ទីក្រុងវ៉ាស៊ីនតោនៈ រដ្ឋាភិបាលអាមេរិកនៅថ្ងៃពុធបានបង្ហាញផែនការសាងសង់ទីលានថាមពលខ្យល់នៅតាមមាត់សមុទ្រធំៗចំនួន ៧ កន្លែងតាមបណ្តោយមាត់សមុទ្ររបស់ប្រទេសនេះ ជាផ្នែកនៃការជំរុញរបស់ខ្លួន ដើម្បីផ្គត់ផ្គង់ថាមពលបង្កើតឡើងដោយខ្យល់ដល់លំនៅឋានជាង ១០ លានត្រឹមឆ្នាំ ២០៣០។
លោកស្រី Deb Haaland រដ្ឋមន្ត្រីមហាផ្ទៃបានប្រកាសពេលដែលឡើងថ្លែងក្នុងសន្និសីទស្តីពីថាមពលខ្យល់ក្នុងទីក្រុងប៊ូស្តុន រដ្ឋ Massachusetts។
លោកស្រីបាននិយាយថា៖ «ក្រសួងមហាផ្ទៃកំពុងរៀបចំផែនទីបង្ហាញផ្លូវប្រកបដោយមហិច្ឆតា ពេលដែលយើងធ្វើទំនើបកម្មផែនការរដ្ឋបាល ដើម្បីប្រឈមការប្រែប្រួលអាកាសធាតុ បង្កើនការងារល្អ និងពន្លឿនការផ្លាស់ប្តូររបស់ជាតិទៅរកថាមពលកាន់តែស្អាតនៅក្នុងអនាគត»។
ក្នុងខែមីនា រដ្ឋបាលរបស់លោកប្រធានាធិបតី ចូ បៃដិន បានប្រកាសថា ខ្លួននឹងវិនិយោគឱ្យច្រើនដើម្បីជំរុញកសិកដ្ឋានថាមពលខ្យល់នៅតាមតំបន់ឆ្នេរសមុទ្រ ជាផ្នែកនៃកិច្ចខិតខំប្រឹងប្រែង ដើម្បីប្រយុទ្ធប្រឆាំងការប្រែប្រួលអាកាសធាតុ។
ក្រៅពីការផ្គត់ផ្គង់ថាមពលខ្យល់ដល់លំនៅឋានរាប់លាន ផែនការរបស់រដ្ឋបាលរដ្ឋាភិបាលអាមេរិកនឹងផលិត ៣០ ជីហ្គាវ៉ាតនៃថាមពលខ្យល់ត្រឹមឆ្នាំ ២០៣០ កាត់បន្ថយការបំភាយកាបូនឌីអុកស៊ីត ៧៨ លានតោន និងបង្កើតការងាររាប់ពាន់កន្លងថែមទៀត។
លោកស្រី Haaland បាននិយាយថា រដ្ឋាភិបាលមានបំណងគ្រប់គ្រងការលក់ជួលមាត់សមុទ្រ ៧ កន្លែងត្រឹមឆ្នាំ ២០២៥ សម្រាប់តំបន់ឈួងសមុទ្រ។
មានតែកសិដ្ឋានថាមពលខ្យល់តែមួយគត់ក្នុងពេលបច្ចុប្បន្ននេះដែលដំណើរការពេញលេញក្នុងសហរដ្ឋអាមេរិក នោះគឺកសិកដ្ឋាននៅតំបន់ប្រជុំកោះ ដែលបានសាងសង់រួចរាល់នៅឆ្នាំ ២០១៦ ស្ថិតនៅក្នុងរដ្ឋប្រជុំកោះ Rhode និងមានសមត្ថភាពផលិតថាមពល ៣០ មេហ្គាវ៉ាត។
គម្រោងសាកល្បង The Coastal Virginia Offshore Wind (CVOW) ដែលមានសមត្ថភាព ១២ មេហ្គាវ៉ាតបានបញ្ចប់ការសាងសង់ក្នុងឆ្នាំ ២០២០។ ទីតាំងចុងក្រោយនឹងត្រូវសង់បញ្ចប់ក្នុងឆ្នាំ ២០២៦ និងអាចផ្គត់ផ្គង់ថាមពលដល់លំនៅឋាន ៦០០ ០០០ ខ្នងផ្ទះ។
ការគាំទ្ររបស់រដ្ឋបាលលោក បៃដិន សម្រាប់ថាមពលខ្យល់ជាការដើរបញ្ច្រាសទិសចំពោះអតីតៈប្រធានាធិបតី ដូណាល់ ត្រាំ ដែលបានថ្លែងចំអកម្តងហើយម្តងទៀតចំពោះប្រភពថាមពលខ្យល់អំឡុងពេលកាន់អំណាច ដោយអះអាងថា វាថ្លៃពេក និងគ្មានប្រសិទ្ធភាព៕ RR