.jpg)
លោក លឹម ហេង អនុប្រធានសភាពាណិជ្ជកម្មកម្ពុជា ក្នុងកិច្ចប្រជុំនាពេលកន្លងមក។ រូបថត CCC
ភ្នំពេញៈ ទឹកប្រាក់ដែលកម្ពុជាទទួលបានពីការនាំចេញទំនិញ (ដកមាស) ក្នុងរយៈពេល ៨ ខែ ឆ្នាំ ២០២១ មានជាង ១១ ពាន់លានដុល្លារ កើនឡើងជាង ២០ ភាគរយបើធៀបនឹងរយៈពេលដូចគ្នាឆ្នាំ ២០២០ ខណៈការនាំចូលទំនិញ (ដកមាស) កើនជាង ២៦ ភាគរយ។ នេះបើយោងតាមទិន្នន័យពីក្រសួងសេដ្ឋកិច្ច និងហិរញ្ញវត្ថុ។
របាយការណ៍និន្នាការសេដ្ឋកិច្ច-សង្គម បង្ហាញថា ចាប់ពីខែមករា ដល់ខែសីហា ឆ្នាំ ២០២១ ការនាំចេញទំនិញរបស់កម្ពុជា (ដកមាស) សម្រេចបានក្នុងទំហំទឹកប្រាក់ ១១ ០១០ លានដុល្លារ កើន ២០,៤ ភាគរយបើធៀបទៅនឹងរយៈពេលដូចគ្នាឆ្នាំ ២០២០។ កំណើននេះបានមកពីការនាំចេញកង់, គ្រឿងសង្ហារិម, កៅស៊ូ, ក្តារកុងប្លាកេ, សូឡា, ខ្សែភ្លើង,គ្រឿងផ្គុំខ្សែភ្លើង, គ្រឿងអេឡិចត្រូនិក និងផលិតផលកសិផលជាដើម។
ដោយឡែកការនាំចូលទំនិញ (ដកមាស) មានទឹកប្រាក់ ១៤,៦ ពាន់លានដុល្លារ កើន ២៦,៧ ភាគរយ។ កំណើននៃការនាំចូលនេះ ដោយសារការកើនឡើងការនាំចូលក្រណាត់, គ្រឿងសំណង់, ប្រេងឥន្ធនៈ និងទំនិញផ្សេងៗ។
យោងតាមរបាយការណ៍ខាងលើសេដ្ឋកិច្ចកម្ពុជានៅតែបន្តទទួលរងផលប៉ះពាល់ពីវិបត្តិជំងឺកូវីដ ១៩ ជាពិសេសព្រឹត្តិការណ៍សហគមន៍ ២០ កុម្ភៈ ដែលបានអូសបន្លាយរហូតមកដល់បច្ចុប្បន្ន និងបានដាក់សម្ពាធមកលើសូចនាករសំខាន់ៗនៃវិស័យជំរុញកំណើនសេដ្ឋកិច្ច។
ក្រសួងសេដ្ឋកិច្ចអះអាងថា៖ «សេដ្ឋកិច្ចកម្ពុជារំពឹងថា នឹងមានកំណើនវិជ្ជមានក្នុងឆ្នាំ ២០២១ ដោយសារការងើបឡើងវិញនៃស្ថានភាពសេដ្ឋកិច្ចសកល, សេដ្ឋកិច្ចប្រទេសដៃគូពាណិជ្ជកម្មកម្ពុជា បូករួមជាមួយការជំរុញពីវិស័យមួយចំនួន រួមមាន កសិកម្ម, វិស័យកម្មន្តសាលមិនមែនកាត់ដេរ, វិស័យដឹកជញ្ជូន និងគមនាគមន៍ និងលទ្ធភាពនៃការបង្វែរការបញ្ជាទិញ និងរោងចក្រកាត់ដេរពីប្រទេសមីយ៉ាន់ម៉ាមកកាន់ប្រទេសកម្ពុជា»។
អនុប្រធានសភាពាណិជ្ជកម្មកម្ពុជា លោក លឹម ហេង បានប្រាប់ ភ្នំពេញ ប៉ុស្តិ៍ថា ទោះក្នុងអំឡុងពេលកូវីដ ១៩ បន្តការរីករាលដាល ក៏ការធ្វើពាណិជ្ជកម្មអន្តរជាតិរបស់កម្ពុជាមិនបានធ្លាក់ចុះនោះទេ។ លោកបន្តថា ការនាំចេញ និងនាំចូលរបស់កម្ពុជាសុទ្ធតែស្ថិតក្នុងរង្វង់កំណើនជាង ២០ ភាគរយដូចគ្នា នេះជាអត្រាកំណើនល្អ។
លោកបញ្ជាក់ថា៖ «ខ្ញុំនៅតែមានសុទិដ្ឋិនិយមសម្រាប់ពាណិជ្ជកម្មអន្តរជាតិកម្ពុជា ជាពិសេសកំណើននៃការនាំចេញផលិតផលតាមរយៈកិច្ចព្រមព្រៀងពាណិជ្ជកម្មសេរីទ្វេភាគីកម្ពុជា-ចិន និងជាមួយប្រទេសកូរ៉េខាងត្បូងក្នុងពេលឆាប់ៗ»។
កាលពីដើមខែសីហា រដ្ឋាភិបាលកម្ពុជាបានព្យាករថា កំណើនសេដ្ឋកិច្ចរបស់ខ្លួនសម្រាប់ឆ្នាំ ២០២១ នឹងកើនឡើង ២,៥ ភាគរយ។
រដ្ឋមន្ដ្រីក្រសួងសេដ្ឋកិច្ច និងហិរញ្ញវត្ថុ លោក អូន ព័ន្ធមុនីរ័ត្ន ថ្មីៗនេះបាននិយាយថា ផ្អែកលើការធ្លាក់ចុះជាបន្តបន្ទាប់នៃការឆ្លង ការឈឺធ្ងន់ធ្ងរ និងការស្លាប់ដោយសារកូវីដ ១៩ កម្ពុជានឹងបើកសេដ្ឋកិច្ចសង្គមពេញលេញឡើងវិញក្នុងពេលឆាប់ៗ។
ក្នុងឆ្នាំ ២០២០ ការនាំចេញទំនិញរបស់កម្ពុជា មានទឹកប្រាក់សរុប ១៧ ២១៥,៣៧ លានដុល្លារ កើនឡើង ១៦,៧២ ភាគរយបើធៀបទៅនឹងឆ្នាំ ២០១៩ និងការនាំចូល មានចំនួន ១៨ ៥៩០,៤៨ លានដុល្លារ ធ្លាក់ចុះ ៧,៨៤ ភាគរយ។ នេះបើតាមក្រសួងពាណិជ្ជកម្ម៕ LA
