ភ្នំពេញៈ សម្ព័ន្ធសហគមន៍កសិកម្មកម្ពុជា Cambodia Agricultural Cooperation Alliance (CACA) រួមនឹងសមាគមមីក្រូហិរញ្ញវត្ថុកម្ពុជា (CMA) បានធ្វើពិធីចុះហត្ថលេខារួមគ្នាលើអនុស្សរណៈនៃការយោគយល់គ្នាក្នុងគោលបំណង ដើម្បីលើកកម្ពស់ការទទួលបានសេវាហិរញ្ញវត្ថុ ចំណេះដឹងហិរញ្ញវត្ថុ និងការអភិវឌ្ឍសម្រាប់វិស័យកសិកម្ម។
ពិធីនេះត្រូវបានធ្វើឡើងកាលពីសប្តាហ៍មុនតាមប្រព័ន្ធអនឡាញ។
លោក គា បូរាណ ប្រធានក្រុមប្រឹក្សាភិបាលនៃសមាគមមីក្រូហិរញ្ញវត្ថុកម្ពុជា បាននិយាយថា ការសហការនៃស្ថាប័នទាំង ២ នឹងរួមចំណែក ដើម្បីធ្វើឱ្យវិស័យកសិកម្មនៅកម្ពុជាទទួលបាននូវសេវាហិរញ្ញវត្ថុកាន់តែទូលំទូលាយ និងប្រកបដោយនិរន្តរភាព។
លោកថ្លែងថា៖ «អនុស្សរណៈនេះមានគោលបំណងលើកកម្ពស់បរិយាប័ន្នហិរញ្ញវត្ថុ និងកិច្ចសហប្រតិបត្តិការនៃស្ថាប័នទាំង ២ តាមរយៈការបញ្ជ្រាបចំណេះដឹងហិរញ្ញវត្ថុដល់សមាជិកសហគមន៍ ការសិក្សាស្រាវជ្រាវ ការអនុវត្តគម្រោងរួមគ្នា ដើម្បីដោះស្រាយបញ្ហាប្រឈមនានាក្នុងវិស័យទាំង ២ និងជំរុញឱ្យមានការទទួលបានសេវាហិរញ្ញវត្ថុប្រកបដោយការទទួលខុសត្រូវ និងនិរន្តរភាព»។
ចំណែកលោក ហង់ សុគន្ធ ប្រធានក្រុមប្រឹក្សាភិបាលសម្ព័ន្ធសហគមន៍កសិកម្មកម្ពុជាបានឱ្យដឹងថា ដើម្បីអភិវឌ្ឍវិស័យកសិកម្មប្រកបដោយភាពរឹងមាំ និងនិរន្តរភាព គឺទាមទារឱ្យអ្នកពាក់ព័ន្ធត្រូវយល់ដឹងពីសេវាហិរញ្ញវត្ថុឱ្យបានច្បាស់លាស់ ព្រោះសេវាហិរញ្ញវត្ថុ នឹងអាចជួយទ្រទ្រង់វិស័យនេះឱ្យរីកចម្រើនបានឆាប់រហ័ស។
លោកបន្តថា៖ «ពិតណាស់យើងត្រូវអភិវឌ្ឍតាមរយៈការពង្រឹងសមត្ថភាពដល់សហគមន៍កសិកម្ម និងសហភាពសហគមន៍កសិកម្មនឹងត្រូវការការចូលរួមជាចាំបាច់ពីភាគីពាក់ព័ន្ធ ពិសេសពីវិស័យហិរញ្ញវត្ថុ»។
លោក ស្រ៊ុន សុខុម អគ្គនាយករងនៃអគ្គនាយកដ្ឋានកសិកម្មនៃក្រសួងកសិកម្មបានកោតសរសើរចំពោះការចុះអនុស្សរណៈនេះ ដោយលោកបាននិយាយថា៖ «អនុស្សរណៈនៃការយោគយល់គ្នារវាងសម្ព័ន្ធសហគមន៍កសិកម្មកម្ពុជា និងសមាគមមីក្រូហិរញ្ញវត្ថុកម្ពុជា គឺជាការឆ្លើយតបទៅនឹងអភិក្រមនៃភាពជាដៃគូ ព្រមទាំងចូលរួមចំណែកលើកកម្ពស់បរិយាប័ន្នហិរញ្ញវត្ថុនៅក្នុងវិស័យកសិកម្ម ពិសេសសម្រាប់គ្រួសារកសិករនៅជនបទនៃប្រទេសកម្ពុជា»៕ LA