ភ្នំពេញៈ វិស័យទេសចរណ៍នៅកម្ពុជា ពិសេសក្នុងខេត្តសៀមរាបរំពឹងថា នឹងទទួលបានសញ្ញាវិជ្ជមានឡើងវិញជាបណ្តើរៗ ខណៈក្រសួងទេសចរណ៍ គ្រោងនឹងប្រកាសជាផ្លូវការដាក់ឱ្យអនុវត្តផែនការមេអភិវឌ្ឍន៍ទេសចរណ៍ខេត្តសៀមរាប ២០២១-២០៣៥ នៅសប្តាហ៍ក្រោយ។ នេះបើយោងតាមសេចក្តីជូនដំណឹងរបស់ក្រសួងទេសចរណ៍។
ក្រសួងទេសចរណ៍ឱ្យដឹងថា នៅថ្ងៃទី ២០ ខែតុលា ខាងមុខពិធីប្រកាសឱ្យអនុវត្តផែនការមេអភិវឌ្ឍន៍ទេសចរណ៍ខេត្តសៀមរាប ឆ្នាំ ២០២១-២០៣៥ នឹងធ្វើឡើងជាផ្លូវការតាមរយៈប្រព័ន្ធអនឡាញ ដោយមានការចូលរួមរបស់លោក អូន ព័ន្ធមុនីរ័ត្ន រដ្ឋមន្ត្រីក្រសួងសេដ្ឋកិច្ច និងហិរញ្ញវត្ថុ។
ផែនការមេអភិវឌ្ឍន៍ទេសចរណ៍ខេត្តសៀមរាប ឆ្នាំ ២០២១-២០៣៥ ត្រូវបានរដ្ឋាភិបាល អនុម័តកាលពីថ្ងៃទី ៣០ ខែមីនា ឆ្នាំ ២០២១។
កន្លងមកក្រសួងទេសចរណ៍បានលើកឡើងថា តាមរយៈផែនការមេនេះ ខេត្តសៀមរាបរំពឹងនឹងអាចទាក់ទាញបានភ្ញៀវទេសចរជាតិចំនួន ១០,៩ លាននាក់នៅឆ្នាំ ២០២៣ និងភ្ញៀវទេសចរអន្តរជាតិ ៧,៥ លាននាក់នៅឆ្នាំ ២០២៥។ តាមរយៈនេះរដ្ឋាភិបាលក៏មានចក្ខុវិស័យបង្កើតការងារឱ្យបាន ៩៤ ម៉ឺននាក់ និងប្រាក់ចំណូលចូលក្នុងចរន្តសេដ្ឋកិច្ចខេត្តសៀមរាប ប្រមាណ ៦ ពាន់លានដុល្លារ។
ផែនការមេនេះក៏នឹងជួយធ្វើឱ្យខេត្តសៀមរាប និងតំបន់នៅជុំវិញក្លាយជាគោលដៅទេសចរណ៍ប្រកបដោយគុណភាពឆ្ពោះទៅឆ្នាំ ២០៣៥ តាមរយៈការអនុវត្តនូវយុទ្ធសាស្ត្រមួយចំនួនដូចជា ការអភិវឌ្ឍតំបន់ទេសចរណ៍អាទិភាពក្នុងខេត្ត, ការអភិវឌ្ឍផលិតផលទេសចរណ៍ថ្មីៗ, ការផ្សព្វផ្សាយ និងទាក់ទាញភ្ញៀវទេសចរ, ការពង្រឹងគុណភាព និងនិរន្តរភាព, ការគ្រប់គ្រងបរិស្ថាន, ការអភិវឌ្ឍហេដ្ឋារចនាសម្ព័ន្ធ និងពង្រីកការតភ្ជាប់គាំទ្រវិស័យទេសចរណ៍, និងការពង្រឹងអភិបាលកិច្ចសម្រាប់ទ្រទ្រង់ការអភិវឌ្ឍវិស័យទេសចរណ៍ខេត្តនេះ។
បន្ថែមលើនេះ ក្រសួងសុខាភិបាលកាលពីថ្ងៃទី ១៦ ខែតុលា ក៏បានចេញនូវសេចក្តីជូនដំណឹងមួយលេខ ៤៥៣ ស.ខ.ល ស្តីពី «លក្ខខណ្ឌធ្វើដំណើរ ការអនុវត្តវិធានសុខាភិបាល និងការធ្វើចត្តាឡីស័កនៅកម្ពុជាសម្រាប់អ្នកដំណើរចូលមកកម្ពុជាស្របតាមគន្លងប្រក្រតីភាពថ្មី» ដែលខ្លឹមសារលិខិតនេះ នឹងអនុញ្ញាតឱ្យអ្នកវិនិយោគ និងអ្នកជំនាញដែលបានចាក់វ៉ាក់សាំងគ្រប់ដូស ចូលមកកម្ពុជា ធ្វើចត្តាឡីស័ក ត្រឹមរយៈពេល ៣ ថ្ងៃ ចំណែកជនជាតិខ្មែរ និងជនបរទេសទូទៅ ត្រូវធ្វើចត្តាឡីស័ក ៧ ថ្ងៃ។
លោក ហូ វណ្ឌី ប្រធានក្រុមហ៊ុនទេសចរណ៍ វើលដ៏អិចប្រេស បានប្រាប់ភ្នំពេញប៉ុស្តិ៍ នាថ្ងៃទី ១៧ ខែតុលា ថា ផែនការមេ នេះគឺជាការលើកទឹកចិត្តចំពោះអ្នកក្នុងវិស័យទេសចរណ៍ទាំងអស់ ពិសេសក្នុងខេត្តសៀមរាប ដែលនឹងអាចទទួលបានភ្ញៀវចូលមកកម្សាន្តក្នុងពេលឆាប់ៗ។ ម្យ៉ាងទៀត ការដាក់ចេញនូវគោលការណ៍ថ្មីរបស់ក្រសួងទាក់ទងនឹងការកាត់បន្ថយរយៈពេលធ្វើចត្តាឡីស័កសម្រាប់អ្នកបានចាក់វ៉ាក់សាំងប្រឆាំងនឹងជំងឺកូវីដ ១៩ រួចរាល់ ក៏ជាយុទ្ធសាស្ត្រថ្មីមួយបន្ថែមសម្រាប់ការស្រូបទាញភ្ញៀវទេសចរឱ្យចូលមកកម្សាន្តនៅកម្ពុជាផងដែរ។
លោកថ្លែងថា៖ «ទាំងនេះសុទ្ធតែជាចំណុចល្អសម្រាប់ការចាប់ផ្តើមបើកទទួលភ្ញៀវទេសចរឡើងវិញ»។
ប្រធានសមាគមទេសចរណ៍អាស៊ីប៉ាស៊ីហ្វិក លោក ធួន ស៊ីណាន បាននិយាយថា ផែនការមេអភិវឌ្ឍន៍ទេសចរណ៍ខេត្តសៀមរាប និងការកាត់បន្ថយ ចំនួនថ្ងៃធ្វើចត្តាឡីស័កសម្រាប់ភ្ញៀវទេសចរចូលមកកម្ពុជានឹងផ្តល់ភាពវិជ្ជមានសម្រាប់វិស័យទេសចរណ៍បាន ១ ផ្នែក ខណៈស្ថានភាពនៃការរីករាលដាលជំងឺកូវីដ ១៩ ដែលបានអូសបន្លាយជិត ២ ឆ្នាំមកនេះ បានធ្វើឱ្យវិស័យនេះរងផលប៉ះពាល់យ៉ាងខ្លាំង។
លោកបន្ថែមថា កូវីដ ១៩ មិនត្រឹមតែធ្វើឱ្យបាត់ចំណូលសម្រាប់អ្នកនៅក្នុងវិស័យទេសចរណ៍ប៉ុណ្ណោះទេ ប៉ុន្តែផ្នែកផ្សេងៗក៏រងផលប៉ះពាល់ដែរ។ ក្តីបារម្ភពីសុវត្ថិភាពធ្វើដំណើរ និងកត្តាសេដ្ឋកិច្ចកំពុងបន្តកើតមានព្រមគ្នា។
លោកលើកឡើងថា៖ «ដើម្បីអាចទាក់ទាញចំណាប់អារម្មណ៍ភ្ញៀវទេសចរបរទេស គឺទាមទារឱ្យអាជ្ញាធរដាក់ចេញនូវយុទ្ធសាស្ត្រលើកទឹកចិត្ត និងការសម្របសម្រួលបន្ថែមទៀត»។
ទិន្នន័យក្រសួងទេសចរណ៍ឱ្យដឹងថា រយៈពេល ៧ ខែដើមឆ្នាំ ២០២១ ចំនួនភ្ញៀវទេសចរបរទេសធ្វើដំណើរមកកម្ពុជាមានចំនួន ១១២ ៥៤៤ នាក់ ធ្លាក់ចុះ ៩០,៦ ភាគរយធៀបនឹងរយៈពេលដូចគ្នាឆ្នាំ ២០២០៕ LA
វីដេអូ៖