កាលពីសប្តាហ៍មុនតម្លៃប្រេងឆៅបានប្រែប្រួលក្នុងចន្លោះពី ៦៩,៣២ ដល់ ៧៦ ដុល្លារក្នុង ១ បារ៉ែល។ ការកើនឡើងនេះអាចនឹងបន្ត ខណៈសេដ្ឋកិច្ចពិភពលោកមានភាពប្រសើរឡើង ស្របពេលការផ្គត់ផ្គង់ទូទាំងពិភពលោកត្រូវបានរឹតបន្តឹង ដោយសារតែការស្ទុះងើបឡើងវិញនៃតម្រូវការប្រេងឥន្ធនៈ ហើយផលប៉ះពាល់នៃព្យុះ IDA បានបង្កផលប៉ះពាល់ដល់ផលិតកម្មប្រេងនៅអាមេរិក។
កាលពីថ្ងៃអង្គារសប្ដាហ៍នេះ គេហទំព័រ Investing.com បានរាយការណ៍ថា៖ «គិតត្រឹមថ្ងៃចន្ទ តម្លៃប្រេងបានកើនឡើង ៥ ថ្ងៃជាប់ៗគ្នា។ ចំពោះប្រេងប្រភេទ Brent បានឡើងរយៈពេល ៣ សប្តាហ៍ជាប់គ្នា និងមានអត្រាខ្ពស់បំផុតបើគិតចាប់ពីខែតុលាឆ្នាំ ២០១៨ មក ហើយកំពុងមានទំនោរឆ្ពោះទៅរកតម្លៃ ៨០ ដុល្លារ។ ចំណែកប្រេងឆៅប្រភេទកិច្ចសន្យាអនាគត (US Crude Futures) បានកើនឡើងដល់ ៧៥.៤៥ ដុល្លារដែលជាតម្លៃខ្ពស់បំផុតបើរាប់ចាប់ពីខែកក្កដាមក»។
បន្ថែមពីនេះ គេហទំព័រ Dailyfx.com ក៏បានរាយការណ៍ដែរថា៖ «ក្នុងរយៈពេលប៉ុន្មានសប្តាហ៍ចុងក្រោយនេះតម្លៃប្រេងបានបន្តដំណើរតាមទិសដៅកើនឡើង ខណៈកង្វះខាតទំនិញនៅតែជាកង្វល់សំខាន់សម្រាប់សេដ្ឋកិច្ចពិភពលោក។ ម្យ៉ាងទៀត ស្របពេលកម្មវិធីចាក់វ៉ាក់សាំងបន្តទទួលបានលទ្ធផលល្អ វិបត្តិថាមពលរបស់អឺរ៉ុប និងចិន គឺជាកត្ដាដែលធ្វើឱ្យតម្លៃប្រេងកើនឡើងក្នុងរយៈពេល ១ ខែចុងក្រោយនេះ។ បូករួមនឹងសម្ពាធអតិផរណាដែលកំពុងកើនឡើងទៀតសោត វាក៏ជាកត្តាដែលអាចជំរុញឱ្យតម្លៃប្រេងឆៅប្រភេទ Brent កើនដល់ ៨០ ដុល្លារបានផងដែរ»។
យោងតាមព័ត៌មានខាងលើ វិនិយោគិនអាចនឹងយល់ឃើញថា តម្លៃប្រេងឆៅអាចធ្លាក់ចុះបានលុះត្រាតែប្រទេសមហាអំណាច និងអង្គការ OPEC+ មានវិធានការលើការដំឡើងអត្រាទិន្នផលផលិតប្រេងឆៅណាមួយដែលមានប្រសិទ្ធភាព។ ដូច្នេះ សម្រាប់ការវិភាគជួញដូរនៅក្នុងសប្តាហ៍នេះ វិនិយោគិនគួរតែពិចារណាទិញប្រេងឆៅក្នុងចន្លោះតម្លៃ ៧២ ដុល្លារ ទៅ ៨០ ដុល្លារ៕