.jpg)
កម្ពុជា បាននាំចេញកង់ជាច្រើនទៅលក់នៅទីផ្សារអាមេរិក និងអឺរ៉ុប។ រូបថត AFP
ភ្នំពេញៈ កម្ពុជាទទួលបានប្រាក់ប្រមាណជាង ៣,៣៧ ពាន់លានដុល្លារពីការនាំផលិតផលវិនិយោគមិនមែនកាត់ដេរក្នុងរយៈពេល ៩ ខែឆ្នាំ ២០២១ កើនជាង ៥០ ភាគរយបើធៀបនឹងរយៈពេលដូចគ្នាឆ្នាំ ២០២០ ដែលភាគច្រើនបានពីចំណែកទីផ្សារនៅអាមេរិក និងសហគមន៍អឺរ៉ុប។ នេះបើតាមអគ្គនាយកដ្ឋានគយ និងរដ្ឋាករកម្ពុជា។
សេចក្តីប្រកាសព័ត៌មាននៃកិច្ចប្រជុំរបស់អគ្គនាយកដ្ឋានគយ និងរដ្ឋាករកម្ពុជា កាលពីសប្តាហ៍មុន បង្ហាញថា ចាប់ពីខែមករា-ខែកញ្ញា ឆ្នាំ ២០២១ កម្ពុជាបាននាំចេញផលិតផលវិនិយោគមិនមែនកាត់ដេរក្នុងតម្លៃសរុប ៣ ៣៧៩,៤ លានដុល្លារ កើនឡើង ១ ១៤០ លានដុល្លារ ឬស្មើនឹង ៥០,៩ ភាគរយបើធៀបនឹងរយៈពេលដូចគ្នាឆ្នាំ ២០២០។
អគ្គនាយកដ្ឋានគយ និងរដ្ឋាករកម្ពុជាអះអាងថា៖ «តួលេខកំណើននៃការនាំចេញផលិតផលវិនិយោគមិនមែនកាត់ដេរ បានឆ្លុះបញ្ចាំងពីលទ្ធផលនៃការអនុវត្តគោលនយោបាយរបស់រាជរដ្ឋាភិបាលក្នុងការធ្វើពិពិធកម្មមូលដ្ឋានវិស័យឧស្សាហកម្មនៅកម្ពុជា និងការវិលត្រឡប់មករកភាពល្អប្រសើរនៃទីផ្សារសហរដ្ឋអាមេរិក និងសហគមន៍អឺរ៉ុប»។
យោងតាមអគ្គនាយកដ្ឋានគយ និងរដ្ឋាករកម្ពុជា ផលិតផលមិនមែនកាត់ដេរ រួមមាន កង់ គ្រឿងបំណែកអេឡិចត្រូនិក បង្គុំខ្សែភ្លើង និងគ្រឿងបន្លាស់រថយន្ត អំពូលលម្អ ផលិតផលឈើប្រណីត ផលិតផលប្លាស្ទិក ស្បែកសត្វកែច្នៃ និងផលិតផលផ្សេងៗទៀត។
អនុប្រធានសភាពាណិជ្ជកម្មកម្ពុជា លោក លឹម ហេង បានប្រាប់ ភ្នំពេញ ប៉ុស្តិ៍ នាថ្ងៃទី ១៨ ខែតុលា ថា ទោះបីស្ថានភាពការឆ្លងរាលដាលជំងឺកូវីដ ១៩ លើពិភពលោកមិនទាន់ថមថយ ក៏សកម្មភាពនៃការផលិត និងនាំចេញរបស់កម្ពុជានៅតែល្អប្រសើរ។ ភាពល្អប្រសើរនេះ គឺដោយសារមានកត្តាមួយចំនួនដូចជា ស្ថិរភាពនយោបាយ, ច្បាប់វិនិយោគមានលក្ខណៈអំណោយផល, មានទំនាក់ទំនងល្អ និងកិច្ចព្រមព្រៀងពាណិជ្ជកម្មជាមួយប្រទេសធំៗ, ទីតាំងភូមិសាស្ត្រមានភាពអំណោយផល, និងសម្បូរបែបកម្លាំងពលកម្មជំនាញ ជាដើម។
លោកប្រាប់ទៀតថា៖ «កំណើនការនាំចេញផលិតផលមិនមែនកាត់ដេរ បញ្ជាក់ពីភាពរឹងមាំនៃវិស័យផលិតកម្ម និងទីផ្សារនាំចេញរបស់កម្ពុជា។ កំណើននេះមានទំហំកាន់តែធំនៅពេលដែលកិច្ចព្រមព្រៀងពាណិជ្ជកម្មកម្ពុជា ជាមួយប្រទេសនានាចូលជាធរមាន ពិសេសទីផ្សារចិន»។
លោកលើកឡើងថា ការអនុម័តឱ្យប្រើប្រាស់ច្បាប់វិនិយោគថ្មី ព្រមនឹងការកែសម្រួលនីតិវិធីស្មុគស្មាញដែលមានកន្លងមក និងការសម្រេចបានកិច្ចព្រមព្រៀងពាណិជ្ជកម្មជាមួយសេរីជាលក្ខណៈទ្វេភាគី និងពហុភាគីនឹងក្លាយជាមេដែកថ្មីបន្ថែមទៀត ក្នុងការស្រូបទាញវិនិយោគិនកាន់តែច្រើនឱ្យចូលមកបណ្តាក់ទុននៅកម្ពុជា។
រដ្ឋាភិបាលកម្ពុជា តាមរយៈក្រសួងសុខាភិបាលកាលពីថ្ងៃទី ១៦ ខែតុលា បានចេញសេចក្តីជូនដំណឹងមួយដែលនឹងអនុញ្ញាតឱ្យអ្នកវិនិយោគ និងអ្នកជំនាញដែលចាក់វ៉ាក់សាំងប្រឆាំងនឹងជំងឺកូវីដ ១៩ គ្រប់ដូស ចូលមកកម្ពុជា ដោយធ្វើចត្តាឡីស័កត្រឹមរយៈពេល ៣ ថ្ងៃ ចំណែកជនជាតិខ្មែរ និងបរទេសទូទៅ ត្រូវធ្វើចត្តាឡីស័ក ៧ ថ្ងៃ។
ក្នុងរយៈពេល ៩ ខែឆ្នាំ ២០២១ ក្រុមប្រឹក្សាអភិវឌ្ឍន៍កម្ពុជា (CDC) បានអនុម័តគម្រោងវិនិយោគសរុប ១៣៤ ដែលមានទុនវិនិយោគសរុប ៣,៣ ពាន់លានដុល្លារ។ ក្នុងចំណោមនោះការវិនិយោគនៅក្រៅតំបន់សេដ្ឋកិច្ចពិសេស មាន ១០១ គម្រោង ក្រោមទុនវិនិយោគ ១,៤ ពាន់លានដុល្លារ និងក្នុងតំបន់សេដ្ឋកិច្ចពិសេស ៣៣ គម្រោង ស្មើនឹងទឹកប្រាក់ ១,៩ ពាន់លានដុល្លារ។ នេះបើតាម CDC។
CDC បានឱ្យដឹងទៀតថា គម្រោងភាគច្រើនគឺផ្តោតលើវិស័យកសិកម្ម និងកសិឧស្សាហកម្ម ឧស្សាហកម្ម ទេសចរណ៍ និងហេដ្ឋារចនាសម្ព័ន្ធ។
ក្នុងឆ្នាំ ២០២០ កម្ពុជាបាននាំចេញក្នុងទឹកប្រាក់ ១៧ ២១៥,៣៧ លានដុល្លារ កើនឡើង ១៦,៧២ ភាគរយធៀបនឹងឆ្នាំ ២០១៩ ដែលមាន ១៤ ៧៤៨,៧៤ លានដុល្លារ។ នេះបើតាមទិន្នន័យក្រសួងពាណិជ្ជកម្ម៕ LA
