ភ្នំពេញៈ ទោះបីជាការរីករាលដាលជំងឺកូវីដ ១៩ ជាពិសេសការផ្ទុះនៅក្នុងសហគមន៍ និងមានការបិទខ្ទប់តំបន់ខ្លះរយៈពេលខ្លីកន្លងមក បានរំខានដល់ខ្សែចង្វាក់ផលិតកម្ម ក៏ការនាំចេញផលិតផលកាត់ដេរពីកម្ពុជាសម្រេចបានតម្លៃសរុបជាង ៨,២ ពាន់លានដុល្លារនារយៈពេល ៩ ខែ ឆ្នាំ ២០២១ កើនឡើងជាង ១១ ភាគរយបើធៀបនឹងរយៈពេលដូចគ្នាឆ្នាំ ២០២០។ នេះបើតាមទិន្នន័យពីអគ្គនាយកដ្ឋានគយ និងរដ្ឋាករកម្ពុជា។
បើយោងតាមការកត់ត្រារបស់អគ្គនាយកដ្ឋានគយ និងរដ្ឋាករកម្ពុជា ការនាំចេញផលិតផលកាត់ដេរចាប់ពីខែមករា ដល់ខែកញ្ញា ឆ្នាំ ២០២១ បានទឹកប្រាក់សរុប ៨ ២៤១,៧ លានដុល្លារ កើនប្រមាណ ៨៤៣,៤ លានដុល្លារ ស្មើនឹង ១១,៤ ភាគរយបើធៀបនឹងរយៈពេលដូចគ្នាឆ្នាំ ២០២០។
លោក ខេន លូ អគ្គលេខាធិការសមាគមរោងចក្រកាត់ដេរនៅកម្ពុជា (GMAC) បានប្រាប់ភ្នំពេញប៉ុស្តិ៍កាលពីពេលថ្មីៗនេះថា ទោះបីក្នុងអំឡុងពេលនៃការរីករាលដាលជំងឺកូវីដ ១៩ ក៏ការបញ្ជាទិញផលិតផលកាត់ដេរមិនបានធ្លាក់ចុះនោះទេ ពិសេសការទទួលបានចំណែកទីផ្សារពីប្រទេសផលិតមួយចំនួនដែលកំពុងជួបបញ្ហាដោយសារបញ្ហានយោបាយ និងផលប៉ះពាល់ពីជំងឺកូវីដ ១៩។
លោកប្រាប់ថា៖ «ឆ្នាំនេះយើងសំណាងដោយទទួលបានការបញ្ជាទិញមួយចំនួនពីប្រទេសមីយ៉ាន់ម៉ា។ យើងនឹងមានកំណើនកាន់តែច្រើន បើមិនមានព្រឹត្តិការណ៍ ២០ កុម្ភៈ»។
លោក ហុង វណ្ណៈ អ្នកស្រាវជ្រាវសេដ្ឋកិច្ចអន្តរជាតិនៃវិទ្យាស្ថានទំនាក់ទំនងអន្តរជាតិនៃកម្ពុជាបានលើកឡើងថា កំណើនការនាំចេញផលិតផលកាត់ដេរសម្លៀកបំពាក់ បង្ហាញពីសញ្ញាវិជ្ជមាននៃសកម្មភាពសេដ្ឋកិច្ចកម្ពុជា ខណៈប្រទេសដទៃទៀតកំពុងរងផលប៉ះពាល់យ៉ាងខ្លាំងពីការរីករាលដាលនៃជំងឺកូវីដ ១៩។
លោកនិយាយថា៖ «ខ្ញុំសង្កេតឃើញថា កំណើននេះ គឺពិតជាឆ្លុះបញ្ចាំងយ៉ាងល្អដែលបានជួយទ្រទ្រង់កំណើនសេដ្ឋកិច្ចរបស់ប្រទេសយើង។ កម្ពុជានៅតែជាទីកន្លែងវិនិយោគដ៏ទាក់ទាញនៅក្នុងតំបន់ ដោយសារតែរដ្ឋាភិបាលកំពុងធ្វើការកែទម្រង់សេដ្ឋកិច្ច ដូចជាបើកទីផ្សារថ្មីៗក្នុងតំបន់តាមរយៈការចុះកិច្ចព្រមព្រៀងពាណិជ្ជកម្មសេរីទ្វេភាគី និងពហុភាគី ការដាក់ចេញនូវច្បាប់វិនិយោគថ្មី និងការចុះបញ្ជីតាមអេឡិចត្រូនិក ដែលក៏កំពុងដើរតួយ៉ាងសំខាន់ក្នុងការទាក់ទាញអ្នកវិនិយោគ និងការសម្រួលពាណិជ្ជកម្មនានា»។
លោកបន្ថែមថា រដ្ឋាភិបាលកំពុងខំសម្រួលបរិយាកាសវិនិយោគ និងធុរកិច្ចក្នុងស្រុកដើម្បីធ្វើយ៉ាងណាផ្តល់ឱ្យធុរជន និងអ្នកវិនិយោគនូវទំនុកចិត្ត ស្របពេលដែលការបើកទីផ្សារថ្មីៗ ជាពិសេសពាណិជ្ជកម្មសេរីជាមួយចិន កូរ៉េខាងត្បូង និងប្រទេសផ្សេងៗទៀតនឹងរឹតតែធ្វើឱ្យកម្ពុជាក្លាយជាទិសដៅវិនិយោគដ៏ល្អ។ លោកលើកឡើងថា៖ «ខ្ញុំមានសុទិដ្ឋិនិយមថា ភាពល្អប្រសើរឡើងនៃការនាំចេញផលិតផលកាត់ដេរនេះ បង្ហាញឱ្យយើងឃើញច្បាស់ថា ប្រទេសយើងគឺនៅតែអាចធ្វើការនាំចេញបានទោះបីមានការរីករាលដាលនៃជំងឺកូវីដ ១៩។ ប៉ុន្តែបើយើងក្រឡេកមើលទៅប្រទេសមួយចំនួនការនាំចេញដូចយើង គឺធ្លាក់ចុះ»៕ LA