.jpg)
ភ្ញៀវទេសចរដើរកម្សាន្តនៅប្រាសាទអង្គរវត្ត ក្នុងអំឡុងពេលភ្ជុំបិណ្ឌ។ រូបថត រ៉ាហ៊ីម
ភ្នំពេញៈ រដ្ឋមន្ត្រីក្រសួងសេដ្ឋកិច្ច និងហិរញ្ញវត្ថុ លោក អូន ព័ន្ធមុនីរ័ត្ន មានជំនឿថា ផែនការមេអភិវឌ្ឍន៍ទេសចរណ៍ខេត្តសៀមរាប ២០២១-២០៣៥ នឹងជួយលើកស្ទួយវិស័យទេសចរណ៍កម្ពុជាក្នុងក្របខ័ណ្ឌទូទាំងប្រទេស ជាពិសេសនៅខេត្តសៀមរាប សំដៅប្រែក្លាយកម្ពុជាទៅជាគោលដៅទេសចរណ៍ប្រកបដោយគុណភាព សុវត្ថិភាព និងចីរភាព ព្រមទាំងជួយទ្រទ្រង់ដល់ការងើបឡើងវិញនៃកំណើនសេដ្ឋកិច្ចពីវិបត្តិជំងឺកូវីដ ១៩។
ការលើកឡើងនេះបានធ្វើឡើងក្នុងឱកាសនៃពិធីប្រកាសជាផ្លូវការនៃការដាក់ឱ្យអនុវត្តផែនការមេអភិវឌ្ឍន៍ទេសចរណ៍ខេត្តសៀមរាប ឆ្នាំ ២០២១-២០៣៥ ដែលបានរៀបចំកាលពីថ្ងៃទី ២០ ខែតុលា ឆ្នាំ ២០២១ តាមរយៈប្រព័ន្ធអនឡាញ។
លោក អូន ព័ន្ធមុនីរ័ត្ន ដែលជាគណៈអធិបតីនៃពិធីនេះបានលើកឡើងថា ផែនការមេអភិវឌ្ឍន៍ទេសចរណ៍ខេត្តសៀមរាប ឆ្នាំ ២០២១-២០៣៥ នឹងក្លាយជាយុទ្ធសាស្ត្រគន្លឹះនៃការធ្វើឱ្យវិស័យទេសចរណ៍នៅខេត្តសៀមរាប រួមទាំងប្រទេសកម្ពុជាទាំងមូល មានភាពល្អប្រសើរឡើងវិញ ពិសេសនៅក្នុង និងក្រោយវិបត្តិការឆ្លងរាលដាលជំងឺកូវីដ ១៩។ ផែនការមេអភិវឌ្ឍន៍ទេសចរណ៍ខេត្តសៀមរាប ឆ្នាំ ២០២១-២០៣៥ ត្រូវបានរដ្ឋាភិបាលកម្ពុជាអនុម័ត កាលពីថ្ងៃទី ៣០ ខែមីនា ឆ្នាំ ២០២១។
លោកនិយាយថា៖ «ជាមួយនឹងការដាក់ចេញ និងការជំរុញអនុវត្តយុទ្ធសាស្ត្រ និងផែនការមេគន្លឹះទាំងនេះខ្ញុំមានជំនឿថា នឹងអាចស្តារ និងលើកស្ទួយវិស័យទេសចរណ៍កម្ពុជានៅក្នុងក្របខ័ណ្ឌទូទាំងប្រទេស ពិសេសនៅខេត្តសៀមរាបផ្ទាល់តែម្តង ព្រមទាំងអាចចាប់យកកាលានុវត្តភាពពីវិបត្តិនេះ ដើម្បីដាក់ចេញនូវការកែទម្រង់ស៊ីជម្រៅសំដៅប្រែក្លាយកម្ពុជាជាគោលដៅទេសចរណ៍ប្រកបដោយគុណភាព សុវត្ថិភាព និងចីរភាពដែលនឹងផ្តល់ផ្លែផ្កាចូលរួមទ្រទ្រង់ការងើបឡើងវិញនៃកំណើនសេដ្ឋកិច្ចពីវិបត្តិកូវីដ ១៩»។
រដ្ឋមន្ត្រីក្រសួងទេសចរណ៍លោក ថោង ខុន លើកឡើងថា ផែនការមេអភិវឌ្ឍន៍ទេសចរណ៍ខេត្តសៀមរាប ឆ្នាំ ២០២១-២០៣៥ គឺជាផែនការយុទ្ធសាស្ត្រដ៏សំខាន់ក្នុងការធ្វើឱ្យសៀមរាបក្លាយជាគោលដៅទេសចរណ៍ដ៏ចម្បង និងទាក់ទាញក្នុងតំបន់ និងសកលលោកដោយឈរលើមូលដ្ឋានសម្បត្តិបេតិកភណ្ឌវប្បធម៌ ធម្មជាតិ ប្រវត្តិសាស្ត្រ សាសនា និងភាពជាខ្មែរ។
លោក ថោង ខុន បានលើកឡើងថា៖ «ដើម្បីអាចដើរតាមទស្សនវិស័យនៃការអភិវឌ្ឍទេសចរណ៍ប្រកបដោយចីរភាព និងនៅក្នុងបរិបទនៃការប្រកួតប្រជែងទេសចរណ៍កាន់តែខ្លាំងក្នុង និងក្រោយវិបត្តិជំងឺកូវីដ ១៩ ផែនការមេនេះបានកំណត់វិសាលភាពរួមគឺការរួមបញ្ចូលទាំងទេសចរណ៍វប្បធម៌ និងទេសចរណ៍ធម្មជាតិសម្រាប់ខេត្តសៀមរាប ខណៈបច្ចុប្បន្នការទស្សនាប្រាសាទអង្គរ គឺជាមូលហេតុចម្បងតែមួយរបស់ភ្ញៀវទេសចរដែលមកកាន់ខេត្តសៀមរាប»។
លោកបានបន្ថែមថា៖ «ផែនការមេអភិវឌ្ឍន៍ទេសចរណ៍ខេត្តសៀមរាប ឆ្នាំ ២០២១-២០៣៥ នឹងប្រែក្លាយខេត្តសៀមរាបទៅជាគោលដៅទេសចរណ៍អន្តរជាតិដ៏ទាក់ទាញ ប្រកបដោយគុណភាពផ្ដល់នូវធនធានទេសចរណ៍សម្បូរបែបមានការទទួលស្គាល់ជាលក្ខណៈសកលលើការអភិរក្ស និងកិច្ចគាំពារសម្បត្តិបេតិកភណ្ឌវប្បធម៌ និងបរិស្ថានធម្មជាតិ និងមានភ្ញៀវទេសចរមកកម្សាន្តម្ដងហើយម្ដងទៀត ផ្សារភ្ជាប់ជាមួយការអភិវឌ្ឍសេដ្ឋកិច្ចមូលដ្ឋាន ចូលរួមដល់ការកាត់បន្ថយភាពក្រីក្រ ព្រមទាំងឆ្លើយតបនឹងបម្រែបម្រួលអាកាសធាតុ»។
យោងតាម លោក ថោង ខុន គោលបំណងនៃយុទ្ធសាស្ត្រដែលដាក់ចេញក្នុងផែនការមេនេះក៏រួមមានការធានាបាននូវចំណុចសំខាន់ៗមួយចំនួនផងដែរ រួមមាន ទេសចរណ៍ប្រកបដោយគុណភាព, ទេសចរណ៍វៃឆ្លាត និងទេសចរណ៍ដែលមានតុល្យភាពរវាងការអភិវឌ្ឍ និងការអភិរក្សធនធានវប្បធម៌ និងបរិស្ថានធម្មជាតិ។
លោកស្រី ឆាយ ស៊ីវលីន ប្រធានសមាគមទីភ្នាក់ងារទេសចរណ៍កម្ពុជាបាននិយាយថា ផែនការមេនេះនឹងដើរតួនាទីសំខាន់ក្នុងការស្តារវិស័យទេសចរណ៍កម្ពុជា ពិសេសខេត្តសៀមរាបឱ្យមានភាពល្អប្រសើរឡើងវិញ ពិសេសពីការធ្លាក់ចុះយ៉ាងគំហុកដែលបណ្តាលមកពីវិបត្តិកូវីដ ១៩។
លោកស្រីនិយាយថា៖ «ផែនការមេនេះនឹងចូលរួមចំណែកយ៉ាងច្រើនក្នុងការលើកកម្ពស់វិស័យទេសចរណ៍។ ផែនការមេនេះក៏បានបញ្ចូលចំណុចគន្លឹះសំខាន់ៗនៅក្នុងការធ្វើឱ្យវិស័យទេសចរណ៍នៅកម្ពុជា ធានាបាននូវនិរន្តរភាពសម្រាប់ទស្សនវិស័យយូរអង្វែងផងដែរ»។
ទិន្នន័យក្រសួងទេសចរណ៍បានឱ្យដឹងថា នៅក្នុងរយៈពេល ៧ ខែដើមឆ្នាំ ២០២១ កម្ពុជាទទួលបានភ្ញៀវទេសចរបរទេសសរុប ១១២ ៥៤៤ នាក់ធ្លាក់ចុះ ៩០,៦ ភាគរយបើធៀបនឹងរយៈពេលដូចគ្នាឆ្នាំ ២០២០៕ LA
