ទីក្រុងកូឡាឡាំពួៈ សហរដ្ឋអាមេរិកបានហាមឃាត់ការនាំចូលពីក្រុមហ៊ុនផលិតស្រោមដៃជ័ររបស់ម៉ាឡេស៊ីជុំវិញការចោទប្រកាន់ពីការរំលោភបំពានការងារ ដែល ជាក្រុមហ៊ុនចុងក្រោយបង្អស់ពីប្រទេសនេះ ដើម្បីប្រឈមនឹងការហាមឃាត់បែបនេះ។
ប្រទេសនៅអាស៊ីអាគ្នេយ៍ដែលអភិវឌ្ឍន៍លឿននេះគឺជាជម្រករបស់ពលករចំណាកស្រុករាប់លាននាក់ ដែលធ្វើការងារនៅក្នុងផលិតកម្ម និងកសិកម្ម ប៉ុន្តែអ្នករិះគន់និយាយថាពួកគេតែងតែត្រូវគេធ្វើបាប។
ភ្នាក់ងារគយ និងការពារព្រំដែនអាមេរិក (CBP) នៃក្រសួងសន្តិសុខជាតិ បានប្រកាសពីការហាមឃាត់លើស្រោមដៃ Supermax កាលពីថ្ងៃពុធ បន្ទាប់ពីភស្តុតាងបង្ហាញអំពីការប្រើកម្លាំងពលកម្មដោយបង្ខំក្នុងប្រតិបត្តិការផលិតកម្មរបស់ក្រុមហ៊ុន។
លោក AnnMarie R. Highsmith មន្ត្រីភ្នាក់ងារ CBP បាននិយាយថា៖ « CBP មានភស្តុតាងគ្រប់គ្រាន់ ដើម្បីសន្និដ្ឋានថា Supermax ... និងក្រុមហ៊ុនបុត្រសម្ព័ន្ធរបស់ខ្លួនផលិតស្រោមដៃដោយរំលោភលើច្បាប់ពាណិជ្ជកម្មអាមេរិក»។
លោកបន្ថែមថា៖ «ដរាបណា Supermax និងក្រុមហ៊ុនបុត្រសម្ព័ន្ធរបស់ខ្លួនអាចបង្ហាញដំណើរការផលិតកម្មរបស់ពួកគេគ្មានការប្រើកម្លាំងពលកម្មដោយបង្ខំ នោះទំនិញរបស់ពួកគេមិនត្រូវបានស្វាគមន៍នៅទឹកដីអាមេរិកទេ»។
ភ្នាក់ងារមិនបានផ្តល់ព័ត៌មានលម្អិតអំពីការរំលោភកម្លាំងពលកម្មដែលរងការចោទប្រកាន់នៅក្រុមហ៊ុនដែលនាំចេញទៅកាន់ប្រទេស ១៦០ និងអាចផលិតស្រោមដៃរហូតដល់ទៅ ២៤ លានក្នុងមួយឆ្នាំ។
ប៉ុន្តែ លោក Andy Hall សកម្មជនសិទ្ធជនចំណាកស្រុក ដែលស៊ើបអង្កេតលើក្រុមហ៊ុន Supermax បាននិយាយថា ការត្អូញត្អែររបស់កម្មករមានចាប់ពីមិនអាចចេញពីបរិវេណរោងចក្រ ដល់ស្ថានភាពរស់នៅចង្អៀត និងការកាត់ប្រាក់ខែខុសច្បាប់។
លោក Hall និយាយថា លោកសង្ឃឹមថា៖ «សកម្មភាពអនុវត្តពាណិជ្ជកម្មនេះប្រឆាំងចំពោះក្រុមហ៊ុននឹងនាំទៅរកការផ្លាស់ប្តូរក្នុងលក្ខខណ្ឌរស់នៅ និងការងារដែលរំលោភបំពានប្រឈមដោយកម្មកររបស់ក្រុមហ៊ុនក្នុងប្រទេសម៉ាឡេស៊ី»។
Supermax មិនឆ្លើយតបចំពោះសំណើរសុំឱ្យមានការពន្យល់នោះទេ៕ RR