ទីក្រុងលុចសំបួៈ Josep Borrell ប្រធានគោលនយោបាយការបរទេសអឺរ៉ុប បាននិយាយកាលពីថ្ងៃចន្ទថា សហភាពអឺរ៉ុបត្រៀមរួចរាល់ដាក់ទណ្ឌកម្មលើក្រុមហ៊ុនអាកាសចរណ៍រដ្ឋនៃប្រទេសបេឡារុស ដើម្បីព្យាយាមទាប់ស្កាត់ការធ្វើចំណាកស្រុកខុសច្បាប់ទៅតំបន់អឺរ៉ុប។
សហភាពអឺរ៉ុបចោទប្រកាន់អាជ្ញាធរបេឡារុសពីការដាក់អ្នកចំណាកស្រុកពីតំបន់មជ្ឈឹមបូព៌ា និងតំបន់អាហ្វ្រិកមកកាន់ទីក្រុងមីនស្ក៍ហើយ បន្ទាប់មកបញ្ជូនពួកគេចូលទៅក្នុងប្លុកអឺរ៉ុបដោយថ្មើរជើងជាការសងសឹកចំពោះទណ្ឌកម្មដែលបានដាក់លើការបង្ក្រាបលើគណបក្សប្រឆាំង។
លោក Borrell បាននិយាយបន្ទាប់ពីកិច្ចប្រជុំរដ្ឋមន្ត្រីការបរទេសអឺរ៉ុបក្នុងទីក្រុងលុចសំបួថា៖ «យើងត្រៀមរួចរាល់ដើម្បីអនុវត្តទណ្ឌកម្មប្រឆាំងក្រុមហ៊ុនជាតិបេឡារុស»។
ប្លុកអឺរ៉ុបបានដាក់ទណ្ឌកម្មជាស្រេចទៅហើយលើវិស័យសំខាន់ៗនៃសេដ្ឋកិច្ចប្រទេសបេឡារុស ព្រមទាំងដាក់ពិន្ទុសម្រាប់ពួកមន្ត្រី រួមទាំងលោកប្រធានាធិបតី Alexander Lukashenko និងកូនប្រុសរបស់លោកចាប់តាំងពីការបោះឆ្នោតប្រកបដោយជម្លោះក្នុងខែសីហាឆ្នាំមុន។
រដ្ឋជាសមាជិករបស់សហភាពអឺរ៉ុបមានប្រទេសលីតួអានី និងប៉ូឡូញបានប្រទះឃើញជនចំណាកស្រុករាប់ពាន់នាក់ឆ្លងកាត់ព្រំដែនខុសច្បាប់ពីប្រទេសបេឡារុស ចាប់តាំងពីដើមឆ្នាំនេះក្នុងអ្វីដែលប្រទេសបេឡារុសហៅថា ជាយុទ្ធនាការរៀបចំឡើង។
លោក Heiko Maas រដ្ឋមន្ត្រីការបរទេសអាល្លឺម៉ង់បានហៅលោក Lukashenko ជាប្រធានរៀបចំរត់ពន្ធមនុស្សរៀបចំដោយរដ្ឋមួយ»។
លោក Maas បាននិយាយថា៖ «យើងមិនស្ម័គ្រចិត្តមើលក្រុមហ៊ុនទាំងឡាយណា ដូចជាអាកាសចរណ៍នេះរកលុយបានដោយការនាំយកជនភៀសខ្លួននោះទេ»។
លោកបន្ថែមថា៖ «យើងត្រូវដាក់ទណ្ឌកម្មដើម្បីឱ្យដឹងថា យើងមិនអាចអត់ធ្មត់រឿងបែបនេះតទៅទៀតបាន»។
រដ្ឋជាសមាជិកអឺរ៉ុបពីតំបន់បាល់ទិចកំពុងជំរុញឱ្យបញ្ឈប់ភតិសន្យា (ជួល) យន្តហោះទៅក្រុមហ៊ុន Belavia ដែលជាក្រុមហ៊ុនអាកាសចរណ៍ជាតិបេឡារុស ជាផ្នែកនៃកញ្ចប់ថ្មីការដាក់ទណ្ឌកម្មរៀបចំឡើងក្នុងទីក្រុងប្រ៊ុចសែល។
ប៉ុន្តែប្រទេសអៀកឡង់ ដែលជាមជ្ឈមណ្ឌលក្រុមហ៊ុនជួលយន្តហោះក្នុងតំបន់អឺរ៉ុប បានព្រមមានថា វាប្រហែលលំបាកដើម្បីសើរើកិច្ចសន្យាដែលមានស្រាប់។
លោក Simon Coveney រដ្ឋមន្ត្រីការបរទេសអៀកឡង់បាននិយាយថា៖ «ទីណាដែលមានកិច្ចសន្យារួចហើយ យើងមិនច្បាស់ពីវិធីដែលអាចធ្វើមិនឱ្យឈឺចាប់ដោយស្របច្បាប់ទេ ប៉ុន្តែអ្វីដែលយើងកំពុងនិយាយយ៉ាងច្បាស់គឺថា មិនគួរមានកុងត្រាជួលថ្មីទៅថ្ងៃអនាគតឡើយ»។
អឺរ៉ុបបានបញ្ឈប់កិច្ចសន្យាជាមួយអឺរ៉ាក់ ដើម្បីបញ្ឈប់ការហោះហើរដាក់ជនចំណាកស្រុកទៅទីក្រុងមីនស្ក៍ ដែលជួយកាត់បន្ថយចំនួនមនុស្សពីប្រទេសអឺរ៉ាក់៕ RR