ទីក្រុងហាណូយៈ ប្រទេសវៀតណាមបានបើកឱ្យដំណើរការការហោះហើរពាណិជ្ជកម្មឡើងវិញ បន្ទាប់ពីបានផ្អាកអស់ជាច្រើនខែក្រោយ ការផ្ទុះឡើងការឆ្លងរាតត្បាតនៃវីរុសកូរ៉ូណាចាប់ពីខែមេសា ហើយរដ្ឋាភិបាលបិទខ្ទប់ប្រទេសជាច្រើនតំបន់។
ព្រលានយន្តហោះអន្តរជាតិដាណាំងបានស្វាគមន៍ការហោះហើរពាណិជ្ជកម្មលើកដំបូងពីទីក្រុងហូជីមិញ ដោយយន្តហោះក្រុមហ៊ុនអាកាសចរណ៍ Vietnam Airlines កាលពីល្ងាចថ្ងៃអង្គារ បន្ទាប់ផ្លូវហោះហើរបានបើកឡើងវិញ។
ទោះបីមានការបើកឱ្យអ្នកដំណើរធ្វើដំណើរតាមយន្តហោះឡើងវិញ ប៉ុន្តែវិធានការតឹងរ៉ឹងត្រូវបានគេអនុវត្ត ដើម្បីគ្រប់គ្រង ទប់ស្កាត់ និងបង្កាកូវីដ ១៩ ដោយអ្នកដំណើរទាំងអស់ទាមទារឱ្យធ្វើតេស្តរកកូវីដ ១៩ និងការចាក់វ៉ាក់សាំងប្រឆាំងកូវីដ ១៩ ពេញលេញ ឬក៏អ្នកធ្វើដំណើរទើបជាសះស្បើយពីជំងឺ។
ក្រុមហ៊ុនអាកាសចរណ៍បានស្តារការហោះហើរក្នុងស្រុកចំនួន ១៤ ទីតាំងចាប់តាំងពីថ្ងៃទី ១០ ខែតុលា។ សម្រាប់ផ្លូវហោះហើររវាងព្រលានយន្តហោះដាណាំង និងទីក្រុងហាណូយ និងទីក្រុងហូជីមិញ អាជ្ញាធរបានបើកឱ្យហោះហើរទៅមកចំនួនប្រាំលើកនៅលើផ្លូវហោះហើរនិមួយៗ អំឡុងពេលការហោះហើរសាកល្បងពីថ្ងៃទី ១០ ដល់ថ្ងៃទី ២០ ខែតុលា។
ជើងហោះហើរត្រូវគេរំពឹងថាកើនឡើងនៅថ្ងៃខាងមុខ បន្ទាប់ពីទីក្រុងជាច្រើនបានដាក់ចេញវិធានទប់ស្កាត់ និងបញ្ញត្តិគ្រប់គ្រងការរីករាលដាលជាក់លាក់ និងសម្របសម្រួលការធ្វើដំណើររបស់ប្រជាជន៕ VNS-ANN/RR