ទីក្រុងម៉ានីលៈ ធនាគារអភិវឌ្ឍន៍អាស៊ី (ADB) បានព្រមមានអំពី «ភាពប្រេះស្រាំយូរអង្វែង» ដោយសារជំងឺរាតត្បាតកូវីដ ១៩ ខណៈដែលខ្លួនបានកាត់បន្ថយការព្យាករណ៍កំណើនសេដ្ឋកិច្ចនៅឆ្នាំ ២០២១ របស់ខ្លួន សម្រាប់តំបន់អាស៊ីដែលកំពុងអភិវឌ្ឍន៍ ដោយសារអត្រានៃការចាក់វ៉ាក់សាំងយឺត ការកើនឡើងនៃការឆ្លង និងការបិទខ្ទប់។
ស្ថាប័នផ្តល់ប្រាក់កម្ចីនេះបាននិយាយកាលពីថ្ងៃពុធថា ការខ្វះចំនួនវ៉ាក់សាំងដែលធ្វើឲ្យប៉ះពាល់ដល់កិច្ចខិតខំប្រឹងប្រែង ដើម្បីផ្តល់វ៉ាក់សាំងដល់តំបន់ភាគច្រើន ដែលកាត់ផ្តាច់ចាប់ពីតំបន់កោះ Cook នៅប៉ាស៊ីហ្វិករហូតដល់កាហ្សាក់ស្ថាននៅអាស៊ីកណ្តាលអាចកាន់តែអាក្រក់ទៅៗ ដោយសារភស្តុតាងនៃការការពារវ៉ាក់សាំងដែលធ្លាក់ចុះបង្កើនតម្រូវការសម្រាប់ការចាក់ដូសជំរុញ។
ធនាគារ ADB ដែលមានមូលដ្ឋាននៅប្រទេសហ្វីលីពីនព្យាករកំណើន ៧,១ ភាគរយ ប្រៀបធៀបជាមួយការព្យាករណ៍លើកមុនកាលពីខែមេសាដែលមានចំនួន ៧,៣ ភាគរយ និងធ្លាក់ចុះបន្តិចក្នុងឆ្នាំ ២០២០ ប៉ុន្តែបាននិយាយថា ការងើបឡើងវិញនៃសេដ្ឋកិច្ច «នៅតែផុយស្រួយ»។
ស្ថាប័នផ្តល់ប្រាក់កម្ចីនេះបានលើកឡើងក្នុងការធ្វើបច្ចុប្បន្នភាពនៃទស្សនៈវិស័យអភិវឌ្ឍន៍អាស៊ីថា អត្រាផ្តល់វ៉ាក់សាំងមិនរលូនល្អទូទាំងតំបន់ដែលតិចជាង ១ ភាគ ៣ នៃប្រជាជនត្រូវបានចាក់វ៉ាក់សាំងការពារពេញលេញប្រឆាំងកូវីដ ១៩ នៅត្រឹមចុងខែសីហា។
នោះប្រៀបធៀបជាមួយការគ្រប់ដណ្តប់ជាង ៥០ ភាគរយក្នុងសហរដ្ឋអាមេរិក និងជិត ៦០ ភាគរយក្នុងសហភាពអឺរ៉ុប។
ធនាគារ ADB បានព្រមានថា ការចែកចាយវ៉ាកសាំងយឺត និងការកើតឡើងនៃវីរុសបំប្លែងថ្មីជាហានិភ័យធំៗចំពោះការព្យាករណ៍ និងអាចមានផលវិបាកខូចខាតរយៈពេលវែង។
ធនាគារ ADB បាននិយាយថា៖ «ការបាត់បង់ប្រាក់ចំណូលបណ្តាលមកពីការរីករាលដាលជំងឺឆ្លងជាក់ស្តែងណាស់បានគំរាមកំហែងដល់ការបន្សល់ស្លាកស្នាមរយៈពេលវែង និងមានផលប៉ះពាល់ច្រើនបែបយ៉ាងលើសេដ្ឋកិច្ចតំបន់»។
ការរីកចម្រើនលើការកាត់បន្ថយភាពក្រីក្រក្នុងប្រទេសកំពុងអភិវឌ្ឍន៍នៅតំបន់អាស៊ីបានដើរថយក្រោយវិញ «យ៉ាងហោចណាស់ ២ ឆ្នាំ» និង ការបិទសាលារៀនដែលពន្យាពេលនឹងនាំឲ្យការបាត់បង់ការរៀនសូត្រ និងការរកចំណូលខ្ពស់ជាងការរំពឹងទុក។
ខណៈពេលដែលសេដ្ឋកិច្ចតំបន់ត្រូវបានគេរំពឹងថារីកលូតលាស់នៅឆ្នាំនេះ និងឆ្នាំក្រោយ ការងើបឡើងវិញបានដល់ផ្លូវបំបែកក្នុងឆមាសដំបូងឆ្នាំ ២០២១ នៅពេលដែលវីរុសបំប្លែងថ្មី និងឆ្លងលឿន Delta បានរាលដាលដល់ប្រទេសខ្លះ។
ធនាគារ ADB បានឲ្យដឹងថា ២ ភាគ ៣ នៃសេដ្ឋកិច្ចប្រទេសកំពុងអភិវឌ្ឍន៍តំបន់អាស៊ី ចំណែកនៃប្រជាជនដែលត្រូវបានផ្តល់វ៉ាក់សាំងពេញលេញគឺមានតែ ៣០ ភាគរយ ឬក៏ទាបជាងនេះ៕ RR