ភ្នំពេញៈ ក្រសួងឧស្សាហកម្ម វិទ្យាសាស្ត្រ បច្ចេកវិទ្យា និងនវានុវត្តន៍បានដាក់ឱ្យដំណើរការជាផ្លូវការកម្មវិធី «ថ្នាលបណ្តុះអាជីវកម្មកម្ពុជាសម្រាប់ការអភិវឌ្ឍផលិតផលចំណីអាហារ» ក្នុងគោលដៅបន្ត និងពង្រឹងការអភិវឌ្ឍធនធានមនុស្សប្រកបដោយគុណភាព សមត្ថភាព ភាពច្នៃប្រឌិត ស្មារតីសហគ្រិនភាព និងនវានុវត្តន៍ សំដៅជំរុញកំណើនសេដ្ឋកិច្ចប្រកបដោយចីរភាព និងបរិយាប័ន្ន។
CBI-Food ដែលបានដាក់ឱ្យដំណើរការផ្លូវការកាលពីថ្ងៃទី ១១ ខែតុលា ឆ្នាំ ២០២១ គឺជាកម្មវិធីមួយដែលជាគំនិតផ្តួចផ្តើមរបស់ក្រសួងឧស្សាហកម្ម វិទ្យាសាស្ត្រ បច្ចេកវិទ្យា និងនវានុវត្តន៍ ដោយការសហការជាមួយជាមួយទីភ្នាក់ងារសហប្រតិបត្តិការអន្តរជាតិអាល្លឺម៉ង់ (GIZ) ស្ថាប័នរដ្ឋ និងសាកលវិទ្យាល័យមួយចំនួន។
រដ្ឋមន្ត្រីក្រសួងឧស្សាហកម្ម វិទ្យាសាស្ត្រ បច្ចេកវិទ្យា និងនវានុវត្តន៍ លោក ចម ប្រសិទ្ធ ដែលជាគណៈអធិបតីក្នុងពិធីដាក់ឱ្យដំណើរការកម្មវិធីនេះ តាមប្រព័ន្ធអនឡាញបានថ្លែងថា CBI-Food ត្រូវបានរៀបចំឡើងដោយមានកិច្ចសហការរវាងរដ្ឋ វិស័យឯកជន អង្គការជាតិ និងសមាគមអាជីវកម្មមួយចំនួន។ សកម្មភាពនេះមានចរិតលក្ខណៈប្រកួតប្រជែងក្នុងគោលដៅបន្ត និងពង្រឹងការអភិវឌ្ឍធនធានមនុស្សប្រកបដោយគុណភាព សមត្ថភាព ភាពច្នៃប្រឌិត ស្មារតីសហគ្រិនភាព និងនវានុវត្តន៍។
លោកបន្តថា រាជរដ្ឋាភិបាលបានយកចិត្តទុកដាក់ខ្ពស់ក្នុងការរក្សាបាននូវកំណើនសេដ្ឋកិច្ចជាតិ ដើម្បីធានាការអភិវឌ្ឍប្រទេសប្រកបដោយចីរភាព ពិសេសក្នុងដំណាក់កាលនៃការរីករាលដាលកូវីដ ១៩ ដែលបង្កវិនាសសកម្មដ៏អាក្រក់ដល់ជីវិតមនុស្ស និងសេដ្ឋកិច្ច។
លោកថ្លែងថា៖ «ផ្អែកលើបរិការណ៍នេះ រដ្ឋាភិបាលបានលើកកម្ពស់សហគ្រាសនៅក្នុងស្រុក (សហគ្រាសធុនតូច និងមធ្យម) ដែលជាវិស័យអាទិភាពមានលទ្ធភាពជួយស្តារស្ថានភាពសេដ្ឋកិច្ចជាតិឱ្យមានភាពប្រសើរឡើងវិញ ដោយកំណត់នូវមុខផលិតផលមួយចំនួនជាទំនិញយុទ្ធសាស្ត្ររបស់រដ្ឋាភិបាលសម្រាប់ផ្គត់ផ្គង់សេចក្តីត្រូវការរបស់ប្រជាជនប្រចាំថ្ងៃ»។
«តាមរយៈនេះ ផលិតផលទាំងអស់ទាមទារចាំបាច់ត្រូវតែមានគុណភាព និងសុវត្ថិភាពដល់អ្នកប្រើប្រាស់។ ដូច្នេះកម្មវិធីថ្នាលបណ្តុះបណ្តាលអាជីវកម្មកម្ពុជានេះ ពិតជាមានសារៈសំខាន់ក្នុងការជួយជ្រោមជ្រែង និងលើកកម្ពស់សហគ្រិនវ័យក្មេងនៅកម្ពុជា ដើម្បីឱ្យពួកគេមានឱកាសបង្ហាញសមត្ថភាព ការបង្កើតគំនិតច្នៃប្រឌិត និងការអភិវឌ្ឍផលិតផលចំណីអាហារឱ្យមានគុណភាពខ្ពស់ និងនវានុវត្តន៍ ស្របតាមស្តង់ដាកម្ពុជា និងអន្តរជាតិ»។ នេះបើតាមលោក ចម ប្រសិទ្ធ។
លោក តែ តាំងប៉ ប្រធានក្រុមប្រឹក្សាភិបាលសម្ព័ន្ធសមាគមសហគ្រាសធុនតូច និងមធ្យមកម្ពុជា និយាយថា សហគ្រាសធុនតូច និងមធ្យមជាច្រើននៅកម្ពុជា កំពុងដំណើរការដោយមិនសូវមានចំណេះដឹងច្បាស់លាស់នៅឡើយ ខណៈផលិតផលក៏មិនសូវមានការកែច្នៃប្រឌិតខ្ពស់នោះទេ។
លោកបានបន្ថែមថា តាមការអង្កេតរបស់លោកនារយៈពេលចុងក្រោយនេះឃើញថា សហគ្រាសទាំងនោះបានខិតខំក្នុងការពង្រឹងសមត្ថភាពខ្លួន តាមរយៈការផលិតផលិតផលដែលមានការកែច្នៃប្រឌិតខ្ពស់ ហើយក៏មានសហគ្រិនជាស្ត្រី និងយុវជនមួយចំនួនបានងាកមកបង្កើតក្រុមហ៊ុនថ្មីៗដោយពួកគេខិតខំស្វែងរកជំនួយ និងបច្ចេកទេស តាមរយៈការសហការជាមួយក្រសួង មន្ទីរ សម្ព័ន្ធសមាគម និងអង្គការក្រៅរដ្ឋាភិបាលដើម្បីធ្វើយ៉ាងណាឱ្យការផលិតរបស់ពួកគេកាន់តែមានគុណភាព និងការគាំទ្រកាន់តែច្រើនថែមទៀត៕ LA