្រឹទ្ធសភា​អនុម័ត​សេចក្តី​ព្រាងច្បាប់ RCEP និង​កិច្ចព្រមព្រៀង​ (FTA) ​កម្ពុជា-ចិន

Content image - Phnom Penh Post
អង្គប្រជុំ​ព្រឹទ្ធសភា កាលពីថ្ងៃទី​ ២០ ខែ កញ្ញា ឆ្នាំ​ ២០២១​។ រូបថត ព្រឹទ្ធសភា

ព្រឹទ្ធសភា​អនុម័ត​សេចក្តី​ព្រាងច្បាប់ RCEP និង​កិច្ចព្រមព្រៀង​ (FTA) ​កម្ពុជា-ចិន

ភ្នំពេញៈ ព្រឹទ្ធសភាបាន​អនុម័ត​ទាំងស្រុង​លើ​សេចក្តី​ព្រាង​ច្បាប់​ស្តីពី​កិច្ចព្រមព្រៀង​ភាពជា​ដៃគូ​សេដ្ឋកិច្ច​គ្រប់​ជ្រុងជ្រោយ​តំបន់​ (RCEP) និង​កិច្ចព្រមព្រៀង​ពាណិជ្ជកម្ម​សេរី​ទ្វេភាគី​កម្ពុជា-ចិន​ (FTA) ដោយ​រំពឹង​នឹង​ជំរុញ​ការនាំចេញ និង​វិនិយោគ​មក​កម្ពុជា​កាន់តែ​ច្រើន​។ នេះ​បើតាម​សេចក្តី​ប្រកាស​ព័ត៌មាន​របស់​ព្រឹទ្ធសភា​។

សេចក្តី​ប្រកាស​ព័ត៌មាន​បានឱ្យដឹងថា អង្គប្រជុំ​ព្រឹទ្ធសភា​ទាំង ៣៨ ​សំឡេង​បាន​ពិនិត្យ និង​ផ្តល់យោបល់​ឯកភាព​ទាំងស្រុង​លើ​កិច្ចព្រមព្រៀង​ទាំង​ ២ ដោយ​ឥត​កែប្រែ​ក្នុង​កិច្ចប្រជុំ​នា​ថ្ងៃទី​ ២០ ខែកញ្ញា ឆ្នាំ​ ២០២១​។

លោក ប៉ាន សូរស័ក្តិ រដ្ឋមន្ត្រីក្រសួង​ពាណិជ្ជកម្ម ដែល​បាន​ទៅ​ការពារ​សេចក្តីព្រាងច្បាប់​នេះ បាន​លើកឡើងថា RCEP គឺជា​កិច្ចព្រមព្រៀង​ដែលមាន​លក្ខណៈ​ទំនើប ទូលំទូលាយ គុណភាព​ខ្ពស់ និង​ផ្តល់​ផលប្រយោជន៍​សេដ្ឋកិច្ច​ឱ្យ​គ្នា​ទៅវិញ​ទៅមក ដោយ​វា​នឹង​សម្រួល​ដល់​ការពង្រីក​ខ្សែចង្វាក់​ផ្គត់ផ្គង់​ពាណិជ្ជកម្ម និង​ការវិនិយោគ​ក្នុង​តំបន់​។ RCEP ជា​កិច្ចព្រមព្រៀង​ពាណិជ្ជកម្ម​សេរី​ធំ​មួយ​ក្នុង​តំបន់ ដែល​មាន​ការចូលរួម​ពី​ប្រទេស​ជា​សមាជិក​អាស៊ាន​ទាំង​ ១០ ព្រមទាំង​ប្រទេស​ដៃគូ​ពាណិជ្ជកម្ម​សំខាន់ៗ​ចំនួន ៥ រួមមាន ចិន ជប៉ុន កូរ៉េខាងត្បូង នូវែលសេឡង់ និង​អូស្ត្រាលី​។

លោក​បន្តថា ផ្អែក​តាម​លទ្ធផល​នៃ​ការចរចា និង​ការសិក្សា​របស់​វិទ្យាស្ថាន​ស្រាវជ្រាវ​សេដ្ឋកិច្ច​សម្រាប់​អាស៊ាន និង​អាស៊ីបូព៌ា​ (ERIA) បង្ហាញថា តាមរយៈ RCEP កម្ពុជា​អាច​នឹងមាន​កំណើន​ប្រចាំឆ្នាំ​នៃ​ការនាំចេញ​ចំនួន ៧,៣ ​ភាគរយ និង​វិនិយោគ ២៣,៤ ​ភាគរយ ហើយ​ផលិតផល​ក្នុងស្រុក​សរុប​ប្រមាណ ២ ​ភាគរយ​លើ​ផលិតផល​ក្នុងស្រុក​សរុប​ដែលមាន​នាពេល​បច្ចុប្បន្ន​។

លោក​ថ្លែងថា​៖ «​កិច្ចព្រមព្រៀង​នេះ​នឹង​ផ្តល់​សញ្ញា​ទៅកាន់​ពិភពលោក​អំពី​ការគាំទ្រ​ប្រព័ន្ធ​ពាណិជ្ជកម្ម​សេរី​ពហុភាគី​ដែល​ផ្អែកលើ​គោលការណ៍​ច្បាប់ ជាពិសេស​ការចូលរួម​ចំណែក​ក្នុង​ការស្តារ​សេដ្ឋកិច្ចកម្ពុជា និង​តំបន់​ឡើងវិញ​បាន​ឆាប់រហ័ស​ពី​វិបត្តិ​កូវីដ​ ១៩»​។

RCEP ជា​កិច្ចព្រមព្រៀង​ពាណិជ្ជកម្ម​ធំ​នៅក្នុង​ពិភពលោក​ដោយមាន​ប្រជាជន​ប្រមាណ ២ ២០០ ​លាន​នាក់ ឬ ៣០ ​ភាគរយ​នៃ​ប្រជាជន​ពិភពលោក​។ ផលិតផល​ក្នុង​ស្រុក​សរុប​មាន​ប្រមាណ ២៦,២ ​ទ្រីលាន​ដុល្លារ ឬ ៣០ ​ភាគរយ​នៃ​ផលិតផល​ក្នុងស្រុក​សរុប​របស់​ពិភពលោក និង​មាន​ទំហំ​ពាណិជ្ជកម្ម ២៨ ភាគរយ​នៃ​ទំហំ​ពាណិជ្ជកម្ម​ពិភពលោក​។ នេះ​បើតាម​សេចក្តីប្រកាស​របស់​ព្រឹទ្ធសភា​។

សេចក្តី​ប្រកាស​បន្តថា​៖ «​កិច្ចព្រមព្រៀង RCEP មាន​គោលបំណង​បង្កើត​បរិយាកាស​ពាណិជ្ជកម្ម និង​វិនិយោគ​បើកចំហ ដើម្បី​សម្រួល​ដល់​ការពង្រីក​ពាណិជ្ជកម្ម និង​វិនិយោគ​ក្នុង​តំបន់ និង​រួមចំណែក​សម្រាប់​កំណើន​សេដ្ឋកិច្ច និង​ការអភិវឌ្ឍ​សកលលោក​។ កិច្ចព្រមព្រៀង​នេះ​មាន​សារៈសំខាន់​ក្នុង​ការផ្តល់​ឱកាស​ដល់​ប្រទេស​ក្នុង​តំបន់ ដើម្បី​ការពារ​ការធ្វើ​សេរីភាវូបនីយកម្ម​ពាណិជ្ជកម្ម និង​លើកកម្ពស់​កិច្ចសហប្រតិបត្តិការ​សេដ្ឋកិច្ច និង​ការស្តារ​សេដ្ឋកិច្ច​ពី​វិបត្តិ​កូវីដ​ ១៩»​។

ជាមួយ​គ្នា​នេះ​ព្រឹទ្ធសភា​ក៏បាន​អនុម័ត​ផងដែរ លើ​សេចក្តី​ព្រាង​លើ​កិច្ចព្រមព្រៀង​ពាណិជ្ជកម្ម​សេរី​ទ្វេភាគី​កម្ពុជា-ចិន​។

ទាក់ទង​នឹង​កិច្ចព្រមព្រៀង​ពាណិជ្ជកម្ម​សេរី​ទ្វេភាគី​កម្ពុជា-ចិន លោក សូរស័ក្តិ ឱ្យដឹងថា តាមរយៈ​កិច្ចព្រមព្រៀង​មួយ​នេះ កម្ពុជា​នឹង​ទទួល​បាន​ការបើក​ទីផ្សារ​ឱ្យបាន​ធំ និង​ប្រសើរ​ជាង​មុន​សម្រាប់​មុខទំនិញ​កសិផល បន្លែ​ផ្លែឈើ ផលិតផល​កែច្នៃ និង​សិប្បកម្ម និង​ផលិតផល​ជាច្រើន​ទៀត ស្រប​ពេលដែល​កម្ពុជា​អាច​ផលិត​បាន និង​អនុលោម​តាម​វិធាន​អនាម័យ និង​ស្តង់ដា​។

កិច្ចព្រមព្រៀង​នេះ​ក៏​នឹង​ផ្តល់​កាលានុវត្តភាព​ផ្នែក​វិនិយោគ​ដល់​កម្ពុជា​កាន់តែច្រើន ដែល​រួម​មានការ​ផ្តល់ឱកាស​ឱ្យដល់​ធុរជន​កម្ពុជា ដែលមាន​បំណង​ពង្រីក​ទីផ្សារ និង​ទំនិញ​នាំចេញ​ឱ្យ​កាន់តែ​សម្បូរបែប​ទៅកាន់​ទីផ្សារ​ចិន ព្រមទាំង​ទទួលបាន​ផលប្រយោជន៍​ពី​ការផ្ទេរ​បច្ចេកវិទ្យា ចំណេះដឹង ចំណេះធ្វើ និង​ជំនាញ​ថ្មីៗ​ពី​ការវិនិយោគ​ផ្ទាល់​របស់​បរទេស ព្រមទាំង​បង្កើត​ការងារ​ជូន​ប្រជាជន​៕ LA

អត្ថបទគួរចាប់អារម្មណ៍