ធនាគារ កាណាឌីយ៉ា បានទទួលពានរង្វាន់ « Strongest Bank in Cambodia for 2021» ៣ ឆ្នាំជាប់ៗគ្នាពីស្ថាប័ន The Asian Banker នៅក្នុងពិធីប្រគល់រង្វាន់តាមអនឡាញកាលពីថ្ងៃព្រហស្បតិ៍។
លោក Raymond Sia នាយកប្រតិបត្តិធនាគារ កាណាឌីយ៉ា បានមានប្រសាសន៍ថា៖ «ធនាគារ កាណាឌីយ៉ា ពិតជាមានកិត្តិយសណាស់ចំពោះសមិទ្ធផលដ៏អស្ចារ្យមួយនេះ បន្ទាប់ពីត្រូវបានទទួលស្គាល់ដោយស្ថាប័ន The Asian Banker ចំនួន ៣ ឆ្នាំជាប់ៗគ្នា»។
«ក្នុងរយៈពេល ៣ ឆ្នាំចុងក្រោយនេះ ធនាគារបានវិវឌ្ឍ និងបន្តផ្លាស់ប្តូរខ្លួនឯង ដោយផ្តោតការយកចិត្តទុកដាក់ និងវិនិយោគបន្ថែមទៅលើការប្រើប្រាស់បច្ចេកវិទ្យា ដើម្បីសម្រួលដំណើរការ និងកែលម្អបទពិសោធអតិថិជន និងធ្វើពិពិធកម្មផលិតផលរបស់យើង ដើម្បីបំពេញតម្រូវការអតិថិជនរបស់យើងដែលមកពីផ្នែកផ្សេងៗគ្នា។ យើងនឹងបន្តវិនិយោគលើអតិថិជន និងសហគមន៍របស់យើង»។
«ពានរង្វាន់នេះក៏មានអត្ថន័យពិសេសដែរ ខណៈធនាគារ កាណាឌីយ៉ាប្រារព្ធខួបទី ៣០ ឆ្នាំរបស់ខ្លួននៅក្នុងឆ្នាំនេះ។ វាគឺជាព្រឹត្តិការណ៍ដ៏សំខាន់ និងក៏ជាមោទនភាពមួយសម្រាប់ធនាគារដែរ។ ធនាគារ កាណាឌីយ៉ា នឹងមិនអាចសម្រេចបាននូវសមិទ្ធផលទាំងនេះទេ ប្រសិនបើគ្មានមូលដ្ឋានគ្រឹះដ៏រឹងមាំ និងការណែនាំដ៏ឈ្លាសវៃពីប្រធានក្រុមប្រឹក្សាភិបាលរបស់យើងគឺអ្នកឧកញ៉ាបណ្ឌិត ពុង ឃាវសែ»។
លោកបន្តថា៖ «ពានរង្វាន់នេះក៏ជា សក្ខីភាព និងជាការទទួលស្គាល់ផងដែរ ចំពោះកិច្ចខិតខំប្រឹងប្រែង និងការប្តេជ្ញាចិត្តរបស់និយោជិតយើងនៅទូទាំង ៦៣ សាខា និងការិយាល័យកណ្តាល ហើយក៏សូមថ្លែងអំណរគុណយ៉ាងជ្រាលជ្រៅ ចំពោះអតិថិជនរបស់យើងទាំងអស់ ដែលបានគាំទ្រឥតងាករេ អស់រយៈពេល ៣០ ឆ្នាំកន្លងមកនេះ»៕