The Phnom Penh Post Search

Search form

Logo of Phnom Penh Post newspaper Phnom Penh Post - CJDM នឹង​បណ្តុះបណ្តាល​វិស្វករ​ជំនាញ​ជាន់ខ្ពស់ ក្នុង​បរិបទ​នៃ​ឧស្សាហកម្ម ៤.០




CJDM នឹង​បណ្តុះបណ្តាល​វិស្វករ​ជំនាញ​ជាន់ខ្ពស់ ក្នុង​បរិបទ​នៃ​ឧស្សាហកម្ម ៤.០

Content image - Phnom Penh Post
​សាកលវិទ្យាល័យ​ភូមិន្ទ​ភ្នំពេញ​ (RUPP)។ រូបថត ភ្នំពេញ ប៉ុស្តិ៍

CJDM នឹង​បណ្តុះបណ្តាល​វិស្វករ​ជំនាញ​ជាន់ខ្ពស់ ក្នុង​បរិបទ​នៃ​ឧស្សាហកម្ម ៤.០

ភ្នំពេញៈ រដ្ឋាភិបាល​កម្ពុជា​តាមរយៈ​សាកលវិទ្យាល័យ​ភូមិន្ទ​ភ្នំពេញ​ (RUPP) ​ដែល​គាំទ្រ​ដោយ​រដ្ឋាភិបាល​ជប៉ុន គ្រោង​នឹង​បង្កើត​មជ្ឈមណ្ឌល​ផលិតកម្ម​ឌីជីថល​កម្ពុជា-ជប៉ុន​ (CJDM) ​ជា​វិធានការ​មួយ​ក្នុង​ការផ្ដល់​ការបណ្ដុះបណ្ដាល​វិជ្ជាជីវៈ ស្ដីពី​បដិវត្តន៍​ឧស្សាហកម្ម ៤.០ ក្នុង​ប្រទេស​កម្ពុជា​។

លោក ម៉ី កល្យាណ ប្រធាន​ក្រុម​ប្រឹក្សាភិបាល RUPP និង​ស្ថាបនិក​នៃ​គម្រោង RUPP-DMG MORI បានឱ្យដឹង​ក្នុង​សន្និសីទ​ព័ត៌មាន​ស្តីពី​ការរៀបចំ​សម្រាប់​ការបង្កើត​មជ្ឈមណ្ឌល CJDM កាលពី​ថ្ងៃទី​ ១៤ ខែតុលាថា ខណៈ​ការអភិវឌ្ឍ​យ៉ាង​ឆាប់រហ័ស​នៃ​បច្ចេកវិទ្យា​ឌីជីថល​ក៏ដូចជា​វឌ្ឍនភាព​នៃ​បដិវត្តន៍​ឧស្សាហកម្ម ៤.០ នៅ​ជុំវិញ​ពិភពលោក​កម្ពុជា​ត្រូវតែ​បណ្តុះបណ្តាល​ធនធានមនុស្ស​ឱ្យ​បានល្អ​ ដើម្បី​ស្វាគមន៍​វិនិយោគិន​បរទេស​ណា​ដែល​នាំមក​នូវ​ឧស្សាហកម្ម​ដ៏ទំនើប​បែប​នោះ​ចូលមកក្នុង​ព្រះរាជាណាចក្រ​កម្ពុជា​។

លោក​លើកឡើងថា បើ​គ្មាន​ការគាំទ្រ​ពី​ប្រជាជន​ជប៉ុន និង​រដ្ឋាភិបាល​ជប៉ុន ការរៀបចំ​មជ្ឈមណ្ឌល​នេះ​នឹងមិន​សម្រេច​បានទេ​។ លោក​បញ្ជាក់ថា​៖ «​មជ្ឈមណ្ឌល​នេះ គឺ​ដើម្បី​អប់រំ​ឧស្សាហកម្ម ៤.០ ដល់​ប្រជាជន​យើង​ដើម្បី​ភ្ជាប់​ទំនាក់ទំនង​ពិតប្រាកដ​។ យើង​នឹង​ធ្វើតាម​គំនិត​នោះ ហើយ​អ្វីៗ​ទាំងអស់​ត្រូវធ្វើ​តាមរយៈ​ការភ្ជាប់​ទំនាក់ទំនងរ​វាង​វិស័យ​ឯកជន និង​រដ្ឋាភិបាល​។ យើង​បានចាប់ផ្តើម​រួចហើយ ហើយ​យើង​ដឹងថា យើង​មាន​ផ្លូវ​ដ៏វែងឆ្ងាយ​មួយ​ដែល​ត្រូវ​ធ្វើដំណើរ ប៉ុន្តែ​យើង​ប្តេជ្ញា​ថា​នឹង​ធ្វើ​វា​ឱ្យបាន​សម្រេច​»​។

លោក​បាន​បន្ថែមថា​៖ «​យើង​បង្កើត​មជ្ឈមណ្ឌល​មួយ​ដើម្បី​ធ្វើការ​ស្រាវជ្រាវ និង​បណ្តុះបណ្តាល​ដល់​ប្រជាជន​យើង ហើយ​យើង​ក៏​ចង់​ធ្វើឱ្យ​ក្លាយជា​មជ្ឈមណ្ឌល​សម្រាប់​ការតភ្ជាប់​ឧស្សាហកម្ម និង​សាកល​វិទ្យាល័យ ដែល​មិន​ត្រឹមតែ​ជា​បច្ចេកវិទ្យា​វិទ្យាសាស្ត្រ​ប៉ុណ្ណោះ​នោះទេ ប៉ុន្តែ​ថែមទាំង​ភ្ជាប់​ជាមួយ​ឧស្សាហកម្ម​ទៀតផង​»​។

លោក MIKAMI Masahiro ឯកអគ្គរាជទូត​ជប៉ុន​ប្រចាំ​នៅ​កម្ពុជា​បាន​ឱ្យដឹងថា CJDM គឺជា​គម្រោង​មួយ​ក្នុងចំណោម​គម្រោង​ជាច្រើន​ដែល​រដ្ឋាភិបាល​ជប៉ុន​បានផ្តល់​ជំនួយ​ឥតសំណង​ដល់​កម្ពុជា​។ លោក​បន្តថា មជ្ឈមណ្ឌល​នេះ​នឹង​បណ្តុះបណ្តាល​វិស្វករ​ជំនាញ​ជាន់ខ្ពស់​នៅក្នុង​បរិបទ​នៃ​គម្រោង​ឧស្សាហកម្ម ៤.០​។

លោក​លើកឡើងថា​៖ «​យើង​ពិតជា​រីករាយ​យ៉ាងខ្លាំង​ក្នុង​ការសហការ​ជាមួយ​គម្រោង​នេះ ខណៈ​បច្ចេកវិទ្យា​ឌីជីថល​ទំនើប និង​ការវិវឌ្ឍ​នៃ​ឧស្សាហកម្ម​ ៤.០ កំពុង​វិវឌ្ឍ​យ៉ាង​ឆាប់រហ័ស​នៅ​ទូទាំង​ពិភពលោក វា​ពិតជា​មាន​សារៈសំខាន់​ណាស់​សម្រាប់​ប្រទេស​កម្ពុជា​ដែលមាន​ធនធាន​មនុស្ស​មាន​ជំនាញ​ផលិត​កម្រិត​ពិភពលោក​»​។

លោក ងួន ផានភក្តី ប្រធាន​គម្រោង​មជ្ឈមណ្ឌល CJDM បាន​ប្រាប់ថា ឧស្សាហកម្ម​ ៤.០ នឹង​ជួយ​ជំរុញ​សេដ្ឋកិច្ចកម្ពុជា​ក្នុង​ពេល​អនាគត​ដ៏ខ្លី​ខាងមុខនេះ​។ កម្ពុជា​ក្នុងនាម​ជា​ប្រទេស​កំពុង​អភិវឌ្ឍន៍​មួយ គឺ​នៅ​ឆ្ងាយ​ពី​ឧស្សាហកម្ម ៤.០ ប៉ុន្តែ​រដ្ឋាភិបាល​កម្ពុជា​កំពុង​ចាប់យក​ចក្ខុវិស័យ​នេះ​ដើម្បី​សម្រេចបាន​គោលដៅ​ឆ្នាំ​ ២០៣០ និង​ឆ្នាំ​ ២០៥០ របស់ខ្លួន​។

លោក​បាន​បញ្ជាក់ថា គោលនយោបាយ​យុទ្ធសាស្ត្រ​អភិវឌ្ឍន៍ និង​កំណែទម្រង់​មួយចំនួន​ដូចជា ផែនការអភិវឌ្ឍន៍​ឧស្សាហកម្ម ផែនការ​ធ្វើ​ពិពិធកម្ម​សេដ្ឋកិច្ច យុទ្ធសាស្ត្រ​អប់រំ STEM និង​ការលើកកម្ពស់​ការស្រាវជ្រាវ ការអភិវឌ្ឍ និង​នវានុវត្តន៍​។

លោក​និយាយថា​៖ «​ឧស្សាហកម្ម ៤.០ គឺជា​កត្តា​ជំរុញ​ដ៏សំខាន់​មួយ​ដែល​អាចឱ្យ​កម្ពុជា​សម្រេចបាន​នូវ​គោលដៅ​រយៈពេល​វែង​របស់ខ្លួន​ក្នុង​ការក្លាយ​ជា​ប្រទេស​មាន​ចំណូល​មធ្យម​កម្រិត​ខ្ពស់ និង​ជា​ប្រទេស​អភិវឌ្ឍន៍​។ សាកលវិទ្យាល័យ​ភូមិន្ទ​ភ្នំពេញ​រួមជាមួយ DMG MORI ដែលជា​ក្រុមហ៊ុន​វិនិយោគ​រួម​រវាង​ប្រទេស​ជប៉ុន និង​អាល្លឺម៉ង់ និង​ក្រុមហ៊ុន​ផលិត​ម៉ាស៊ីន CNC ដែលមាន​បច្ចេកវិទ្យា​ខ្ពស់​លំដាប់​លេខ ១ របស់​ពិភពលោក​ជា​ដៃគូ​ ដើម្បី​រួមចំណែក​ផលិត​ធនធានមនុស្ស​មាន​សមត្ថភាព និង​កម្មវិធី​បណ្តុះបណ្តាល​នៅក្នុង​វិស័យ​ផលិតកម្ម​ឌីជីថល​ក្នុង​កម្រិត​គុណភាព​ខ្ពស់ និង​ច្បាស់លាស់​»​។

លោក MIKAMI Masahiro ឱ្យដឹងថា ការបណ្តុះបណ្តាល​វិស្វករ​ជំនាញ​ជាន់ខ្ពស់​ដែល​អាច​ប្រើប្រាស់​ម៉ាស៊ីន​ទំនើប​នឹងមាន​សារៈសំខាន់​ចាប់ពី​យានយន្ត​រហូត​ដល់​ឆ្លើយតប​នឹង​តម្រូវការ​ទីផ្សារ ក៏ដូចជា​ទីផ្សារ​មាន​សក្តានុពល​ធំៗ​ដូចជា​វេជ្ជសាស្ត្រ និង​ឧស្សាហកម្ម​អវកាស​។

លោក​ថ្លែងថា​៖ «​ខ្ញុំ​ជឿថា​គម្រោង​នេះ​ស្របគ្នា​នឹង​គោលដៅ​របស់​រាជរដ្ឋាភិបាល​កម្ពុជា​ហើយ​នឹង​ចូលរួមចំណែក​យ៉ាងសំខាន់​ក្នុង​ការអភិវឌ្ឍ​ធនធានមនុស្ស​ដែល​មាន​ជំនាញ​ខ្ពស់​ដែល​ត្រូវបាន​កំណត់ថា​ជា​មជ្ឈមណ្ឌល​ដ៏សំខាន់​បំផុត ដោយ​ក្រុមហ៊ុន​ជប៉ុន​នៅពេល​ជ្រើសរើស​ទិសដៅ​វិនិយោគ​»៕ LA

អត្ថបទគួរចាប់អារម្មណ៍