.jpg)
ទីតាំងលក់រថយន្ត ១ កន្លែង ក្នុងខណ្ឌដូនពេញ។ ហ៊ាន រង្សី
ភ្នំពេញៈ រាជរដ្ឋាភិបាលបានសម្រេចធ្វើការកែសម្រួលជាបណ្តោះអាសន្ននូវតារាងតម្លៃគិតពន្ធគយ សម្រាប់អនុវត្តលើរថយន្តគ្មានពន្ធ និងអាករនាំចូលមានស្រាប់ក្នុងប្រទេសចាប់ពីថ្ងៃទី ១២ ខែតុលា ឆ្នាំ ២០២១ រហូតដល់ថ្ងៃទី ៣១ ខែធ្នូ ឆ្នាំ ២០២១ ក្នុងគោលបំណង ដើម្បីឱ្យមានតម្លាភាពក្នុងការបង់ពន្ធក៏ដូចជាយន្តការបង្កើនចំណូលជាតិផងដែរ។
យោងតាមលិខិតដែលចុះហត្ថលេខាដោយលោក គុណ ញឹម អគ្គនាយកនៃអគ្គនាយកដ្ឋានគយ និងរដ្ឋាករកម្ពុជា (GDCE) កាលពីថ្ងៃទី ១២ ខែតុលា ឆ្នាំ ២០២១ ផ្ញើឱ្យប្រធាននាយកដ្ឋាន សាខា និងការិយាល័យគយ និងរដ្ឋាករកម្ពុជា ឱ្យដឹងថា ការសម្រេចនេះដោយពិនិត្យឃើញមានរថយន្តមួយចំនួន ជាពិសេសប្រភេទរថយន្តមានឆ្នាំម៉ូដែល ក្រោមឆ្នាំ ២០១៦ មានសភាពចាស់ ហើយម្ចាស់មានបញ្ហាលំបាកផ្នែកហិរញ្ញវត្ថុក្នុងការបំពេញកាតព្វកិច្ចពន្ធ និងអាករ និងដើម្បីជំរុញឱ្យដំណើរការបង់ពន្ធអាករលើរថយន្តមានស្រាប់នៅក្នុងប្រទេសកាន់តែមានភាពរលូន ប្រកបដោយសមធម៌។
GDCE បានបន្តថា សម្រាប់រថយន្តចង្កូតស្តាំគ្មានពន្ធ និងអាករនាំចូលមានស្រាប់ក្នុងប្រទេស ត្រូវបន្ធូរបន្ថយតម្លៃគិតពន្ធគយលើតម្លៃរថយន្តចង្កូតឆ្វេងតាមឆ្នាំម៉ូដែល ៣ ប្រភេទ គឺឆ្នាំម៉ូដែលចាប់ពីឆ្នាំ ២០១៥ ចុះបន្ថយ ២០ ភាគរយ, ឆ្នាំម៉ូដែលចាប់ពីឆ្នាំ ២០១៦ ដល់ឆ្នាំ ២០១៨ បន្ថយ ១៥ ភាគរយ និងឆ្នាំម៉ូដែលចាប់ពីឆ្នាំ ២០១៩ ដល់ឆ្នាំ ២០២០ បន្ថយ ១០ ភាគរយ។
ដោយឡែកចំពោះប្រាក់ពន្ធ និងអាករដែលបង់លើសនាពេលកន្លងមក តាមខ្លឹមសារលិខិតលេខ ២០៧៦/២១ អគរ ចុះថ្ងៃទី ២២ ខែកញ្ញា ឆ្នាំ ២០២១ អគ្គនាយកដ្ឋានគយ និងរដ្ឋាករកម្ពុជាបានស្នើឱ្យអង្គភាពគយ និងរដ្ឋាករពាក់ព័ន្ធធ្វើរបាយការណ៍ ដើម្បីពិនិត្យ និងសម្រេច។
អគ្គនាយកដ្ឋានគយ និងរដ្ឋាករក៏បានកំណត់ថា ចំពោះរថយន្តស្ទូចធុនធ្ងន់ ដែលមានទម្ងន់សុទ្ធលើសពី ២០ តោនត្រូវបានលើកលែងការតម្រូវឱ្យកែចង្កូតពីស្តាំទៅឆ្វេង។ ការសម្រេចនេះយោងតាមលិខិត ចុះថ្ងៃទី ៤ ខែកញ្ញា ឆ្នាំ ២០០៨ របស់ក្រសួងសេដ្ឋកិច្ច និងហិរញ្ញវត្ថុ។
លោក ព្រាប ទិត្យរតនា ម្ចាស់ក្រុមហ៊ុននាំចូលរថយន្ត RVG បានយល់ឃើញថា សេចក្តីសម្រេចនេះ សម្រាប់តែរថយន្តនៅក្នុងស្រុកស្រាប់ដែលអគ្គនាយកដ្ឋានគយ និងរដ្ឋាករកម្ពុជាធ្វើការបញ្ចុះតម្លៃ ដើម្បីឱ្យម្ចាស់រថយន្ត ដែលមានចង្កូតស្តាំកែរួចហើយឱ្យទៅបង់ពន្ធ និងរថយន្តចង្កូតឆ្វេង ដែលមិនទាន់បានបង់ពន្ធអាករ ពីមុនមកដូចជារថយន្តស្លាកលេខរដ្ឋ ខម និងនប ជាដើម គឺត្រូវបានបន្ធូរបន្ថយឱ្យបង់ពន្ធចូលរដ្ឋ។
លោកបន្តថា ពាក់ព័ន្ធនឹងបញ្ហានេះក្នុងនាមលោកជាអ្នកនាំចូលរថយន្តស្របច្បាប់ សូមសម្តែងការគាំទ្រ បើសិនជាអគ្គនាយកដ្ឋានគយ និងរដ្ឋាករកម្ពុជាបន្ធូរបន្ថយជាទូទៅ ប៉ុន្តែនេះត្រូវបានធ្វើឡើង និងអនុវត្តសម្រាប់តែរថយន្តដែលបានប្រើប្រាស់ហើយអត់ពន្ធ។
លោកថ្លែងថា៖ «ចំណាត់ការទាំងអស់នេះមានអីល្អតើ បើយើងមិនបន្ធូរបន្ថយ ខាងអ្នកប្រើប្រាស់ឡានអត់ពន្ធ អត់ទៅបង់ពន្ធ ហើយវាបាត់បង់ថវិកាជាតិទៀត។ អ៊ីចឹងចង់មិនចង់ វាគួរតែបន្ធូរបន្ថយហើយ»។
ការប្រមូលចំណូលពន្ធរបស់អគ្គនាយកដ្ឋានគយ និងរដ្ឋាករកម្ពុជានៅក្នុងឆមាសទី ១ ឆ្នាំ ២០២១ សម្រេចបានទឹកប្រាក់ ១ ១៥៩,៥ លានដុល្លារ ធ្លាក់ចុះ ៨,៩ ភាគរយបើធៀបនឹងរយៈពេលដូចគ្នាឆ្នាំមុន។ ក្នុងនោះចំណូលពីយានយន្ត និងគ្រឿងចក្រមានចំនួន ៤២,៣ ភាគរយ ទំនិញចម្រុះមាន ២៨ ភាគរយ ផលិតផលតេលសិលា (ប្រេងសាំង, ប្រេងម៉ាស៊ូត និងប្រេងរំអិល) មាន ២៣,៥ ភាគរយ សម្ភារសំណង់ និងកម្រៃផ្សេងៗ ៦,២ ភាគរយ។
ក្នុងឆ្នាំ ២០២០ ការប្រមូលចំណូលពន្ធគយសម្រេចបាន ២ ៤១៩,៦ លានដុល្លារធ្លាក់ចុះ ២៤,៨ ភាគរយធៀបទៅនឹងឆ្នាំ ២០១៩។ នេះបើតាមទិន្នន័យរបស់អគ្គនាយកដ្ឋានគយ និងរដ្ឋាករកម្ពុជា៕ LA
វីដេអូ៖
