ភ្នំពេញៈ ក្រសួងពាណិជ្ជកម្ម បានអំពាវនាវដល់ធុរជនឱ្យចូលរួមការតាំងពិព័រណ៍ផ្នែកសិប្បកម្ម និងឧស្សាហកម្ម ឆ្នាំ ២០២១ (Metal Cutting, Forming & Welding EXPO 2021) តាមរយៈប្រព័ន្ធអនឡាញដែលនឹងប្រព្រឹត្តទៅចាប់ពីពាក់កណ្តាលខែតុលាតទៅ។ នេះបើតាមសេចក្តីជូនដំណឹងរបស់ក្រសួងពាណិជ្ជកម្ម។
សេចក្តីជូនដំណឹងបន្តថា ក្រុមប្រឹក្សាជំរុញការនាំចេញផ្នែកវិស្វកម្មឥណ្ឌា (EEPC) គាំទ្រដោយក្រសួងពាណិជ្ជកម្ម និងឧស្សាហកម្ម ប្រទេសឥណ្ឌា នឹងរៀបចំពិធីតាំងពិព័រណ៍ផ្នែកសិប្បកម្ម និងឧស្សាហកម្ម ឆ្នាំ ២០២១ ដែលនឹងប្រព្រឹត្តទៅពីថ្ងៃទី១៨ ដល់ថ្ងៃទី២៩ ខែតុលា ឆ្នាំ២០២១។
ក្នុងឱកាសតាំងពិព័រណ៍នេះ ក្រុមប្រឹក្សាជំរុញការនាំចេញផ្នែកវិស្វកម្មឥណ្ឌា (EEPC) សូមអញ្ជើញក្រុមហ៊ុនកម្ពុជា ដែលកំពុងធ្វើធុរកិច្ចលើផ្នែកសិប្បកម្ម និងឧស្សាហកម្មពាក់ព័ន្ធនឹងការកាត់ ផ្សារ ដំឡើងដែក ដើម្បីចូលរួមក្នុងព្រឹត្តិការណ៍ពិព័រណ៍ខាងលើ និងចូលរួមកម្មវិធីជំនួបពាណិជ្ជកម្មតាមប្រព័ន្ធអនឡាញ (Webinars – B2B) នៅថ្ងៃទី២៩ ខែតុលា ឆ្នាំ២០២១។
ក្រសួងពាណិជ្ជកម្ម ក្នុងនាមជាអ្នកសម្របសម្រួល ជាមួយស្ថានទូតឥណ្ឌាប្រចាំនៅទីក្រុងភ្នំពេញ សូមអញ្ជើញលោក លោកស្រីដែលជាសិប្បករ ឧស្សាហករ និងសាធារណជនទូទៅដែលមានចំណាប់អារម្មណ៍ចង់ចូលរួមក្នុងព្រឹត្តិការណ៍ពិព័រណ៍ខាងលើ សូមចូលទៅគេហទំព័រ https://eepcvirtualexpo.com/metalcutting-2021 ឬ បំពេញបែបបទចុះឈ្មោះចូលរួមតាមរយៈ https://eepcvirtualexpo.com/visitor/ovex visitor registration form/