.jpg)
រង្វង់មូលដែលរូបតំណាងសត្វខ្ទីង នៅក្នុងខេត្តមណ្ឌលគិរី។ រូបថត សហការី
ភ្នំពេញៈ ព្រលានយន្តហោះក្នុងស្រុកដែលគ្រោងនឹងអភិវឌ្ឍនៅច្រករបៀងសេដ្ឋកិច្ចភាគខាងជើងនៃខេត្តមណ្ឌលគិរី ក្រោមទុនវិនិយោគ ៨០ លានដុល្លារ អាចនឹងយឺតយ៉ាវជាងផែនការដែលគ្រោងចាប់ផ្តើមសាងសង់ក្នុងឆ្នាំ ២០២១ នេះ ដោយសារតែការរីករាលដាលជំងឺកូវីដ ១៩ ក្នុងសហគមន៍។
លោក ស៊ិន ចាន់សេរីវុត្ថា អ្នកនាំពាក្យរដ្ឋលេខាធិការដ្ឋានអាកាសចរស៊ីវិល បានប្រាប់ភ្នំពេញប៉ុស្តិ៍នៅថ្ងៃទី ១៣ ខែតុលាថា ការពន្យារពេលសាងសង់ព្រលានយន្តហោះនៅខេត្តមណ្ឌលគិរី គឺដោយសារតែការឆ្លងរាលដាលជំងឺកូវីដ ១៩ ក្នុងសហគមន៍ ការបិទខ្ទប់ និងវិធានរឹតត្បឹតការចេញ-ចូល ដែលធ្វើឱ្យការងារយឺតយ៉ាវ។
លោកបានថ្លែងថា៖ «ខ្ញុំចង់ជម្រាបថា ប្រទេសយើងគឺមិនបានបិទការហោះហើរពីបណ្តាប្រទេសណានោះទេ ប៉ុន្តែនៅប្រទេសចិនគេរឹតបន្តឹងការធ្វើដំណើរ និងតម្រូវឱ្យធ្វើចត្តាឡីស័ករយៈពេល ២ សប្តាហ៍នៅប្រទេសយើងសិន និងធ្វើតេស្តមុននឹងចេញដំណើរទៅប្រទេសចិនវិញ ហើយក៏ត្រូវទទួលស្គាល់ដោយទូតចិន។ នៅពេលទៅដល់ប្រទេសចិន គេត្រូវធ្វើចត្តាឡីស័ក ២ សប្តាហ៍ ហើយនៅពេលចេញពីចត្តាឡីស័ក គឺត្រូវនៅផ្ទះ ១ សប្តាហ៍ទៀត»។
«ដូច្នេះកត្តាទាំងនេះហើយដែលធ្វើឱ្យប៉ះពាល់ និងមានការលំបាកដល់អ្នកជំនាញការរបស់ចិនក្នុងការចុះមកធ្វើការចេញចូលប្រទេសយើង និងប្រទេសចិន។ យើងសង្ឃឹមថានៅពេលវិធានការរឹតបន្តឹងទាំងឡាយត្រូវបានបន្ធូរបន្ថយ ពួកគេនឹងចាប់ផ្តើមដំណើរការវិញ»។ នេះបើយោងតាមការថ្លែងរបស់លោក ចាន់ សេរីវុត្ថា។
កាលពីថ្ងៃទី ៣១ ខែធ្នូ រដ្ឋាភិបាលបានសម្រេចជាគោលការណ៍អនុញ្ញាតឱ្យក្រុមហ៊ុន Power China International Group Ltd (PIG) ធ្វើការសិក្សា និងអភិវឌ្ឍសំណើសាងសង់ព្រលានយន្តហោះមួយនេះ។ ព្រលានយន្តហោះនេះនឹងត្រូវសាងសង់លើផ្ទៃដីទំហំ ៣០០ ហិកតា។ នេះបើតាមលោក ចាន់សេរីវុត្ថា ។
កាលពីខែមីនា ក្រុមហ៊ុន PIG បានបញ្ចប់ការសិក្សាលទ្ធភាពសម្រាប់ការអភិវឌ្ឍព្រលានយន្តហោះនេះ និងសួនឧស្សាហកម្មក្បែរនោះហើយ។
អតីតអភិបាលខេត្តមណ្ឌលគិរី លោក ស្វាយ សំអ៊ាង ធ្លាប់បានប្រាប់ភ្នំពេញប៉ុស្តិ៍ថា អាជ្ញាធរខេត្តមណ្ឌលគិរី កំពុងបោះបង្គោលលើផ្ទៃដីទំហំ ៦០០ ហិកតាសម្រាប់គម្រោងព្រលានយន្តហោះថ្មីនេះ ដោយមានចម្ងាយ ២២ គីឡូម៉ែត្រខាងត្បូងក្រុងសែនមនោរម្យ ក្នុងឃុំ សែនមនោរម្យ ស្រុកអូររាំង។
កាលពីចុងខែសីហា រដ្ឋាភិបាលបានអនុម័តលើសេចក្តីព្រាងផែនការមេអភិវឌ្ឍន៍វិស័យទេសចរណ៍ខេត្តមណ្ឌលគិរី ឆ្នាំ ២០២១-២០៣៥ ចំពេលដែលមានគំនិតផ្តួចផ្តើមកាន់តែទូលំទូលាយ ដើម្បីទាក់ទាញភ្ញៀវទេសចរជាតិ និងអន្តរជាតិប្រមាណ ៣ លាននាក់ជារៀងរាល់ឆ្នាំទៅកាន់តំបន់ថាមពលជីវចម្រុះដ៏ស្រស់នៅភាគឦសាននៅត្រឹមឆ្នាំ ២០៣៥។
ផែនការមេនេះនឹងបំពេញបន្ថែមនូវផែនទីបង្ហាញផ្លូវទេសចរណ៍ជាតិ ៣ ដំណាក់កាលឆ្នាំ ២០២១-២០២៥ និងផែនការមេអភិវឌ្ឍន៍ទេសចរណ៍ខេត្តសៀមរាប ឆ្នាំ ២០២១-២០៣៥ ដែលត្រូវបានអនុម័តជាផ្លូវការដោយលោកនាយករដ្ឋមន្ត្រី ហ៊ុន សែន កាលពីថ្ងៃទី ១ ខែមេសាដើម្បីបង្ហាញទិសសម្រាប់ការងើបឡើងវិញពីការរីករាលដាលជំងឺកូវីដ ១៩ របស់វិស័យទេសចរណ៍។
ក្នុងលិខិតមួយកាលពីថ្ងៃទី ៩ ខែសីហា លោក ហ៊ុន សែន បានអះអាងថា វិស័យទេសចរណ៍នៅខេត្តមណ្ឌលគិរីកំពុងស្ថិតនៅក្នុងដំណាក់កាលរីកចម្រើន ដែលមានសក្តានុពលធំទូលាយសម្រាប់ការអភិវឌ្ឍ និងថាផែនការមេនេះនឹងជួយពន្លឿនកំណើនសេដ្ឋកិច្ចក្នុងខេត្ត និងផ្នែកផ្សេងទៀតរបស់កម្ពុជា។
លោក ហ៊ុន សែន បានថ្លែងថា៖ «ជាមួយនឹងសក្តានុពលទាំងនេះ ហើយស្ថិតក្រោមការគិតគូរដ៏វែងឆ្ងាយ និងទូលំទូលាយរាជរដ្ឋាភិបាលបានរៀបចំ និងដាក់ចេញនូវផែនការមេអភិវឌ្ឍន៍ទេសចរណ៍ខេត្តមណ្ឌលគិរីជាត្រីវិស័យមួយ ដើម្បីបង្ហាញពីយន្តការ និងទិសដៅយុទ្ធសាស្ត្រសំខាន់ៗ សម្រាប់ការអភិវឌ្ឍវិស័យទេសចរណ៍នៅខេត្តមណ្ឌលគិរី ដោយតភ្ជាប់នឹងចក្ខុវិស័យនៃការផ្លាស់ប្តូរប្រទេសក្នុងអំឡុងឆ្នាំ ២០២១-២០៣៥ និងជាច្រើនឆ្នាំខាងមុខទៀត»៕ LA
