ភ្នំពេញៈ លោក ជា ចាន់តូ ទេសាភិបាលធនាគារជាតិនៃកម្ពុជា (NBC) បាននិយាយថា ការចាក់វ៉ាក់សាំងគឺជាគន្លឹះនៃការងើបឡើងវិញពីវិបត្តិ ខណៈលំហនៃការបន្តការប្រើប្រាស់នយោបាយគាំទ្រ និងការគ្រប់គ្រងការឆ្លងរាលដាលជំងឺកូវីដ-១៩ គឺជាកម្លាំងចលករជំរុញល្បឿននៃការងើបឡើងវិញនៃសេដ្ឋកិច្ច។
ការលើកឡើងនេះត្រូវបានធ្វើនៅក្នុងកិច្ចប្រជុំតុមូល តាមរយៈប្រព័ន្ធអនឡាញរវាងមូលនិធិរូបិយវត្ថុអន្តរជាតិ (IMF) និងអាស៊ាន ដែលមានការចូលរួមពីទេសាភិបាលធនាគារកណ្តាល និងរដ្ឋមន្ត្រីហិរញ្ញវត្ថុអាស៊ាន កាលពីថ្ងៃទី ១៥ ខែតុលា ឆ្នាំ ២០២១។
លោក ជា ចាន់តូ បានលើកឡើងថា ក្នុងវិបត្តិកូវីដ ១៩ IMF បានបង្កើនវិភាជន៍អេសដេអ៊ែ (SDR) សម្រាប់ពង្រឹងជំនឿចិត្ត និងបង្កើនលម្ហនៃការអនុវត្តនយោបាយសេដ្ឋកិច្ច។ លោកក៏បានឯកភាពលើការលើកឡើងរបស់លោកស្រី Kristalina Georgieva ប្រធានមូលនិធិរូបិយវត្ថុអន្តរជាតិ និងថ្នាក់ដឹកនាំវិស័យហិរញ្ញវត្ថុអាស៊ានថា ការចាក់វ៉ាក់សាំង គឺជាគន្លឹះនៃការងើបឡើងវិញពីវិបត្តិ ហើយលម្ហនៃការបន្តការប្រើប្រាស់នយោបាយគាំទ្រ និងការគ្រប់គ្រងការឆ្លងរីករាលដាលនៃជំងឺកូវីដ ១៩ គឺជាចលករកម្លាំងជំរុញល្បឿននៃការងើបឡើងវិញនៃសេដ្ឋកិច្ច។
លោកបានថ្លែងថា៖ «រាជរដ្ឋាភិបាលកម្ពុជាបានបង្កើនល្បឿននៃការចាក់វ៉ាក់សាំង ដែលបច្ចុប្បន្នអត្រាប្រជាជនទទួលបានវ៉ាក់សាំងមានប្រមាណជាង ៨០ ភាគរយនៃប្រជាជនសរុប គឺខ្ពស់ជាងកម្រិតដែលមូលនិធិរូបិយវត្ថុអន្តរជាតិបានផ្តល់អនុសាសន៍ដល់ប្រទេសជាសមាជិកថា គួរសម្រេចការចាក់វ៉ាក់សាំងយ៉ាងហោចឱ្យបាន ៤០ ភាគរយនៅត្រឹមចុងឆ្នាំ ២០២១ និង ៧០ ភាគរយនៅឆ្នាំ ២០២២ សម្រាប់គាំទ្រការងើបឡើងនៃសេដ្ឋកិច្ច»។
លោក អូន ព័ន្ធមុនីរ័ត្ន រដ្ឋមន្ត្រីក្រសួងសេដ្ឋកិច្ច និងហិរញ្ញវត្ថុកាលពីថ្ងៃ ១៨ ខែតុលា បានលើកឡើងថា ដើម្បីកាត់បន្ថយផលប៉ះពាល់អវិជ្ជមាននៃការរាតត្បាតជំងឺកូវីដ ១៩ មកលើសង្គម និងសេដ្ឋកិច្ចកម្ពុជា រដ្ឋាភិបាលបានបន្តបង្កើនការចាក់វ៉ាក់សាំងប្រឆាំងនឹងជំងឺកូវីដ ១៩ ដល់ប្រជាជនដែលមានអាយុចាប់ពីអាយុ ៦ ឆ្នាំឡើងទៅ និងផ្តល់ដូសជំរុញដល់ប្រជាជនអាយុចាប់ពី ១៨ ឆ្នាំ និងមនុស្សចាស់។
លោកថ្លែងថា៖ «ជាមួយនឹងកិច្ចខិតខំប្រឹងប្រែងដើម្បីអនុវត្តវិធានការរដ្ឋបាល និងសុខភាព ប្រកបដោយប្រសិទ្ធភាព ជាពិសេសយុទ្ធសាស្ត្រ ៦ ចំណុចរបស់សម្តេចនាយករដ្ឋមន្ត្រីសម្រាប់បង្ការការរីករាលដាលជំងឺកូវីដ ១៩ ក្នុងពេលឆាប់ៗនេះប្រទេសកម្ពុជានឹងមានភាពស៊ាំក្នុងសហគមន៍ ដែលជាមូលដ្ឋានចាំបាច់មួយសម្រាប់ការបើកដំណើរការសេដ្ឋកិច្ចពេញលេញឡើងវិញ និងសកម្មភាពសង្គមប្រកបដោយនិរន្តរភាព»។
លោកលើកឡើងទៀតថា៖ «ជាមួយនឹងការគិតគូរនេះ រដ្ឋាភិបាលក៏កំពុងជួយសម្រួលដល់ការបើក និងដំណើរការឡើងវិញនូវវិស័យសំខាន់ៗមួយចំនួនឆ្ពោះទៅរកការរស់នៅជាមួយជំងឺកូវីដ ១៩ ក្នុងគន្លងប្រក្រតីភាពថ្មី ក៏ដូចជាផែនការដាក់ឱ្យដំណើរការយុទ្ធសាស្ត្រដើម្បីការស្តារ និងលើកកម្ពស់កំណើនសេដ្ឋកិច្ចសម្រាប់ការរស់នៅជាមួយកូវីដ ១៩ ក្រោមគន្លងប្រក្រតីថ្មីត្រឹមចុងឆ្នាំ ២០២១ ដើម្បីស្តារការអភិវឌ្ឍប្រទេសជាតិប្រកបដោយភាពធន់ និរន្តរភាព និងបរិយាប័ន្ន»។
មូលនិធិរូបិយវត្ថុអន្តរជាតិ (IMF) បានព្យាករថា សេដ្ឋកិច្ចកម្ពុជាអាចនឹងកើនឡើងប្រមាណ ២ ភាគរយនៅឆ្នាំនេះ និង ៥ ភាគរយនៅឆ្នាំ ២០២២ ដោយមានការគាំទ្រយ៉ាងច្រើនពីរដ្ឋាភិបាល និងការស្ទុះងើបឡើងវិញនៃតម្រូវការខាងក្រៅ៕ LA