ភ្នំពេញៈ ភ្ញៀវទេសចរជាង ១៣,៨ ម៉ឺននាក់បានដើរកម្សាន្តក្នុងរយៈពេល ៣ ថ្ងៃចុងសប្តាហ៍កន្លងមកដែលចំនួននេះបង្ហាញពីសញ្ញាវិជ្ជមានជាលំដាប់នៃវិស័យទេសចរណ៍ផ្ទៃក្នុង បន្ទាប់ពីបានធ្លាក់ចុះយ៉ាងគំហុកនាអំឡុងពេលកូវីដ ១៩ ឆ្លងរាលដាលខ្លាំង ពិសេសព្រឹត្តិការណ៍សហគមន៍ ២០ កុម្ភៈ។ នេះបើយោងតាមលោក ថោង ខុន រដ្ឋមន្ត្រីក្រសួងទេសចរណ៍។
ទិន្នន័យបង្ហាញថា ក្នុងរយៈពេល ៣ ថ្ងៃចាប់ពីថ្ងៃទី ១៥-១៧ ខែតុលា ឆ្នាំ ២០២១ ដែលជាថ្ងៃចុងសប្តាហ៍មានភ្ញៀវទេសចរក្នុងស្រុកចេញដើរកម្សាន្តសរុប ១៣៨ ០៩៩ នាក់ក្នុងនោះភ្ញៀវជាតិ ១៣៥ ០៦៦ នាក់ និងភ្ញៀវបរទេសផ្ទៃក្នុង ៣ ០៣៣ នាក់។
សម្រាប់គោលដៅសំខាន់ៗរួមមាន ខេត្តព្រះសីហនុ ២៨ ៧២៨ នាក់, ភ្នំពេញ ២៥ ៦៩៨ នាក់, កំពត ១៨ ៤៣៧ នាក់, កំពង់ស្ពឺ ៨ ៥៥៥ នាក់, សៀមរាប ៧ ៦៨៧ នាក់, ពោធិ៍សាត់ ៧ ៤៥៩ នាក់ និងខេត្តកែប ៧ ១៣៦ នាក់។
លោក ថោង ខុន ឱ្យដឹងថា បន្ទាប់ពីការឆ្លងរាលដាលជំងឺកូវីដ ១៩ នៅកម្ពុជាមានភាពធូរស្រាល ស្របពេលយុទ្ធនាការចាក់វ៉ាក់សាំងទទួលបានលទ្ធផលល្អ សកម្មភាពវិស័យទេសចរណ៍ផ្ទៃក្នុងបានបង្ហាញពីសញ្ញាកើនឡើងជាលំដាប់។ ជាក់ស្តែងតួលេខចុងសប្តាហ៍ពីថ្ងៃទី ១៥-១៧ បានកើនប្រមាណ ១៨,២១ ភាគរយធៀបនឹងចុងសប្តាហ៍មុនពិធីបុណ្យភ្ជុំបិណ្ឌ។
លោកបានអះអាងថា៖ «បើទោះបីថ្ងៃឈប់សម្រាករយៈពេលយូរនៃពិធីបុណ្យភ្ជុំបិណ្ឌកន្លងផុតទៅ ក៏ចរន្តភ្ញៀវទេសចរផ្ទៃក្នុងទៅកាន់គោលដៅទេសចរណ៍នានានៅតែមានសកម្មភាពគួរឱ្យកត់សម្គាល់»។
ទោះយ៉ាងណា លោក ថោង ខុន ក៏លើកឡើងដែរថា ចំនួននេះបើធៀបនឹងចំនួនប្រជាជនដើរកម្សាន្តនៅក្នុងឱកាសពិធីបុណ្យ គឺឃើញថា ថយចុះប្រមាណ ៤៣,៤៦ ភាគរយ។
លោកបន្ថែមថា បើទោះបីសម្ទុះនៃកំណើនភ្ញៀវទេសចរផ្ទៃក្នុងកំពុងចាប់ផ្តើមកើនឡើងវិញក៏ដោយ ក៏ការផ្សព្វផ្សាយរបស់អាជ្ញាធរពាក់ព័ន្ធនឹងវិធានសុវត្ថិភាពទេសចរណ៍ និង SOP ត្រូវបានធ្វើជាប្រចាំដែរ ដែលមានដូចជា ការផ្សព្វផ្សាយ និងចុះវាយតម្លៃមូលដ្ឋានអាជីវកម្មស្របតាមវិធានសុវត្ថិភាពទេសចរណ៍ និងនីតិវិធីប្រតិបត្តិស្តង់ដាអប្បបរមា (SOP) និងការបង្ហាញកាតចាក់វ៉ាក់សាំងនៅពេលចូលរមណីយដ្ឋានជាដើម។
ប្រធានសមាគមទីភ្នាក់ងារទេសចរណ៍កម្ពុជា លោកស្រី ឆាយ ស៊ីវលីន បាននិយាយថា ចលនាទេសចរណ៍ផ្ទៃក្នុងបានងើបឡើងវិញជាបន្តបន្ទាប់ ដែលសកម្មភាពនេះគឺជាកម្លាំងចលករក្នុងការធ្វើឱ្យវិស័យទេសចរណ៍កម្រើកឡើងវិញ ខណៈការផ្ទុះឡើងជំងឺកូវីដ ១៩ ពិសេសព្រឹត្តិការណ៍សហគមន៍ ២០ កុម្ភៈ បានធ្វើឱ្យវិស័យមួយនេះត្រូវជាប់គាំងស្ទើរទាំងស្រុងនាពេលកន្លងមក។ លោកស្រីបានបន្តថា ការទទួលជោគជ័យនៃទេសចរណ៍ក្នុងស្រុក ក៏នឹងរួមចំណែកក្នុងការជួយផ្សព្វផ្សាយពីសក្តានុពលវិស័យនេះទៅកាន់ទីផ្សារទេសចរណ៍អន្តរជាតិផងដែរ។
លោកស្រីនិយាយថា៖ «ការធ្លាក់ចុះចំនួនឆ្លងថ្មី (កូវីដ ១៩) និងអត្រាចាក់វ៉ាក់សាំងខ្ពស់នៅកម្ពុជា គឺជាសញ្ញាវិជ្ជមានសម្រាប់វិស័យទេសចរណ៍។ កំណើនអ្នកដើរកម្សាន្តក្នុងស្រុកបានបង្ហាញពីទំនុកចិត្ត និងការធានាបានផ្នែកសុវត្ថិភាពផ្នែកសន្តិសុខ និងការឆ្លងជំងឺកូវីដ ១៩ផងដែរ»។
កាលពីឆ្នាំ ២០២០ ចំនួនភ្ញៀវទេសចរផ្ទៃក្នុង ដែលបានធ្វើដំណើរកម្សាន្តទូទាំងប្រទេសមានចំនួនជាង ៩,០៤ លាននាក់ក្នុងនោះភ្ញៀវទេសចរជាតិមាន ៧,២៣ លាននាក់ ថយចុះ ៣៦,១ ភាគរយធៀបនឹងឆ្នាំ ២០១៩ ចំណែកភ្ញៀវទេសចរបរទេសមាន ១,៨១ លាននាក់ថយចុះ ៧៨,៣ ភាគរយ។ នេះបើតាមក្រសួងទេសចរណ៍៕ LA