.jpg)
កិច្ចប្រជុំស្ដីពីកិច្ចសហប្រតិបត្តិការទ្វេភាគីលើអន្តរវិស័យក្នុងបរិបទថ្មី តាមប្រព័ន្ធអនឡាញ កាលពីថ្ងៃទី ២២ កញ្ញា។ ក្រសួងពាណិជ្ជកម្ម
ភ្នំពេញៈ កម្ពុជាបានជំរុញឱ្យប្រទេសដែនកោះនៅភាគខាងកើតនៃទ្វីបអាហ្វ្រិក សាធារណរដ្ឋម៉ូរីស (Republic of Mauritius) បង្កើនទំនាក់ទំនង និងការដោះដូរពាណិជ្ជកម្ម ព្រមទាំងការវិនិយោគជាមួយកម្ពុជាឱ្យបានច្រើនបន្ថែមទៀត។
ការលើកឡើងនេះបានធ្វើឡើងក្នុងជំនួបរវាង លោក ប៉ែន សុវិជាតិ អនុរដ្ឋលេខាធិការក្រសួងពាណិជ្ជកម្ម ដែលបានដឹកនាំគណៈប្រតិភូកម្ពុជាមកពីក្រសួង-ស្ថាប័នចំនួន ៩ ដើម្បីជួបពិភាក្សាជាមួយគណៈប្រតិភូរបស់សាធារណរដ្ឋម៉ូរីស ដែលដឹកនាំដោយលោក Virednra Kumarsingh Daby នាយកប្រតិបត្តិក្រសួងអភិវឌ្ឍន៍ឧស្សាហកម្ម សហគ្រាសធុនតូច និងមធ្យម និងកិច្ចសហប្រតិបត្តិការនៃសាធារណរដ្ឋម៉ូរីសកាលពីថ្ងៃទី ២១ ខែកញ្ញា ឆ្នាំ ២០២១ តាមរយៈប្រព័ន្ធវីដេអូ។
លោក សុវិជាតិ បានឱ្យដឹងថា កន្លងមកភាគីទាំង ២ បានធ្វើសេចក្តីព្រាងអនុស្សរណៈនៃការយោគយល់គ្នា (MoU) ចំនួន ៣ សម្រាប់កិច្ចសហប្រតិបត្តិការលើវិស័យឧស្សាហកម្ម បច្ចេកវិទ្យាព័ត៌មាន និងសេវាកម្មហិរញ្ញវត្ថុ។ ក្នុងស្មារតីនេះកម្ពុជាស្នើឱ្យភាគីសាធារណរដ្ឋម៉ូរីសជួយពន្លឿនការពិនិត្យ ដើម្បីភាគីទាំង ២ អាចបន្តនីតិវិធីបន្តលើ MoU ទាំង ៣។
លោកថ្លែងថា៖ «កម្ពុជាស្នើឱ្យភាគីសាធារណរដ្ឋម៉ូរីសបន្តទំនាក់ទំនងជាមួយភាគីកម្ពុជា តាមយន្តការផ្លូវការបន្ថែមទៀត និងស្នើឱ្យភាគីម៉ូរីសពិចារណាលើការពង្រឹងការធ្វើពាណិជ្ជកម្ម និងវិនិយោគជាមួយនឹងកម្ពុជា តាមរយៈការរួមគ្នាបង្កើតវេទិកាធុរកិច្ចសម្រាប់ធុរជន និងវិនិយោគិននៃប្រទេសទាំង ២ ដើម្បីបង្ហាញពីផលិតផល និងវិស័យសក្តានុពលសម្រាប់ការធ្វើពាណិជ្ជកម្ម និងវិនិយោគ ដោយមានការសម្របសម្រួលដោយសភាពាណិជ្ជកម្មកម្ពុជា ខណៈកន្លងមកស្ថាប័ននេះបានធ្វើការដ៏ជោគជ័យជាមួយធុរជន និងវិនិយោគិនមកពីបណ្តាប្រទេសជាច្រើន រួមមានចិន សិង្ហបុរី ថៃ រុស្ស៊ី ជាដើម»។
លោក Virednra បានលើកឡើងពីគោលនយោបាយ និងយុទ្ធសាស្ត្រនៃរដ្ឋាភិបាលខ្លួនដែលបានធ្វើកំណែទម្រង់ផ្នែកស្ថាប័ន និងបទប្បញ្ញត្តិនានាដើម្បីពង្រឹងការគាំទ្រការអភិវឌ្ឍផ្នែក SME និងបង្កើនទំនុកចិត្តដល់ធុរជន និងវិនិយោគិនឯកជននៅម៉ូរីស។
លោកបន្តថា សាធារណរដ្ឋម៉ូរីសក៏ទទួលបានការរីកចម្រើនលើសន្ទស្សន៍ភាពងាយស្រួលក្នុងការធ្វើធុរកិច្ច (Ease of Doing Business) ដែលកើតចេញពីកំណែទម្រង់ទាំងនេះ។
លោកថ្លែងថា៖ «សាធារណរដ្ឋម៉ូរីសសន្យានឹងពន្លឿនការពិនិត្យទាក់ទងអនុស្សរណៈនៃការយោគយល់ជាមួយបណ្តាក្រសួងស្ថាប័នពាក់ព័ន្ធ»។
តួលេខពីក្រសួងពាណិជ្ជកម្មឱ្យដឹងថា ទំហំពាណិជ្ជកម្មរវាងប្រទេសទាំង ២ ក្នុងឆ្នាំ ២០១៩ មានតម្លៃត្រឹម ២,៤ លានដុល្លារក្នុងនេះកម្ពុជានាំចេញ ២,២៦ លានដុល្លារ៕ LA
