The Phnom Penh Post Search

Search form

Logo of Phnom Penh Post newspaper Phnom Penh Post - កម្ពុជា​ចុះ​ MoU ជាមួយ​អូស្ត្រាលី​ក្នុង​ក្របខ័ណ្ឌ​កម្មវិធី​ខ្សែចង្វាក់​តម្លៃ​នៃ CAVAC II




កម្ពុជា​ចុះ​ MoU ជាមួយ​អូស្ត្រាលី​ក្នុង​ក្របខ័ណ្ឌ​កម្មវិធី​ខ្សែចង្វាក់​តម្លៃ​នៃ CAVAC II

Content image - Phnom Penh Post
កម្ពុជា​ចុះ​ MoU ជាមួយ​អូស្ត្រាលី​ក្នុង​ក្របខ័ណ្ឌ​កម្មវិធី​ខ្សែចង្វាក់​តម្លៃ​នៃ CAVAC II កាលពីម្សិលមិញ។ រូបថត CDC

កម្ពុជា​ចុះ​ MoU ជាមួយ​អូស្ត្រាលី​ក្នុង​ក្របខ័ណ្ឌ​កម្មវិធី​ខ្សែចង្វាក់​តម្លៃ​នៃ CAVAC II

ភ្នំពេញៈ ក្រុមប្រឹក្សា​អភិវឌ្ឍន៍​កម្ពុជា​ (CDC) សហការ​ជាមួយ​ក្រសួងកសិកម្ម រុក្ខាប្រមាញ់ និង​នេសាទ និង​ក្រសួង​ការបរទេស និង​ពាណិជ្ជកម្ម​អូស្ត្រាលី បាន​ចុះហត្ថលេខា​លើ​អនុស្សរណៈ​យោគយល់​ (MoU) ​ស្តីពី​ការរៀបចំ​ហិរញ្ញប្បទាន​សម្រាប់​គាំទ្រ​ការប្រតិបត្តិ​របស់​តុវិនិយោគ​កសិ-ចំណីអាហារ​ (Agri-Food investment Desk-AFID) នៅ​ក្រុមប្រឹក្សា​អភិវឌ្ឍន៍​កម្ពុជា ដើម្បី​ជំរុញ​ការវិនិយោគ និង​លើកកម្ពស់​ការអភិវឌ្ឍ​ក្នុង​វិស័យ​កសិ-ចំណីអាហារ​នៅ​កម្ពុជា​។ នេះ​បើតាម​សេចក្តីប្រកាស​ព័ត៌មាន CDC​។

កម្មវិធី​នេះ​ធ្វើឡើង​ក្នុង​ក្របខ័ណ្ឌ​កម្មវិធី​ខ្សែ​ច្រវាក់​តម្លៃ​កសិកម្ម​កម្ពុជា-អូស្ត្រាលី CAVAC II ក្រោម​អធិបតីភាព លោក សុក ចិន្តាសោភា អគ្គលេខាធិការ CDC និង​លោក Pablo Kang ឯកអគ្គរាជទូត​អូស្ត្រាលី​ប្រចាំ​កម្ពុជា កាលពី​ថ្ងៃទី​ ២៩ ខែកញ្ញា តាម​ប្រព័ន្ធ​ហ្ស៊ូម​។

MoU នេះ​នឹង​ក្លាយជា​ឧបករណ៍​ដ៏មាន​សារៈសំខាន់​ក្នុង​ការរួមចំណែក​ដល់​ការជំរុញ​វិនិយោគ និង​លើកកម្ពស់​ការអភិវឌ្ឍ​ក្នុង​វិស័យ​កសិចំណីអាហារ​ ដើម្បី​ធ្វើឱ្យ​ប្រសើរ​ឡើង​ភាពប្រកួតប្រជែង​ក្នុង​វិស័យ​កសិកម្ម​។

ការប្រតិបត្តិ​របស់​តុ​វិនិយោគ​កសិ-ចំណីអាហារ​ (​មាន​ការិយាល័យ​) នៅ​ក្រុមប្រឹក្សា​អភិវឌ្ឍន៍​កម្ពុជា នឹង​ជួយ​ពង្រឹង​មូលដ្ឋាន​កាន់តែ​រឹងមាំ​នៃ​វិស័យ​កសិចំណីអាហារ​ឱ្យ​កាន់តែ​មាន​ភាពធន់​នៅ​កម្ពុជា តាមរយៈ​ការធ្វើ​ពិពិធកម្ម​ធនធាន និង​ទម្រង់​នៃ​ការវិនិយោគ ដែល​ប្រើប្រាស់​បច្ចេកវិទ្យា និង​នវានុវត្តន៍​ក្នុង​វិស័យ​នេះ ព្រមទាំង​បង្កើត​ការងារ​ដែលមាន​តម្លៃបន្ថែម​កាន់តែ​ខ្ពស់​ដល់​ប្រជាជន​ខ្មែរ​ក្នុង​វិស័យ​កសិ-ចំណីអាហារ​។

លោក សុក ចិន្តាសោភា បាន​ថ្លែងអំណរគុណ​ដល់​ក្រសួង​ការបរទេស និង​ពាណិជ្ជកម្ម​អូស្ត្រាលី ដែល​បាន​ផ្តល់ជំនួយ​បច្ចេកទេស​ដល់ CDC និង​ក្រសួងកសិកម្ម ដើម្បី​ធ្វើ​សកម្មភាព​ក្រោម​កម្មវិធី CAVAC II​។

លោក​លើកឡើង​ថា​៖ «​ខ្ញុំ​សូម​វាយតម្លៃ​ខ្ពស់​ចំពោះ​ស្ថានទូត​សម្រាប់​តួនាទី​នៅ​ក្នុងការ​ផ្តល់ជំនួយ​បច្ចេកទេស ដើម្បី​ពន្លឿន​ការស្តារ​ឡើងវិញ​នូវ​សេដ្ឋកិច្ចកម្ពុជា​ក្នុង​គន្លង​ប្រក្រតីភាព​ថ្មី​ក្រោយ​វិបត្តិ​ជំងឺ​កូវីដ​ ១៩»​។

លោក​ថ្លែង​ទៀតថា​៖ «​ទន្ទឹមនឹងនេះ​ច្បាប់​ថ្មី​ស្ដីពី​ការវិនិយោគ​នៃ​ព្រះរាជាណាចក្រ​កម្ពុជា​នឹង​ផ្តល់​ការលើក​ទឹកចិត្ត​ឆ្លាតវៃ​ដល់​ការវិនិយោគ​តាម​វិស័យ ខណៈ​ការវិនិយោគ​ក្នុង​វិស័យ​កសិកម្ម និង​កសិ-ចំណីអាហារ ត្រូវបាន​កំណត់​ជា​វិស័យ​អាទិភាព​ដែល​ត្រូវ​ជំរុញ និង​លើកកម្ពស់​ផលិតភាព​បន្ថែមទៀត ដើម្បី​ធានាថា​វិស័យ​ទាំងនេះ​នឹងមាន​ភាពធន់ និង​ចីរភាព​ក្នុង​ការរួមចំណែក​ដល់​ការរក្សា​លំនឹង​សេដ្ឋកិច្ច​ឆ្លើយតប​នឹង​វិបត្តិ​កូវីដ​ ១៩»​។

លោក Pablo Kang លើកឡើង​ថា រដ្ឋាភិបាល​អូស្ត្រាលី​ប្តេជ្ញា​ក្នុង​ការគាំទ្រ​ដល់​ដំណើរការអភិវឌ្ឍ​សេដ្ឋកិច្ច​នៅ​កម្ពុជា ពិសេស​ការលើកកម្ពស់​ផលិតភាព​ក្នុង​វិស័យ​កសិកម្ម តាមរយៈ​ការរួម​គ្នា​ជំរុញ​ការវិនិយោគ​ក្នុង​វិស័យ​កសិ​-ចំណីអាហារ​។

លោក​និយាយថា​៖ «​ការផ្តល់​ហិរញ្ញប្បទាន​ដល់​ការប្រតិបត្តិ​របស់​តុ​វិនិយោគ​កសិ-ចំណីអាហារ​របស់ CDC នាពេលនេះ គឺជា​ការចូលរួម​បន្ថែមទៀត​របស់​អូស្ត្រាលី​ក្នុង​ការជួយ​បំពេញបន្ថែម​ដល់​កិច្ចខិតខំ​ប្រឹងប្រែង​របស់​រដ្ឋាភិបាល​កម្ពុជា​ក្នុង​ការជំរុញ និង​ថែរក្សា​ការវិនិយោគ​ក្នុង​វិស័យ​កសិកម្ម កសិ-ធុរកិច្ច និង​កសិ-ចំណីអាហារ​»​។

គិត​ត្រឹម​ខែសីហា ឆ្នាំ​ ២០២១ CDC បានសម្រេច​បញ្ជី​គម្រោង វិនិយោគ​ក្នុង​វិស័យ​កសិកម្ម និង​កសិ-ឧស្សាហកម្ម​ចំនួន ៣៧៦ ​ជាមួយនឹង​ទុនវិនិយោគ​ ៩,៧ ​ពាន់​លាន​ដុល្លារ​។ នេះ​បើ​យោងតាម CDC៕ LA

អត្ថបទគួរចាប់អារម្មណ៍