ភ្នំពេញៈ ក្រុមហ៊ុនធានារ៉ាប់រង FWD Group ដែលមានមូលដ្ឋានស្នាក់ការកណ្តាលនៅទីក្រុងហុងកុងបានប្រកាសពីការឈានជើងចូលទីផ្សារហិរញ្ញវត្ថុនៅប្រទេសកម្ពុជា ដែលជាទីផ្សារទី ១០ របស់ខ្លួនក្នុងទ្វីបអាស៊ី ដោយបង្កើតក្រុមហ៊ុនបុត្រសម្ព័ន្ធរបស់ខ្លួន គឺ «FWD Cambodia»។
ក្រុមហ៊ុនមួយនេះបានឱ្យដឹងថា ដំណើរមកកាន់ប្រទេសកម្ពុជានេះសបញ្ជាក់ពីការរីកលូតលាស់របស់ក្រុមហ៊ុន FWD ទូទាំងតំបន់ និងបានបង្ហាញពីការប្តេជ្ញាចិត្តដើម្បីក្លាយជាក្រុមហ៊ុនធានារ៉ាប់រងនាំមុខគេនៅអាស៊ីតាមរយៈការផ្ដល់ជូននូវបទពិសោធថ្មីលើសេវាធានារ៉ាប់រង ព្រមទាំងគុណតម្លៃជាច្រើនបន្ថែមទៀតដល់អតិថិជន។
លោក Huynh ThanhPhong អគ្គនាយកក្រុមហ៊ុន FWD បានឱ្យដឹងថា កម្ពុជាបានក្លាយជាប្រទេសមួយក្នុងចំណោមប្រទេសដែលមានសេដ្ឋកិច្ចរីកចម្រើនបំផុតក្នុងតំបន់។
លោក Huynh ថ្លែងថា៖ «យើងសម្លឹងឃើញឱកាសជាច្រើនក្នុងការការពារ និងការផ្តល់ជូននូវស្ថិរភាពហិរញ្ញវត្ថុទៅដល់ប្រជាជនកម្ពុជា ហើយខ្ញុំប្រាកដក្នុងចិត្តថា ក្រុមការងាររបស់យើងនៅទីនេះនឹងទទួលបានជោគជ័យក្នុងការផ្ដល់នូវបទពិសោធថ្មីលើសេវាធានារ៉ាប់រងជូនប្រជាជនកម្ពុជា»។
លោក ចាន់ រដ្ឋា នាយកប្រតិបត្តិក្រុមហ៊ុន FWD Cambodia បានឱ្យដឹងថា ក្រុមហ៊ុននឹងនាំយកបច្ចេកវិទ្យា និងបទពិសោធថ្មីៗកាន់តែច្រើន ដើម្បីរួមចំណែកដល់ការអភិវឌ្ឍឧស្សាហកម្មធានារ៉ាប់រងនៅកម្ពុជា។
លោកថ្លែងថា៖ «យើងខ្ញុំសូមថ្លែងអំណរគុណយ៉ាងជ្រាលជ្រៅចំពោះនិយតករធានារ៉ាប់រងកម្ពុជា សម្រាប់ការស្វាគមន៍ដ៏កក់ក្ដៅ និងការណែនាំ ក៏ដូចជាការផ្ដល់នូវទំនុកចិត្តខ្ពស់មកលើយើងខ្ញុំជាពិសេសសម្រាប់ការបង្កើតឱ្យមាននូវរចនាសម្ព័ន្ធផ្នែកច្បាប់ដ៏ល្អដែលខ្ញុំជឿជាក់ថានឹងអនុញ្ញាតឱ្យ FWD Cambodia ក៏ដូចជាវិស័យធានារ៉ាប់រងទាំងមូលទទួលបានជោគជ័យ»។
លោកបញ្ជាក់៖ «អនាគតរបស់ FWD នៅក្នុងប្រទេសកម្ពុជា នឹងរឹតតែមានភាពត្រចះត្រចង់ ហើយខ្ញុំជឿជាក់ថាយើងនឹងសម្រេចបាននូវសមិទ្ធផលជាច្រើនជាមួយក្រុមការងាររបស់យើង។ យើងនឹងផ្តល់ជូនប្រជាជនកម្ពុជានូវបទពិសោធថ្មីមួយលើសេវាធានារ៉ាប់រងដែលអាចជួយឱ្យពួកគាត់រស់នៅដោយភាពរីករាយ»។
យោងតាមសមាគមធានារ៉ាប់រងកម្ពុជា (IAC) វិស័យធានារ៉ាប់រងនៅកម្ពុជាទទួលបានប្រាក់បុព្វលាភ សរុបចំនួន ៨៥ លានដុល្លារនៅត្រីមាសទី ១ ឆ្នាំនេះកើនឡើង ១៦,៣ ភាគរយ ធៀបនឹងរយៈពេលដូចគ្នាកាលពីឆ្នាំមុន។
ក្នុងចំណោមនោះ ប្រាក់បុព្វលាភធានារ៉ាប់រងទូទៅមានចំនួន ៣៩,១ លានដុល្លារកើនឡើង ១៩,៥ ភាគរយ និង ប្រាក់បុព្វលាភធានារ៉ាប់រងអាយុជីវិតមានចំនួន ៤៤,៦ លានដុល្លារ កើនឡើង ១៥,៥ ភាគរយធៀបនឹងរយៈពេលដូចគ្នាកាលពីឆ្នាំមុន និងប្រាក់បុព្វលាភធានារ៉ាប់រងទូទៅមានចំនួន ៤៦ ភាគរយ និងប្រាក់បុព្វលាភធានារ៉ាប់រងអាយុជីវិតមាន ៥៣ ភាគរយនៃចំនួនសរុប។
ប្រាក់បុព្វលាភធានារ៉ាប់រងខ្នាតតូចមាន ១,២ លានដុល្លារ ធ្លាក់ចុះ ២៦,៧ ភាគរយធៀបនឹងរយៈពេលដូចគ្នាកាលពីឆ្នាំមុន និងមាន ១,៤ ភាគរយនៃចំនួនសរុប។ នេះបើយោងតាម IAC។
វិស័យធានារ៉ាប់រងបានចំណាយលើប្រាក់សំណងប្រហែល ១១,៣ លានដុល្លារក្នុងខែមករាដល់ខែមីនា ជាមួយនឹងការធានារ៉ាប់រងទូទៅមាន ៩,១ លានដុល្លារ ការធានារ៉ាប់រងអាយុជីវិតមាន ២,១ លានដុល្លារ និងការធានារ៉ាប់រងខ្នាតតូចមាន ០,២ លានដុល្លារ។
បច្ចុប្បន្នកម្ពុជាមានក្រុមហ៊ុនធានារ៉ាប់រង ៣៣ ក្នុងនោះក្រុមហ៊ុនធានារ៉ាប់រងទូទៅ ១៦ ធានារ៉ាប់រងអាយុជីវិត ១១ និងធានារ៉ាប់រងខ្នាតតូច ៥ និងក្រុមហ៊ុនធានារ៉ាប់រងបន្តចំនួន ១៕LA