ភ្នំពេញៈ «សេចក្តីព្រាងច្បាប់ស្តីពីភាពជាដៃគូរវាងរដ្ឋ និងឯកជន (ភ.រ.ជ)» ត្រូវបានគណៈរដ្ឋមន្ត្រីកម្ពុជាអនុម័តទាំងស្រុង ខណៈច្បាប់នេះត្រូវរំពឹងថា នឹងក្លាយជាក្របខ័ណ្ឌគតិយុត្តដ៏សំខាន់ក្នុងការបង្កើនភាពទាក់ទាញចំពោះវិស័យឯកជនពីបរទេស និងក្នុងស្រុកឱ្យបញ្ចេញទុនវិនិយោគនៅកម្ពុជា និងដើម្បីចូលរួមជំរុញការអភិវឌ្ឍគម្រោងវិនិយោគសាធារណៈ តាមយន្តការ ភ.រ.ជ ដែលជាតម្រូវការចាំបាច់ក្នុងការទ្រទ្រង់ចីរភាពកំណើនសេដ្ឋកិច្ចរយៈពេលវែង, ការបង្កើនសមត្ថភាពប្រកួតប្រជែង, និងការធ្វើពិពិធកម្មមូលដ្ឋានសេដ្ឋកិច្ចកម្ពុជា។
លោកនាយករដ្ឋមន្ត្រី ហ៊ុន សែន ក្នុងឱកាសដឹកនាំកិច្ចប្រជុំគណៈរដ្ឋមន្ត្រីនាថ្ងៃទី ៨ ខែតុលា នេះបានថ្លែងថា សេចក្តីព្រាងច្បាប់នេះ មានសារៈសំខាន់ណាស់ក្នុងការលើកកម្ពស់កំណើនសេដ្ឋកិច្ចកម្ពុជា ពិសេសបន្ទាប់ពីស្ថានភាពជំងឺកូវីដ ១៩ មានភាពធូរស្រាល។ នៅពេលនេះទាំងស្ថាប័ន IMF ធនាគារពិភពលោក (WB) និងស្ថាប័នហិរញ្ញវត្ថុដទៃទៀតសុទ្ធតែបានព្យាករណ៍ដំឡើងអត្រានៃកំណើនសេដ្ឋកិច្ចកម្ពុជា ដែលពីមុនមានប្រមាណត្រឹម ១,៨ ភាគរយក្នុងឆ្នាំ ២០២១ នេះនឹងបានដំឡើងដល់ ២,២ ភាគរយ។
លោកថ្លែងថា៖ «ឥឡូវនេះគេបានព្យាករណ៍ថា (កំណើនសេដ្ឋកិច្ច) នឹងឡើងដល់ ២,២ ភាគរយវិញ ប៉ុន្តែបើរយៈពេល ២ ខែចុងក្រោយឆ្នាំនេះ យើងអាចបើកបាន ជាពិសេសទេសចរណ៍ផ្ទៃក្នុង និងសេវាកម្មដទៃទៀត កំណើនសេដ្ឋកិច្ច នឹងអាចកើនលើសពីហ្នឹងបន្តិច។ ចំណូលថវិកាជាតិនឹងអាចវិលត្រឡប់មកកាន់ស្ថានភាពល្អប្រសើរ»។
អ្នកនាំពាក្យរាជរដ្ឋាភិបាលកម្ពុជា លោក ផៃ ស៊ីផាន បានឱ្យដឹងថា សេចក្តីព្រាងច្បាប់ស្តីពីភាពជាដៃគូរវាងរដ្ឋ និងឯកជន (ភ.រ.ជ) នឹងក្លាយជាក្របខ័ណ្ឌគតិយុត្តដ៏សំខាន់មួយក្នុងការបង្កើតបរិស្ថានអំណោយផល ដើម្បីបន្តជំរុញការចូលរួមរបស់វិស័យឯកជនក្នុងការអភិវឌ្ឍហេដ្ឋារចនាសម្ព័ន្ធសាធារណៈ និងផ្តល់សេវាសាធារណៈឱ្យកាន់តែប្រសើរ សំដៅជំរុញកំណើនសេដ្ឋកិច្ចឡើងវិញ នៅក្រោយពេលដែលវិបត្តិជំងឺកូវីដ ១៩ ថមថយ និងពង្រឹងភាពប្រកួតប្រជែងរបស់កម្ពុជានៅក្នុងតំបន់ និងសកលលោក។
លោកបន្តថា កាលពីឆ្នាំ ២០១៥ ក្រសួងសេដ្ឋកិច្ច និងហិរញ្ញវត្ថុទទួលបានការអនុញ្ញាត ដើម្បីដឹកមុខលើការងាររៀបចំក្របខ័ណ្ឌគោលនយោបាយ យុទ្ធសាស្ត្រ និងគតិយុត្តសម្រាប់គ្រប់គ្រង រៀបចំ និងអនុវត្តគម្រោងវិនិយោគសាធារណៈ តាមយន្តការភាពជាដៃគូរវាងរដ្ឋ និងឯកជន។ នៅក្នុងកិច្ចដំណើរការរៀបចំសេចក្តីព្រាងច្បាប់នេះ ក្រសួងសេដ្ឋកិច្ច និងហិរញ្ញវត្ថុ ក៏ទទួលបានការគាំទ្របច្ចេកទេសពីជំនាញការផ្នែកច្បាប់របស់ ADB ចាប់តាំងពីឆ្នាំ ២០១៧។
លោកបន្តថា សេចក្តីព្រាងច្បាប់ ភ.រ.ជ ត្រូវបានរៀបចំឡើងក្នុងបរិការណ៍សំខាន់ៗមួយចំនួន ដូចជា ការថយចុះហិរញ្ញប្បទានឥតសំណងលើសកលលោក និងការបាត់បង់ជាបណ្ដើរៗនូវឥណទានសម្បទានកម្រិតខ្ពស់របស់កម្ពុជានាពេលអនាគត, ប្រភពធនធានថវិកាជាតិនៅមានកម្រិត ប៉ុន្តែតម្រូវការទុនវិនិយោគសាធារណៈមានទំហំកាន់តែធំជាលំដាប់, វិបត្តិជំងឺកូវីដ ១៩ កំពុងយាយី និងបង្កផលប៉ះពាល់អវិជ្ជមានដល់សមិទ្ធផលសង្គម-សេដ្ឋកិច្ចដែលកម្ពុជាសម្រេចបាននាពេលកន្លងមក និងបន្ទុចបង្អាក់ដល់ដំណើរការអភិវឌ្ឍរបស់កម្ពុជា ជាពិសេសអាចនឹងពន្យារពេលនៃការឈានទៅសម្រេចបាននូវចក្ខុវិស័យកម្ពុជាក្នុងការប្រែក្លាយជាប្រទេសមានចំណូលមធ្យមកម្រិតខ្ពស់នៅឆ្នាំ ២០៣០ និងជាប្រទេសចំណូលខ្ពស់នៅឆ្នាំ ២០៥០, កិច្ចខិតខំប្រឹងប្រែងក្នុងការបញ្ចៀសកម្ពុជាកុំឱ្យធ្លាក់ផុងទៅក្នុង «អន្ទាក់នៃថ្លៃ» ដែលអាចកើតឡើងតាមរយៈការចុះកិច្ចសន្យាដែលមានរយៈពេលវែង ដោយមិនមានការពិនិត្យ និងវាយតម្លៃត្រឹមត្រូវ និងហ្មត់ចត់, និងការជំរុញកំណើន និងការរក្សាជីវភាពសេដ្ឋកិច្ចកម្ពុជា ដោយផ្អែកលើមូលដ្ឋានប្រភពធនធាន និងនវានុវត្តន៍ពីវិស័យឯកជនក្នុងការចូលរួមអភិវឌ្ឍហេដ្ឋារចនាសម្ព័ន្ធសាធារណៈ និងការផ្តល់សេវាសាធារណៈ។
លោកបានបញ្ជាក់ថា៖ «សេចក្តីព្រាងច្បាប់នេះ នឹងបង្កើតក្របខ័ណ្ឌគតិយុត្តមួយដែលមានភាពច្បាស់លាស់ ប្រកបដោយតម្លាភាព និងគណនេយ្យភាព និងបំពេញបន្ថែមនូវនីតិវិធី និងគោលការណ៍ណែនាំចាំបាច់មួយចំនួនទៀត ដែលច្បាប់ស្តីពីសម្បទានមិនមានចែង។ ម្យ៉ាងទៀត សេចក្តីព្រាងច្បាប់នេះ ក៏ដើម្បីធានាថា ដំណើរការរៀបចំអភិវឌ្ឍគម្រោងតាមយន្តការ ភ.រ.ជ នឹងប្រព្រឹត្តទៅដោយអនុលោមតាមក្របខ័ណ្ឌ និងនីតិវិធីរួមមួយ ដែលបានផ្តល់និង/ឬសន្យានឹងផ្តល់ការគាំទ្ររបស់រដ្ឋជាផ្នែកហិរញ្ញវត្ថុ និង/ឬការគាំទ្រផ្សេងទៀត សម្រាប់គម្រោង»៕
