.jpg)
វិភាគដោយ៖ លោក ឈា ឆាយហេង ប្រធានផ្នែកប្រឹក្សាយោបល់ហិរញ្ញវត្ថុនៃក្រុមហ៊ុន ហ្គោលដេន អេហ្វអិកស៍ លីង ឃែភីថល
នៅច្ងៃចន្ទសប្តាហ៍នេះ តម្លៃមាសបានត្រឡប់ពីកម្រិតទាប ១ ៧៤២ ដុល្លារ និងកម្រិតខ្ពស់ ១ ៧៦៥,៤០ ដុល្លារក្នុង ១ អោនស៍ ហើយត្រូវបានជួញដូរក្នុងតម្លៃកើនឡើងពី ១ ៧៤៥ ទៅ ១ ៧៨០ ដុល្លារ។ ដោយមានការលក់ភាគហ៊ុននៅទូទាំងពិភពលោក ដោយសារការព្រួយបារម្ភពីហានិភ័យពាណិជ្ជកម្មរបស់ចិន មាសកំពុងបង្ហាញពីតម្លៃរបស់ខ្លួនក្នុងនាមជាទ្រព្យសម្បត្តិដែលមានសុវត្ថិភាពសម្រាប់ការវិនិយោគ។
គេហទំព័រ Fxempire កាលពីថ្ងៃចន្ទ បានរាយការណ៍ថា៖ «មាសពិតជាបានដើរតួនាទីជាទ្រព្យសម្បត្តិដែលមានសុវត្ថិភាពនាពេលបច្ចុប្បន្ននេះ ខណៈភាគហ៊ុននៅទូទាំងពិភពលោកត្រូវបានលក់ចេញយ៉ាងច្រើន ដោយសារវិនិយោគិនមានការព្រួយបារម្ភអំពីលទ្ធភាពសងបំណុលរបស់ក្រុមហ៊ុនអចលនទ្រព្យចិន Evergrande ។ ការលក់ភាគហ៊ុននៅទូទាំងពិភពលោកនេះ បានបន្តចូលដល់ទីផ្សារភាគហ៊ុនសហរដ្ឋអាមេរិក។ ជាក់ស្ដែង នៅកម្រិតទាបនាពេលបច្ចុប្បន្ននេះ ផ្សារហ៊ុន Dow Jones បានធ្លាក់ចុះ ចំនួន ៩០០ ពិន្ទុមុនពេលងើបឡើងវិញ»។
គេហទំព័រ Reuters ក៏បានរាយការណ៍ដែរថា៖ «ទីផ្សារហ៊ុននៅសហរដ្ឋអាមេរិកបានធ្លាក់ចុះកាលពីថ្ងៃចន្ទ ដោយសារការដួលរលំដែលអាចកើតមាននៅ Evergrande របស់ប្រទេសចិន។ កត្ដានេះបានជំរុញឱ្យមានការលក់ចេញភាគហ៊ុនយ៉ាងច្រើន ហើយបានធ្វើឱ្យវិនិយោគិនរត់ចេញពីភាគហ៊ុន ដើម្បីសុវត្ថិភាព។ ម្យ៉ាងទៀត មាសបានកើនឡើងដោយសារកត្ដានេះដូចគ្នា ប៉ុន្តែការកើនឡើងត្រូវបានបន្ថយដោយសារកម្លាំងប្រាក់ដុល្លារ ដោយផ្អែកទៅលើការរំពឹងទុកជាមុននៃកិច្ចប្រជុំគោលនយោបាយធនាគារកណ្តាលសហរដ្ឋអាមេរិក»។
ចំពោះផ្នែកបច្ចេកទេសវិញ តម្លៃមាសនៅតែបន្តប្រែប្រួលក្នុងប្រអប់ទីផ្សារដែលបង្ហាញថា ទំនោរបញ្ច្រាស គឺអាចកើតឡើងបាន។ ដូច្នេះ អ្នកជួញដូរគួរតែរកមើលការបញ្ជាក់ផ្នែកព័ត៌មានពីកិច្ចប្រជុំរបស់គណៈកម្មាធិការទីផ្សារបើកចំហ (FOMC) ដែលចេញផ្សាយនៅថ្ងៃពុធសប្តាហ៍នេះ៕
