The Phnom Penh Post Search

Search form

Logo of Phnom Penh Post newspaper Phnom Penh Post - ច្រកព្រំដែន​ស្ទឹងបត់-បាណងអៀន នឹង​បើក​ជា​បណ្តោះអាសន្ន​ឆាប់ៗ




ច្រកព្រំដែន​ស្ទឹងបត់-បាណងអៀន នឹង​បើក​ជា​បណ្តោះអាសន្ន​ឆាប់ៗ

Content image - Phnom Penh Post
ច្រកព្រំដែន​ស្ទឹងបត់-បាណងអៀន នឹង​បើក​ជា​បណ្តោះអាសន្ន​ឆាប់ៗ។ រូបថត MPWT

ច្រកព្រំដែន​ស្ទឹងបត់-បាណងអៀន នឹង​បើក​ជា​បណ្តោះអាសន្ន​ឆាប់ៗ

ភ្នំពេញៈ កម្ពុជា-ថៃ បាន​ឯកភាព​គ្នា​នឹង​បើក​ច្រកទ្វារព្រំដែន​អន្តរជាតិ​ស្ទឹងបត់​ (​កម្ពុជា​) និង​បាណងអៀន​ (​ថៃ​)​ ជា​បណ្តោះអាសន្ន​នាពេល​ឆាប់ៗ​នេះ​តាម​សំណើ​របស់​រដ្ឋាភិបាល​កម្ពុជា ដើម្បី​ជំរុញ​ពាណិជ្ជកម្ម​ទ្វេភាគី​។

លោក Jurin Laksanawisit រដ្ឋមន្ត្រីក្រសួង​ពាណិជ្ជកម្ម​ថៃ​បាន​ឱ្យដឹង​កាលពី​ថ្ងៃ​ពុធ​ថា ប្រទេស​ថៃ​បាន​យល់ព្រម​បើក​ច្រក​ឆ្លងកាត់​ថ្មី​នេះ​ជាមួយនឹង​ប្រទេស​កម្ពុជា ដើម្បី​ជំរុញ​ពាណិជ្ជកម្ម​។ ច្រក​ឆ្លងកាត់​គឺ​ស្ថិតនៅត្រង់​ស្ពាន​មិត្តភាព ស្ទឹងបត់-បាណងអៀន​នៅក្នុង​ខេត្ត​ស្រះកែវ​នឹង​បើក​ដំណើរការ​មុនពេល​កំណត់ ខណៈ​ប្រទេស​មិនទាន់បាន​បញ្ចប់​ការសាងសង់​ប៉ុស្តិ៍​ត្រួតពិនិត្យ​របស់ខ្លួន​នៅឡើយ​។ នេះ​បើតាម​សារព័ត៌មាន The Nation Thailand ចេញផ្សាយ​កាលពី​ថ្ងៃទី​ ២៩ ខែកញ្ញា​។

លោក Jurin ឱ្យដឹងថា​៖ «​ក្នុងអំឡុងពេល​នេះ ការដឹកជញ្ជូន​ទំនិញ​តាម​កុងតឺន័រ​នឹង​អនុញ្ញាតឱ្យ​ឆ្លងកាត់​ច្រក​ត្រួតពិនិត្យ Ning Ian ប៉ុណ្ណោះ​»​។

លោក វ៉ា ស៊ឹមសុរិយា អ្នកនាំពាក្យ​ក្រសួង​សាធារណការ និង​ដឹកជញ្ជូន​ប្រាប់​ភ្នំពេញ​ប៉ុស្តិ៍​ក្នុង​ថ្ងៃទី​ ៣០ ខែកញ្ញា​ថា ការស្នើសុំ​ភាគី​ថៃ​បើក​ច្រកព្រំដែន​ស្ទឹងបត់-បាណងអៀន គឺជា​គំនិត​ផ្តួចផ្តើម​របស់​ក្រសួង​សាធារណការ និង​ដឹកជញ្ជូន ដោយ​មានការ​សម្របសម្រួល​ពី​អភិបាលខេត្ត​បន្ទាយមានជ័យ ជាមួយនឹង​អភិបាលខេត្ត​ស្រះកែវ​របស់​ថៃ​។ ការយល់ព្រម​បើក​ច្រក​ព្រំដែន​ជា​បណ្តោះអាសន្ន​របស់​ភាគី​ថៃ​ត្រូវបាន​ធ្វើឡើង​ឆ្លើយ​នឹង​សំណើ​របស់​កម្ពុជា​ដែល​ផ្ញើ​ទៅ​ភាគី​ថៃ​កាលពី​អំឡុង​ខែមិថុនា កន្លងទៅ​។

លោក​ប្រាប់ថា​៖ «​យើង​បាន​បង្កើត​ការិយាល័យ​ច្រកទ្វារ​អន្តោប្រវេសន៍​ស្ទឹងបត់​រួចហើយ​។ ចំពោះ​ផ្នែក​គយ​យើង​នឹង​យក​មន្ត្រី​ពី​ខាង​ព្រំដែន​ប៉ោយប៉ែត​ទៅ ព្រោះ​យើង​មាន​ម៉ាស៊ីន​ស្គេន​នៅ​ទីលាន​ស្ទឹងបត់​ហើយ​។ ខ្ញុំ​ក៏​មិនដឹងថា​លទ្ធភាព​បើក​ច្រក​ជា​បណ្តោះអាសន្ន​នេះ​នៅពេល​ណា​ទេ ព្រោះ​ក្នុង​ស្ថានភាព​ការរីក​រាលដាល​កូវីដ​ ១៩ ហើយ​ភាគី​ថៃ​កំពុង​រៀបចំ​រដ្ឋបាលខេត្ត​ស្រះកែវ​ថ្មី ប៉ុន្តែ​យើង​ត្រៀមខ្លួន​រួចរាល់​ហើយ​សម្រាប់​បើក​បណ្តោះអាសន្ន​»​។

លោក ស៊ិន ចន្ទី ប្រធាន​សមាគម​ភ័ស្តុភារកម្ម​កម្ពុជា​បាន​ស្វាគមន៍​ចំពោះ​រដ្ឋាភិបាល​ថៃ និង​រដ្ឋាភិបាល​កម្ពុជា​មាន​ការឯកភាព​គ្នា​បើក​ច្រក​​ព្រំដែន​នេះ​ជា​បណ្តោះអាសន្ន​នេះ​។

លោក​និយាយថា​៖ «​ខ្ញុំ​គិតថា​ការបើ បើក​ច្រក​ត្រូវបាន​បើក​នឹង​សម្រួល​ដល់​ការដឹកជញ្ជូន​ទំនិញ​នៅឯ​ច្រកព្រំដែន​ប៉ោយប៉ែត​ដែល​មាន​ការកកស្ទះ​កន្លងមក​។ យើង​ឃើញថា ច្រក​ប៉ោយប៉ែត​ទាំង​អ្នកដំណើរ និង​ទំនិញ​ឆ្លងកាត់​តាម​ទៅ​ផ្លូវ​តែមួយ​ដែលនាំឱ្យ​កកស្ទះ​។ ពេល​ច្រក​ស្ទឹងបត់ បាណងអៀន​បើក​ជា​បណ្តោះអាសន្ន យើង​បង្ក​ភាពប្រសើរឡើង​នៃ​ការដឹកជញ្ជូន​ទំនិញ ហើយ​សកម្មភាព​ដឹកជញ្ជូន​នឹង​លឿន​រហ័ស​ជាង​មុន​»​។

ទំហំ​ពាណិជ្ជកម្ម​ទ្វេភាគី​កម្ពុជា-ថៃ ឆ្នាំ​ ២០២០ មានតម្លៃ ៧ ២៣៦ ​លាន​ដុល្លារ ធ្លាក់ ២៣,១៧ ​ភាគរយ​ធៀប​ឆ្នាំ​ ២០១៩​។ ការធ្លាក់ចុះ​នេះ គឺ​ដោយសារ​ផលរំខាន​ពី​កូវីដ​ ១៩​។ នេះ​បើតាម​ក្រសួង​ពាណិជ្ជកម្ម​ថៃ​៕ LA

អត្ថបទគួរចាប់អារម្មណ៍