.jpg)
ការិយាល័យរបស់ ក្រុមប្រឹក្សាអភិវឌ្ឍន៍កម្ពុជា (CDC) ក្នុងខណ្ឌដូនពេញ។ ហេង ជីវ័ន
ភ្នំពេញៈ គម្រោងវិនិយោគចំនួន ២ ដែលមានទុនវិនិយោគសរុប ៣៣,១លានដុល្លារត្រូវបានក្រុមប្រឹក្សាអភិវឌ្ឍន៍កម្ពុជា (CDC) អនុម័ត ដោយគម្រោងទាំងនេះអាចបង្កើតការងារបានសរុប ១ ១១៨ កន្លែង។ នេះបើតាមសេចក្តីប្រកាសព័ត៌មានរបស់ CDC កាលពីថ្ងៃទី ៣០ ខែកញ្ញា។
CDC ឱ្យដឹងថា យោងតាមសំណើសុំវិនិយោគលើគម្រោងបង្កើតរោងចក្រផលិតកាបូបគ្រប់ប្រភេទរបស់ក្រុមហ៊ុន Xin Xingle Leather Products Co., Ltd គណៈកម្មាធិការវិនិយោគកម្ពុជានៃក្រុមប្រឹក្សាអភិវឌ្ឍន៍កម្ពុជា បានសម្រេចចេញវិញ្ញាបនបត្រចុះបញ្ជីជាស្ថាពរជូនដល់ក្រុមហ៊ុនខាងលើ ដែលមានទីតាំងវិនិយោគនៅក្រុងច្បារមន ខេត្តកំពង់ស្ពឺ មានទុនវិនិយោគប្រមាណ ៣,១ លានដុល្លារ និងអាចបង្កើតការងារបាន ៦១៨ កន្លែង។
ដោយឡែក គណៈកម្មាធិការតំបន់សេដ្ឋកិច្ចពិសេសកម្ពុជានៃក្រុមប្រឹក្សាអភិវឌ្ឍន៍កម្ពុជា ក៏បានសម្រេចចេញវិញ្ញាបនបត្រចុះបញ្ជីជាស្ថាពរ ជូនដល់ក្រុមហ៊ុន Solar Long Pv-Tech (Cambodia) Co., Ltd. ដែលបានដាក់ពាក្យស្នើសុំវិនិយោគលើគម្រោងបង្កើតរោងចក្រផលិត និងផ្គុំដំឡើងបន្ទះសូឡា និងគ្រឿងបង្គុំ មានទីតាំងនៅក្នុងតំបន់សេដ្ឋកិច្ចពិសេសភ្នំពេញ, មានទុនវិនិយោគ ៣០លានដុល្លារ និងបង្កើតការងារបានចំនួន ៥០០ កន្លែង។
ក្រុមប្រឹក្សាអភិវឌ្ឍន៍កម្ពុជា (CDC) បានអនុម័តគម្រោងចំនួន ៧០ ក្រោមទុនវិនិយោគសរុប ២ ៤២៨ លានដុល្លារ ក្នុងឆមាសទី១ ឆ្នាំ ២០២១។ នេះបើយោងតាមការគណនាដោយកាសែត ភ្នំពេញប៉ុស្តិ៍ ចំពោះគម្រោងត្រូវបាន CDC បង្ហោះលើទំព័រហ្វេសប៊ុកផ្លូវការចាប់ពីខែមករា ដល់ដំណាច់ខែមិថុនា ឆ្នាំ ២០២១៕
