តម្លៃប្រេងឆៅត្រូវបានជួញដូរនៅតម្លៃខ្ពស់បំផុតកាលពីថ្ងៃចន្ទ សប្តាហ៍នេះ ក្នុងតម្លៃ ៨២,១៤ ដុល្លារក្នុង ១ បារ៉ែល។ បើគិតចាប់ពីថ្ងៃទី ២០ ខែសីហា ដែលមានតម្លៃត្រឹមតែ ៦១,៨៤ ដុល្លារ វាបានបង្ហាញពីសម្ទុះនៃទំនោរងើប ឡើងក្នុងរយៈពេលវែងដ៏រឹងមាំមួយ។
គេហទំព័រ CNBC កាលពីថ្ងៃទី ១០ ខែតុលា បានរាយការណ៍ថា ការឡើងថ្លៃនៃតម្លៃប្រេងឆៅគឺដោយសារចំនួននៃប្រជាជាតិដែលទទួលបានការចាក់វ៉ាក់សាំងការពារជំងឺកូវីដ ១៩ កាន់តែច្រើនឡើង ដែលជាកត្តាធ្វើឱ្យមានសកម្មភាពសេដ្ឋកិច្ចពិភពលោកឡើងវិញ។ ទន្ទឹមគ្នាផងដែរ តម្លៃធ្យូងថ្ម និងតម្លៃហ្គាសក៏បានឡើងថ្លៃ ដែលជាកត្តាជំរុញឱ្យតម្លៃប្រេងឆៅកាន់តែងើបឡើងបន្ថែមទៀត ស្របពេលដែលរដ្ឋមួយចំនួននៅឥណ្ឌាកំពុងមានបញ្ហាអគ្គិសនីដោយសារតែខ្វះខាតចំហេះធ្យូងថ្ម និងងាកមកប្រើប្រាស់ប្រេងឥន្ធនៈវិញ។ ចំណែករដ្ឋាភិបាលចិន បានបញ្ជាឱ្យក្រុមអ្នករុករករ៉ែធ្យូងថ្ម បង្កើនចង្វាក់ផលិតកម្មរបស់ខ្លួន ខណៈតម្លៃថាមពលប្រេងឆៅកាន់តែបន្តកើនឡើង។
ឆ្លើយតបទៅនឹងបញ្ហានេះ តាមរយៈរបាយការណ៍នៃកិច្ចប្រជុំលើកទី ២១ កាលពីថ្ងៃទី ៤ ខែតុលា អង្គការ OPEC+ បានសម្រេចកែប្រែឡើងវិញនូវសេចក្តីសម្រេចនៃកិច្ចប្រជុំលើកទី ១៩ ក្នុងការបង្កើនឡើងវិញពីការកាត់បន្ថយចង្វាក់ផលិកម្ម ៣,២ លានបារ៉ែលក្នុង ១ ថ្ងៃ ដោយបូកបន្ថែមទៅលើការរក្សាការបង្កើនចង្វាក់ផលិតកម្មប្រចាំខែ ៤០០ ពាន់បារ៉ែលក្នុង ១ ថ្ងៃ រហូតដល់ដំណាច់ខែធ្នូ ឆ្នាំ ២០២១ នេះ។
តាមការវិភាគផ្នែកបច្ចេកទេសវិញតម្លៃប្រេងឆៅស្ថិតនៅក្នុងទំនោរកើនឡើងរយៈពេលវែង។ ដូច្នេះវិនិយោគគិនអាចបន្តទិញក្នុងរង្វង់តម្លៃបច្ចុប្បន្ន ឬអាចរង់ចាំទិញនៅទម្រទី ១ ៧៩,៥០ ដុល្លារ ទម្រទី ២ តម្លៃ ៧៨ ដុល្លារ និងទម្រទី ៣ តម្លៃ ៧៧,៥០ ដុល្លារដោយកំណត់មុខងារការពារហានិភ័យនៅតម្លៃ ៧៥ ដុល្លារ និងមុខងារទាញយកប្រាក់ចំណេញទី ១ នៅក្នុងតម្លៃ ៨៥,៥ ដុល្លារ ឬ ក្នុងតម្លៃ ៩០ ដុល្លារ សម្រាប់រយៈពេលវែង៕