.jpg)
លោក Lee Hsien Loong នាយករដ្ឋមន្ត្រីសិង្ហបុរីដែលបានពង្រីកបើកទទួលអ្នកដំណើរចាក់វ៉ាក់សាំងរួចដោយមិនតម្រូវឱ្យធ្វើចត្តាឡីស័ក។
សិង្ហបុរីៈ អ្នកដំណើរដែលចាក់វ៉ាក់សាំងពេញលេញពីប្រទេស ៨ នឹងមានលទ្ធភាពចូលទៅប្រទេសសិង្ហបុរីដោយគ្មានការធ្វើចត្តាឡីស័កចាប់ពីថ្ងៃអង្គារ ខណៈប្រទេសជាមជ្ឈមណ្ឌលពាណិជ្ជកម្មនេះបន្ធូរបន្ថយការរឹតត្បិត និងពន្លឿនការរស់នៅជាមួយកូវីដ។
ប្រទេសសិង្ហបុរីដំបូងឡើយ ប្រយុទ្ធការរីករាលដាលជំងឺនេះដោយការបិទព្រំដែន បិទចរាចរណ៍យ៉ាងតឹងរឹង និងការតាមដានវីរុសដ៏ម៉ត់ចត់ ប៉ុន្តែដោយមានប្រជាជនជាង ៨០ ភាគរយបានចាក់វ៉ាក់សាំងពេញលេញ អាជ្ញាធរនៃប្រទេសដែលជាមជ្ឈមណ្ឌលអាកាសចរណ៍សកលនេះប្រញាប់កែប្រែស្ថានភាពសេដ្ឋកិច្ចវិញ។
ប្រទេសសិង្ហបុរីបានបើកការធ្វើដំណើរទៅដល់អ្នកដំណើរចាក់វ៉ាក់សាំងពេញលេញពីប្រទេសប្រ៊ុយណេ និងអាល្លឺម៉ង់ក្នុងខែកញ្ញា និង បានពង្រីកកម្មវិធីនេះចាប់ពីថ្ងៃអង្គារទៅប្រទេស ៨ ផ្សេងទៀតមានប្រទេសអង់គ្លេស កាណាដា ដាណឺម៉ាក បារាំង អ៊ីតាលី ហូឡង់ អេស្ប៉ាញ និង សហរដ្ឋអាមេរិក។
ការបើកការធ្វើដំណើរសម្រាប់ប្រទេសកូរ៉េខាងត្បូងនឹងចាប់ផ្តើមនៅថ្ងៃទី ១៥ ខែវិច្ឆិកា។
ស្ថិតក្រោមគោលនយោបាយនេះ អ្នកដំណើរនឹងមិនត្រូវធ្វើចត្តាឡីស័ក ប្រសិនបើពួកគេចាក់វ៉ាក់សាំងពេញលេញ និងធ្វើតេស្តអវិជ្ជមានសម្រាប់រកវីរុសកូរ៉ូណា មុនគេចាកចេញពីប្រទេស និងទៅដល់គោលដៅ។
នាយករដ្ឋមន្ត្រីសិង្ហបុរី លោក Lee Hsien Loong បាននិយាយកាលពីថ្ងៃទី ៩ ខែតុលា ពេលដែលគាត់ប្រកាសនូវក្បួនវិធានការក្រោម «ការរស់នៅជាមួយកូវីដ ១៩» ថា៖ «សិង្ហបុរីមិនអាចរស់នៅបិទជិតឈឹងបែបនេះទេ»។
លោក Lee បានចង្អុលបង្ហាញចំពោះវីរុសបំប្លែង Delta ជាកត្តាមួយ។
លោកនិយាយថា៖ «វីរុសបំប្លែង Delta គឺឆ្លងខ្ពស់ណាស់ ហើយរីកសាយភាយលឿនទៅទូទាំងពិភពលោក។ សូម្បីប្រជាជនទាំងអស់ចាក់វ៉ាក់សាំងរួចហើយក៏ដោយ យើងនឹងនៅតែមិនអាចលុបបំបាត់វាបានទេ»។
លោកបញ្ជាក់ថា៖ «ស្ទើរតែគ្រប់ប្រទេសទទួលស្គាល់រឿងនេះថាជាការពិត»។
ក្រៅពីការផ្តោតលើការថែទាំនៅតាមផ្ទះ ចំពោះករណីក្នុងស្រុកដែលមិនមានរោគសញ្ញា លោក Lee បាននិយាយថាសិង្ហបុរីត្រូវការបន្តការធ្វើដំណើរអន្តរជាតិ៕ RR
