.jpg)
លោក ម៉ុង ឫទ្ធី ប្រធានគណៈកម្មការទី៣ នៃព្រឹទ្ធសភា ថ្លែងក្នុងកិច្ចប្រជុំកាលពីថ្ងៃទី ២០ កញ្ញា។ រូបថត ព្រឺទ្ធសភា
ភ្នំពេញៈ ប្រធានគណៈកម្មការទី៣ នៃព្រឹទ្ធសភា និងជាមហាសេដ្ឋីកសិកម្ម លោក ម៉ុង ឫទ្ធី បានឱ្យដឹងថា សេចក្តីព្រាងច្បាប់ស្តីពីវិនិយោគនៃព្រះរាជាណាចក្រកម្ពុជាថ្មីនឹងកាន់តែមានភាពទាក់ទាញ និងឆ្លើយតបនឹងបរិបទនៃការវិនិយោគទាំងក្នុងតំបន់ និងពិភពលោក។
ការលើកឡើងបែបនេះរបស់លោកត្រូវបានធ្វើឡើងអំឡុងពេលកិច្ចប្រជុំក្រុមការងារនៃគណៈកម្មការទី៣ នៃព្រឹទ្ធសភា កាលពីថ្ងៃទី ១៦ ខែកញ្ញា។ គណៈកម្មការទី៣ បានអនុម័តយល់ព្រមចំនួន ៥ សំឡេងនៃចំនួនសមាជិកគណៈកម្មការទាំងមូលដោយឥតកែប្រែដើម្បីដាក់ជូនអង្គប្រជុំព្រឹទ្ធសភាពិនិត្យ និងអនុម័ត។
សេចក្តីព្រាងច្បាប់ស្តីពី «វិនិយោគនៃព្រះរាជាណាចក្រកម្ពុជា» ដែលនឹងមានតួនាទីយ៉ាងសំខាន់ក្នុងការទាក់ទាញវិនិយោគិន ទាំងក្នុង និងក្រៅប្រទេសមកវិនិយោគនៅកម្ពុជាត្រូវបានរដ្ឋសភាអនុម័តទាំងស្រុងក្នុងកិច្ចប្រជុំពេញអង្គ កាលពីថ្ងៃទី ៩ ខែ កញ្ញា ឆ្នាំ ២០២១ កន្លងមក។
លោក ម៉ុង ឫទ្ធី លើកឡើងថា សេចក្តីព្រាងច្បាប់នេះតាក់តែងឡើងមានគោលបំណងបង្កើតនូវក្របខ័ណ្ឌគតិយុត្តដែលបើកចំហមានតម្លាភាព អាចប៉ាន់ប្រមាណទុកជាមុនបានប្រកបដោយភាពអំណោយផលដល់ការវិនិយោគដើម្បីទាក់ទាញ និងលើកកម្ពស់ការវិនិយោគ ដោយបុគ្គលសញ្ជាតិខ្មែរ ឬបរទេសប្រកបដោយគុណភាព ប្រសិទ្ធភាព និងប្រសិទ្ធផលសំដៅអភិវឌ្ឍសង្គមសេដ្ឋកិច្ចនៅក្នុងប្រទេសកម្ពុជា។
លោកថ្លែងថា៖ «សេចក្តីព្រាងច្បាប់នេះបានគិតគូរពីការផ្តល់ការលើកទឹកចិត្តទៅដល់វិស័យ អាទិភាព កម្រិតបច្ចេកវិទ្យា និងបច្ចេកទេស ការបង្កើតការងារ ការបណ្តុះបណ្តាលជំនាញ ការសិក្សាស្រាវជ្រាវ ការអភិវឌ្ឍ និងនវានុវត្តន៍ និងសហគ្រាសធុនតូច និងមធ្យម»។
រាជរដ្ឋាភិបាលកម្ពុជាបានអនុម័តជាផ្លូវការលើសេចក្តីព្រាងច្បាប់ស្តីពី «វិនិយោគនៃព្រះរាជាណាចក្រកម្ពុជា» នៅក្នុងកិច្ចប្រជុំពេញអង្គគណៈរដ្ឋមន្ត្រី តាមរយៈប្រព័ន្ធអនឡាញកាលពីថ្ងៃទី ៩ ខែកក្កដា ឆ្នាំនេះដែលដឹកនាំដោយលោកនាយករដ្ឋមន្ត្រី ហ៊ុន សែន។
លោក ហ៊ុន សែន បានលើកឡើងថា៖ «សំណើច្បាប់នេះ គឺជាមូលដ្ឋានគតិយុត្តសម្រាប់ទាក់ទាញ និងផ្តល់វិសាលភាពដល់វិនិយោគិនងាយស្រួលក្នុងកិច្ចវិនិយោគមកកម្ពុជា។ កម្ពុជាយល់ឃើញថា អ្នកវិនិយោគត្រូវការសន្តិភាព ស្ថិរភាព ដែលជាអាទិភាពនៃការសម្រេចចិត្តយកកម្ពុជាជាទិសដៅវិនិយោគ ទោះស្ថានភាពអន្តរជាតិប្រឈមក្នុងវិស័យនយោបាយ និងពាណិជ្ជកម្មយ៉ាងណាក៏ដោយ»។
អនុប្រធានសភាពាណិជ្ជកម្មកម្ពុជា លោក លឹម ហេង ធ្លាប់ប្រាប់ភ្នំពេញប៉ុស្តិ៍ថា វិស័យឯកជនរំពឹងថា ច្បាប់វិនិយោគនេះនឹងឆាប់ចូលជាធរមាន ព្រោះច្បាប់នេះនឹងមានភាពបត់បែនស្របនឹងបរិបទថ្មីនៃការវិវឌ្ឍផ្នែកបច្ចេកវិទ្យា និងការធ្វើពាណិជ្ជកម្មជាអន្តរជាតិ។ ម្យ៉ាងទៀតវាក៏ត្រូវបានរៀបចំឡើងក្នុងអំឡុងពេលដែលសេដ្ឋកិច្ចពិភពលោកកំពុងស្ថិតក្នុងភាពមិនច្បាស់លាស់ដែលបណ្តាលមកពីវិបត្តិសុខភាពសកលជំងឺកូវីដ ១៩ ផងដែរ។
ជាមួយគ្នានេះដែរ លោក ម៉ុង ឫទ្ធី បានឱ្យដឹងទៀតថា សេចក្តីព្រាងច្បាប់នេះក៏បានកែសម្រួល និងធ្វើឱ្យប្រសើរឡើងនូវនីតិវិធីរដ្ឋបាលពាក់ព័ន្ធនឹងយន្តការស្ថាប័ន និងនីតិវិធីនៃការស្នើសុំចុះបញ្ជី ជាដើម។ លោកបន្តថា ដើម្បីបង្កើនភាពប្រកួតប្រជែង និងភាពទាក់ទាញរបស់កម្ពុជាពីសំណាក់វិនិយោគិន សេចក្តីព្រាងច្បាប់នេះក៏បានបង្រួញ ពេលវេលាក្នុងការចេញវិញ្ញាបនបត្រចុះបញ្ជីពី ៣១ ថ្ងៃមកត្រឹម ២០ ថ្ងៃនៃថ្ងៃធ្វើការ ហើយការបំពេញពាក្យចុះបញ្ជីអាចធ្វើតាមរយៈការប្រើប្រាស់ថ្នាលបច្ចេកវិទ្យាព័ត៌មានផងដែរ។
លោក ម៉ុង ឫទ្ធី និយាយថា៖ «សេចក្តីព្រាងច្បាប់នេះនឹងផ្តល់ភាពកក់ក្តៅដល់វិនិយោគិន ដោយសេចក្តីព្រាងច្បាប់នេះបានដាក់បញ្ចូលនូវកាតព្វកិច្ចជាអន្តរជាតិមួយចំនួនរបស់កម្ពុជា ដើម្បីបង្ហាញដល់វិនិយោគិនទាំងអស់នូវការប្តេជ្ញារបស់រដ្ឋាភិបាលកម្ពុជាក្នុងការការពារការវិនិយោគ និងផ្តល់ការធានាដោយអនុលោមតាមច្បាប់អន្តរជាតិនូវប្រព្រឹត្តិកម្មដែលមិនរើសអើង ព្រមទាំងផ្តល់សេវាថែទាំវិនិយោគផងដែរ»។
បើតាមក្រុមប្រឹក្សាអភិវឌ្ឍន៍កម្ពុជា (CDC) គិតត្រឹមឆមាសទី ១ ឆ្នាំ ២០២១ កម្ពុជាបានអនុម័តគម្រោងវិនិយោគថ្មីៗ និងគម្រោងពង្រីកផលិតកម្មចំនួន ៨៧ គម្រោងជាមួយនឹងទុនវិនិយោគជាង ២ ៩៦៩,៦២ លានដុល្លារ។
របាយការណ៍របស់ក្រសួងពាណិជ្ជកម្មបានឱ្យដឹងថា ក្នុងឆ្នាំ ២០២០ កម្ពុជាបាននាំចេញទំនិញទៅទីផ្សារអន្តរជាតិក្នុងតម្លៃសរុប ១៧ ២១៥,៣៧ លានដុល្លារ កើន ១៦,៧២ ភាគរយធៀបនឹងឆ្នាំ ២០១៩ ដែលមានចំនួន ១៤ ៧៤៨,៧៤ លានដុល្លារ៕ LA
