.jpg)
យន្តហោះរបស់ក្រុមហ៊ុនអាកាសចរណ៍ Sky Angkor Airline។ រូបថត Sky Angkor
ភ្នំពេញៈ ក្រុមហ៊ុនអាកាសចរណ៍ Sky Angkor Airline បានឱ្យដឹងថា ខ្លួនបានត្រៀមរួចហើយក្នុងការដឹកភ្ញៀវកូរ៉េខាងត្បូង និងចិនចូលមកទស្សនាប្រទេសកម្ពុជា នៅពេលដែលរដ្ឋាភិបាលគ្រោងនឹងប្រកាសបើកទទួលភ្ញៀវទេសចរដែលចាក់វ៉ាក់សាំងរួចនាពេលឆាប់ៗខាងមុខ។
ការលើកឡើងរបស់ក្រុមហ៊ុន Sky Angkor Airline បានធ្វើឡើងក្នុងជំនួបជាមួយ លោក ថោង ខុន រដ្ឋមន្ត្រីក្រសួងទេសចរណ៍ កាលពីថ្ងៃទី ២១ ខែកញ្ញា នៅទីស្តីការក្រសួងដោយលោករដ្ឋមន្ត្រីបានប្រាប់ក្រុមហ៊ុន Sky Angkor Airline ឱ្យត្រៀមលក្ខណៈ បើកការហោះហើរដឹកជញ្ជូនភ្ញៀវឡើងវិញ ខណៈរដ្ឋាភិបាលកម្ពុជាក៏ត្រៀមប្រកាសបើកទេសចរណ៍អន្តរជាតិឡើងវិញផងដែរ។
លោក ថោង ខុន បានលើកឡើងថា៖ «រាជរដ្ឋាភិបាលបាននិងកំពុងត្រៀមលក្ខណៈក្នុងការបើកទទួលភ្ញៀវទេសចរអន្តរជាតិ (ទេសចរចាក់វ៉ាក់សាំងរួច) ឡើងវិញនាពេលឆាប់ៗ ប៉ុន្តែស្របតាមយន្តការទេសចរណ៍សុវត្ថិភាព»។
លោករដ្ឋមន្ត្រីបានបន្តថា នាពេលខាងមុខឆាប់ៗ លោកនាយករដ្ឋមន្ត្រី ហ៊ុន សែន នឹងប្រកាសពីការបើកទេសចរណ៍សុវត្ថិភាពនេះជាផ្លូវការ។
លោកបញ្ជាក់ថា៖ «តាមគម្រោងដូចដែលសម្តេចតេជោមានប្រសាសន៍គឺចំពោះភ្ញៀវទេសចរអន្តរជាតិដែលមកទស្សនាកម្ពុជានឹងតម្រូវឱ្យធ្វើចត្តាឡីស័កត្រឹមតែ ៧ ថ្ងៃប៉ុណ្ណោះ គឺត្រូវធ្វើចត្តាឡីស័កនៅក្នុងតំបន់ទេសចរណ៍ ឬគោលដៅទេសចរណ៍ជាក់លាក់ ណាមួយដែលមានសុវត្ថិភាព ពោលគឺជាតំបន់ដែលគ្មានការរាតត្បាតពីជំងឺកូវីដ ១៩»។
លោក Koo Taeoh អ្នកគ្រប់គ្រងទូទៅក្រុមហ៊ុន Sky Angkor Airline បានឱ្យដឹងថា ក្រោយពីលោកនាយករដ្ឋមន្ត្រីប្រកាសពីបំណងបើកទេសចរណ៍សុវត្ថិភាពឡើងវិញនៅកម្ពុជា អគ្គនាយកក្រុមហ៊ុនលោកបានរួសរាន់ត្រឡប់ទៅប្រទេសកូរ៉េភ្លាម ដើម្បីធ្វើការជាមួយក្រុមហ៊ុនទេសចរណ៍នៅប្រទេសកូរ៉េ និងចិន លើការផ្សព្វផ្សាយឱ្យភ្ញៀវទេសចរធ្វើដំណើរមកកម្សាន្តនៅកម្ពុជា ក្រោយពេលរដ្ឋាភិបាលកម្ពុជាសម្រេចបើកទេសចរណ៍ជាផ្លូវការនាពេលខាងមុខ។
លោកក៏បានលើកឡើងអំពីគម្រោងវិនិយោគបង្កើតផលិតផលទេសចរណ៍ថ្មីៗនៅតំបន់សៀមរាបអង្គរបន្ថែមទៀតផងដែរ៕ LA
