.jpg)
WB ព្យាករកំណើនសេដ្ឋកិច្ចកម្ពុជាមកនៅត្រឹម ២,២% ក្នុងឆ្នាំ ២០២១ ធ្លាក់ចុះពី ៤ ភាគរយនៃការព្យាករកាលពីខែមេសា។ ហុង មិនា
ភ្នំពេញៈ ធនាគារពិភពលោក (WB) បានកែតម្រូវការព្យាកររបស់ខ្លួន ដោយទម្លាក់ការព្យាករកំណើនសេដ្ឋកិច្ចសម្រាប់កម្ពុជាមកនៅត្រឹម ២,២ ភាគរយក្នុងឆ្នាំ ២០២១ នេះ ធ្លាក់ចុះពី ៤ ភាគរយនៃការព្យាករកាលពីខែមេសា ដោយសារការកើនឡើងការឆ្លងវីរុសបំប្លែងថ្មីដែលតា ខណៈការឆ្លង និងស្លាប់បានកើនឡើងយ៉ាងរហ័ស។
ការកែតម្រូវរបស់ធនាគារពិភពលោក គឺស្របគ្នានឹងការព្យាកររបស់រដ្ឋាភិបាលកម្ពុជា ដែលបានទម្លាក់ការព្យាករសេដ្ឋកិច្ចសម្រាប់ឆ្នាំ ២០២១ ពី ៤,១ ភាគរយមកនៅត្រឹម ២,៥ ភាគរយ ដែលប្រកាសកាលពីដើមឆ្នាំនេះ។
ក្នុងការធ្វើបច្ចុប្បន្នភាពសេដ្ឋកិច្ចចុងក្រោយបំផុតរបស់ខ្លួនកាលពីថ្ងៃទី ២៨ ខែកញ្ញា WB បានព្យាករសម្រាប់ឆ្នាំ ២០២១ គឺកែតម្រូវកំណើនមកនៅត្រឹម ២,២ ភាគរយ ទោះបីជាការនាំចេញរបស់កម្ពុជាមានភាពរឹងមាំ ដែលគាំទ្រដោយលក្ខខណ្ឌតម្រូវការខាងក្រៅក៏ដោយ។
WB បានឱ្យដឹងថា៖ «ទស្សនវិស័យរបស់កម្ពុជានៅតែមានភាពមិនច្បាស់លាស់ ហើយហានិភ័យសំដៅទៅរកការធ្លាក់ចុះ។ ទោះបីការចាក់វ៉ាក់សាំងមានវឌ្ឍនភាពលឿន ក៏ហានិភ័យនៃការផ្ទុះឡើងនៃការឆ្លងដែលអូសបន្លាយ និងការរាំងស្ទះបន្តនៅតែមានកម្រិតខ្ពស់ ដោយសារចំនួននៃការឆ្លង និងស្លាប់បន្តមានចំនួនច្រើន»។
ជាមួយគ្នានេះ WB ក៏អង្កេតឃើញថា ការផ្ទុះឡើងនូវការឆ្លងដែលបានអូសបន្លាយតាំងពីត្រីមាសទី ២ ឆ្នាំ ២០២១ បានធ្វើឱ្យការស្តារសេដ្ឋកិច្ចឡើងវិញនៅមានភាពយឺតយ៉ាវ ពិសេសវិស័យសេវាកម្ម សំណង់ និងអចលនទ្រព្យ។
លោក លី សូដេត សេដ្ឋវិទូជាន់ខ្ពស់នៅធនាគារពិភពលោកប្រចាំកម្ពុជា បានឱ្យដឹងនៅក្នុងសន្និសីទព័ត៌មានកាលពីថ្ងៃទី ២៨ ខែកញ្ញា តាមប្រព័ន្ធអនឡាញថា ការធ្វើដំណើរ និងវិស័យទេសចរណ៍ ដែលត្រូវបានប៉ាន់ប្រមាណថា នឹងផ្ដល់ការងារប្រហែល ២ លានកន្លែងក្នុងអំឡុងពេលមុនការរីករាលដាលជំងឺកូវីដ ១៩ ស្ទើរតែធ្លាក់ចុះទាំងស្រុង។
លោកលើកឡើងថា៖ «ការបាត់បង់ការងារមានកាន់តែច្រើននៅក្នុងវិស័យនេះបានធ្វើឱ្យមានផលប៉ះពាល់យ៉ាងខ្លាំងទៅលើកំណើនសេដ្ឋកិច្ចកម្ពុជា ខណៈយើងក៏បានមើលឃើញការបាត់បង់ការងារកើនឡើង ដោយកំណើនពលករចំណាកស្រុកដែលត្រឡប់មកពីបរទេសវិញ ជាពិសេសមកពីប្រទេសថៃ ក៏បន្ថែមការគ្មានការងារធ្វើក្នុងប្រទេសកម្ពុជាផងដែរ»។
លោកបន្ថែមថា៖ «យើងក៏បានមើលឃើញគោលនយោបាយមួយចំនួនដែលកម្ពុជាអាចទាញយកអត្ថប្រយោជន៍ពីកិច្ចព្រមព្រៀងពាណិជ្ជកម្មសេរីទ្វេភាគីកម្ពុជា និងចិន និងច្បាប់វិនិយោគថ្មី ដូច្នេះកម្ពុជាត្រូវតែត្រៀមខ្លួនឱ្យរួចរាល់សម្រាប់អត្ថប្រយោជន៍នោះ តាមរយៈការដោះស្រាយបញ្ហារាំងស្ទះផ្នែកផ្គត់ផ្គង់ ដោយកាត់បន្ថយតម្លៃលើការធ្វើអាជីវកម្ម ឡូជីស្ទិក និងថាមពល ខណៈការលុបបំបាត់ភាពតឹងរ៉ឹងនៅក្នុងបទប្បញ្ញតិ្តដែលជាប់ទាក់ទងនឹងការងារសំខាន់ៗ បានរារាំងការស្ទុះងើបឡើងវិញដ៏រឹងមាំនៃទីផ្សារការងារ»។
យោងតាមការស្ទង់មតិរបស់ HFPS ការងារ និងប្រាក់ចំណូលមិនត្រូវបានស្តារឱ្យដល់កម្រិតមុនជំងឺរាតត្បាតទេ សូម្បីតែមុនពេលការផ្ទុះឡើងជំងឺកូវីដ-១៩ ចុងក្រោយនេះក៏ដោយ។ ប្រហែល ៦៩ ភាគរយនៃអ្នករកប្រាក់ចំណូលចម្បងរបស់គ្រួសារមានការងារធ្វើនៅខែមីនា ឆ្នាំ ២០២១ គឺ ១៣ ពិន្ទុភាគរយ ទាបជាងកម្រិតមុនជំងឺរាតត្បាត។ ប្រហែល ៤៥ ភាគរយនៃគ្រួសារបន្តបាត់បង់ប្រាក់ចំណូលនៅខែមីនា ឆ្នាំ ២០២១។
ការរំខានសកម្មភាពសេដ្ឋកិច្ចដោយសារវិធានការរឹតត្បិត ដើម្បីទប់ស្កាត់ការចម្លងមេរោគបង្កឱ្យបាត់បង់ការងារ ឬការកាត់បន្ថយម៉ោងធ្វើការ ដែលប៉ះពាល់ដល់ប្រាក់ចំណូល។ ការបិទសាលារៀនបានប៉ះពាល់ដល់ការអប់រំ ចាប់តាំងពីចុងខែមីនា ឆ្នាំ ២០២១ ជាពិសេសសម្រាប់សិស្សក្រីក្រដែលមានលទ្ធភាពតិចតួចក្នុងការប្រើប្រាស់បច្ចេកវិទ្យាឌីជីថល»។
ការស្ទង់មតិ HFPS បន្តថា៖ «ហានិភ័យឆ្ពោះទៅរកការធ្លាក់ចុះ ហើយទស្សនវិស័យរបស់កម្ពុជានៅតែមានភាពមិនច្បាស់លាស់ខ្ពស់។ ទោះបីការចាក់វ៉ាក់សាំងមានវឌ្ឍនភាពលឿនក៏ដោយ ហានិភ័យនៃការរាំងស្ទះនៅបន្តតែមានកម្រិតខ្ពស់ ដោយសារការឆ្លង និងស្លាប់បន្តមានចំនួនច្រើន។ លើសពីនេះ កំណើនឥណទានខ្ពស់ និង ការប្រមូលផ្ដុំឥណទានក្នុងស្រុក នៅក្នុងវិស័យសំណង់ និង អចលនទ្រព្យនៅតែជាហានិភ័យដ៏សំខាន់ចំពោះស្ថិរភាពហិរញ្ញវត្ថុរបស់កម្ពុជា»។
យោងតាម WB វិស័យកសិកម្មនៅតែមានភាពធន់ និងការនាំចេញទំនិញបានងើបឡើងដែលគាំទ្រពីលក្ខខណ្ឌតម្រូវការខាងក្រៅល្អប្រសើរក៏ដោយ កត្តាជំរុញកំណើនផ្សេងទៀត ពិសេសវិស័យទេសចរណ៍ សំណង់ និងអចលនទ្រព្យបន្តរងផលប៉ះពាល់យ៉ាងខ្លាំងពីការរីករាលដាលនៃជំងឺរាតត្បាត។
ធនាគារអភិវឌ្ឍន៍អាស៊ី កាលពីថ្ងៃទី ២២ ខែកញ្ញា បានឱ្យដឹងថា សេដ្ឋកិច្ចកម្ពុជា ត្រូវព្យាករថា នឹងកើនឡើង ១,៩ ភាគរយប៉ុណ្ណោះនៅឆ្នាំនេះ ដោយសារតែវិបត្តិជំងឺកូវីដ ១៩ ដែលអូសបន្លាយពេល ប៉ុន្តែវានឹងកើនឡើងដល់ ៥,៥ ភាគរយក្នុងឆ្នាំ ២០២២៕ LA
