ភ្នំពេញៈ ធនាគារជាតិនៃកម្ពុជា (NBC) បានដាក់ឱ្យដំណើការជាផ្លូវការនូវឧបករណ៍ផ្តល់សន្ទនីយភាពរយៈពេលខ្លី (Marginal Liquidity Facility-MLF) ក្នុងគោលបំណង ដើម្បីជួយឱ្យមានសន្ទនីយភាពគ្រប់គ្រាន់សម្រាប់គ្រឹះស្ថានធនាគារ និងហិរញ្ញវត្ថុដើម្បីយកទៅបំពេញប្រតិបត្តិការអាជីវកម្មរបស់ខ្លួន។
សេចក្តីប្រកាសព័ត៌មានឱ្យដឹងថា៖ «ធនាគារជាតិនៃកម្ពុជាសូមជម្រាបជូនគ្រឹះស្ថានធនាគារ និងហិរញ្ញវត្ថុឱ្យបានជ្រាបថា ក្នុងគោលបំណងបន្តអភិវឌ្ឍឧបករណ៍នយោបាយរូបិយវត្ថុ ស្របតាមវឌ្ឍនភាពនៃប្រព័ន្ធធនាគារបច្ចុប្បន្ន និងដើម្បីជំរុញទីផ្សារអន្តរធនាគារឱ្យកាន់តែមានភាពល្អប្រសើរឡើងវិញថែមទៀត ធនាគារជាតិនៃកម្ពុជាដាក់ឱ្យដំណើការនូវឧបករណ៍នយោបាយរូបិយវត្ថុថ្មីមួយគឺ ឧបករណ៍ផ្តល់សន្ទនីយភាពរយៈពេលខ្លី (MLF) ជាប្រាក់រៀលចាប់ពីថ្ងៃពុធ ទី ១៥ ខែ កញ្ញា ឆ្នាំ ២០២១»។
«ឧបករណ៍ផ្តល់សន្ទនីយភាពរយៈពេលខ្លី (MLF) នេះមានរយៈពេលមួយយប់ (Overnight) និងអាចពន្យារពេលបានតិចជាង ឬស្មើ ៥ ថ្ងៃ ដោយមានមូលបត្រអាចជួញដូរបាន (NCD) ជាវត្ថុធានា ដើម្បីជួយបំពេញកង្វះសន្ទនីយភាពរយៈពេលខ្លី ដែលគ្រឹះស្ថានធនាគារ និងហិរញ្ញវត្ថុមានតម្រូវការ»។ នេះបើតាម NBC។
លោក សាយ សូនី នាយកប្រតិបត្តិរបស់គ្រឹះស្ថានមីក្រូហិរញ្ញវត្ថុប្រាសាក់បានស្វាគមន៍ចំពោះគំនិតផ្តួចផ្តើមថ្មីរបស់ NBC ព្រោះវានឹងជួយដល់ស្ថាប័នហិរញ្ញវត្ថុជាពិសេសគ្រឹះស្ថានដែលខ្វះសន្ទនីយភាព។
លោកបានប្រាប់ថា៖ «ប្រាសាក់មិនមានបញ្ហាជាមួយនឹងកង្វះសន្ទនីយភាពនៅឡើយពេលនេះ។ NBC គ្រាន់តែបន្ថែមឧបករណ៍ថ្មី ដើម្បីពង្រឹងប្រតិបត្តិការធនាគារក៏ដូចជាការពារវិស័យនេះ និងអតិថិជនប៉ុណ្ណោះ។ ស្ថាប័នហិរញ្ញវត្ថុទាំងអស់កំពុងបន្តផ្តល់ប្រាក់កម្ចី ហើយអ្នកដាក់ប្រាក់បញ្ញើរក្សាប្រាក់ការដាក់ប្រាក់របស់ពួកគេ។ ចំណែកវិនិយោគិនក៏កំពុងស្វែងរកការវិនិយោគនៅក្នុងវិស័យនេះផងដែរ។ យើងខ្ញុំសូមថ្លែងអំណរគុណដល់ NBC ដែលបានធ្វើការយ៉ាងសកម្មភាពគាំទ្រដល់វិស័យនេះជាមួយនឹងការដាក់ឱ្យដំណើរការនូវឧបករណ៍ថ្មីនេះ»។
គិតចាប់ពីថ្ងៃទី ១ ដល់ថ្ងៃទី ២៨ ខែកញ្ញា ធនាគារជាតិនៃកម្ពុជា (NBC) បានដាក់ដេញថ្លៃប្រមាណជា ១៥០ លានដុល្លារ សម្រាប់ឱ្យក្រុមហ៊ុនប្តូរប្រាក់ និងវិស័យហិរញ្ញវត្ថុចូលមកដេញថ្លៃក្នុងគោលបំណងរក្សាស្ថិរភាពអត្រាប្តូរប្រាក់ធៀបនឹងប្រាក់ដុល្លារអាមេរិក ក៏ដូចជាជំរុញសកម្មភាពសេដ្ឋកិច្ចក្នុងអំឡុងពេលវិបត្តិសុខភាពឆ្ពោះទៅរកការងើបឡើងវិញនៃសេដ្ឋកិច្ចឆាប់រហ័ស។
អគ្គនាយិកាធនាគារជាតិនៃកម្ពុជា លោកស្រី ជា សិរី បានប្រាប់ ភ្នំពេញ ប៉ុស្ដិ៍ថា ក្នុងរយៈពេល ២ ទសវត្សរ៍កន្លងមកនេះ ធនាគារជាតិនៃកម្ពុជាបានរក្សាស្ថិរភាពតម្លៃប្រាក់រៀលបានយ៉ាងល្អប្រសើរ។ ជាលទ្ធផលស្ថិរភាពប្រាក់រៀលបានជួយរក្សាអំណាចទិញរបស់ប្រាក់រៀល ពង្រឹងជំនឿទុកចិត្ត ព្រមទាំងលើកទឹកចិត្តសាធារណជនឱ្យប្រើប្រាស់ និងសន្សំជាប្រាក់រៀល។
លោកស្រីពន្យល់ថា៖ «ការណ៍នេះបានរួមចំណែកយ៉ាងសំខាន់ក្នុងការរក្សាស្ថិរភាពម៉ាក្រូសេដ្ឋកិច្ច និងភាពរីកចម្រើនសកម្មភាពសេដ្ឋកិច្ចកម្ពុជាប្រកបដោយចីរភាព»៕ LA