.jpg)
លោក សុក ចិន្តាសោភា អគ្គលេខាធិការក្រុមប្រឹក្សាអភិវឌ្ឍន៍កម្ពុជា ក្នុងកិច្ចប្រជុំនាពេលកន្លងមក។ រូបថត CDC
ភ្នំពេញៈ អគ្គលេខាធិការក្រុមប្រឹក្សាអភិវឌ្ឍន៍កម្ពុជា (CDC) លោក សុក ចិន្តាសោភា បានអះអាងថា សេដ្ឋកិច្ចនឹងកាន់តែរឹងមាំ នៅពេលដែលការវិនិយោគអន្តរជាតិអាចចងសម្ព័ន្ធរួមគ្នា ស្របពេលដែលការរីករាលដាលជំងឺកូវីដ ១៩ បន្តរយៈពេលវែង ខណៈដែលបដិវត្តន៍ឌីជីថល និងការប្រកួតប្រជែងភូមិសាស្ដ្រ នយោបាយ ផ្ដល់ផលប៉ះពាល់អវិជ្ជមាន ដល់ការវិនិយោគផ្ទាល់បរទេស (FDI) ជុំវិញពិភពលោក។
ថ្លែងក្នុងវេទិកាវិនិយោគពិភពលោកឆ្នាំ ២០២១ ពីរាជធានីភ្នំពេញ តាមប្រព័ន្ធវីដេអូ លោក សុក ចិន្តាសោភា រដ្ឋមន្ដ្រីប្រតិភូអមនាយករដ្ឋមន្ដ្រី និងជាអគ្គលេខាធិការក្រុមប្រឹក្សាអភិវឌ្ឍន៍កម្ពុជាបានឱ្យដឹងថា ពិភពលោកបានឆ្លងកាត់ការផ្លាស់ប្តូរយ៉ាងស៊ីជម្រៅជាច្រើន ដែលបានបណ្ដាលមកពីការប្រែប្រួលឧស្សាហកម្ម បម្រែបម្រួលបច្ចេកវិទ្យា ការវិវត្តនៃសង្គម ការប្រកួតប្រជែងភូមិសាស្ដ្រនយោបាយ និងការរីករាលដាលនៃជំងឺកូវីដ ១៩។
ក្នុងបរិបទនៃការប្រែប្រួលនេះ លោកលើកទឹកចិត្តឱ្យមានការចងសម្ព័ន្ធភាពរវាងអ្នកវិនិយោគិនជាតិ និងអនុ្តរជាតិ ដោយថ្លែងថា៖ «ការវិនិយោគអន្តរជាតិអាចចងសម្ព័ន្ធរួមគ្នា និងពង្រឹងសេដ្ឋកិច្ចក្នុងកាលៈទេសៈនៃបម្រែបម្រួលទាំងនេះ និងធ្វើឱ្យសហគមន៍សកលកាន់តែមានភាពរឹងមាំឡើង។ ទោះយ៉ាងណា លំហូរវិនិយោគអន្តរជាតិបានផ្លាស់ប្តូរទម្រង់ និងបានធ្លាក់ចុះដោយទុនវិនិយោគផ្ទាល់ពីបរទេសថយចុះចំនួន ៣៥ ភាគរយទូទាំងពិភពលោកនៅឆ្នាំ ២០២០ ដែលធ្វើឱ្យឱកាសរួមចំណែកក្នុងការអភិវឌ្ឍប្រកបដោយចីរកាលប្រឈមនឹងហានិភ័យ»។
លោកបន្តថា៖ «ក្នុងពេលជាមួយគ្នានេះ មានហិរញ្ញប្បទានចីរភាពរាប់ពាន់ពាន់លានដុល្លារកំពុងរង់ចាំការប្រើប្រាស់សម្រាប់ការស្ទុះងើបឡើងវិញនៃការវិនិយោគផ្ទាល់បរទេសថ្មី ប្រសិនបើគោលនយោបាយ និងវិធានការនានាត្រូវបានអនុវត្ត។ យើងមើលឃើញសក្ដានុពលនេះជាមួយនឹងការស្ទុះងើបឡើងវិញនៃការបញ្ជាទិញ និងការច្របាច់បញ្ចូលគ្នានៅទូទាំងពិភពលោក ដែលគ្រាន់តែក្នុងឆមាសទី ១ ឆ្នាំ ២០២១ មានចំនួនលើសពីឆ្នាំ ២០២០ រួចទៅហើយ»។
គម្រោងវិនិយោគឯកជនប្រហែល ៧៥ នៅក្រៅតំបន់សេដ្ឋកិច្ចពិសេសត្រូវបានអនុម័តដោយក្រុមប្រឹក្សាអភិវឌ្ឍន៍កម្ពុជា (CDC) ក្នុងរយៈពេល ៨ ខែដំបូងឆ្នាំ ២០២១ ធ្លាក់ចុះជិត ៣០ ភាគរយធៀបនឹងរយៈពេលដូចគ្នាកាលពីឆ្នាំមុន។ នេះបើយោងតាមរបាយការណ៍របស់ក្រសួងសេដ្ឋកិច្ច និងហិរញ្ញវត្ថុ។
របាយការណ៍នេះបង្ហាញថា ស្ថានការណ៍នៃការវិនិយោគថ្មីនៅក្នុងប្រទេសកម្ពុជា មិនមានភាពល្អប្រសើរទេ ដោយចាប់ពីខែមករាដល់សីហាឆ្នាំ ២០២១ មានគម្រោងវិនិយោគ ៧៥ ប៉ុណ្ណោះនៅក្រៅតំបន់សេដ្ឋកិច្ចពិសេសត្រូវបានអនុម័តដោយ CDC ធ្លាក់ចុះ ៣០ ភាគរយធៀបនឹងរយៈពេលដូចគ្នាកាលពីឆ្នាំមុន។ គម្រោងថ្មីទាំងនេះ បានបង្កើតការងារ ៥៧ ០០០ កន្លែងធ្លាក់ចុះ ៣២,៣ ភាគរយ និងមានទុនវិនិយោគសរុប ១,១០៦ ពាន់លានដុល្លារធ្លាក់ចុះ ៥២,៥ ភាគរយ។
លោក លឹម ហេង អនុប្រធានសភាពាណិជ្ជកម្មកម្ពុជាបានប្រាប់ ភ្នំពេញ ប៉ុស្ដិ៍ ក្នុងពេលថ្មីៗនេះថា ការធ្លាក់ចុះចំនួនគម្រោងវិនិយោគឯកជននៅក្រៅតំបន់សេដ្ឋកិច្ចពិសេស ជាប់ទាក់ទងនឹងផលប៉ះពាល់ដោយសារតែការរីករាលដាលជំងឺកូវីដ ១៩ ដែលបានបង្ខំឱ្យប្រទេសនីមួយៗរឹតបន្តឹង ឬបិទព្រំដែនមិនឱ្យមានការធ្វើចរាចរណ៍មនុស្ស។ ក្រៅពីនេះ ប្រទេសនីមួយៗក៏បានកំណត់រយៈពេលការធ្វើចត្តាឡីស័ករយៈពេលវែង ដែលធ្វើឱ្យឱកាសសិក្សាទីផ្សារ ទីតាំងវិនិយោគ និងនីតិវិធីវិនិយោគជាប់គាំង។
លោកបន្ថែមថា ទោះយ៉ាងណាក៏ដោយសម្រាប់កម្ពុជា ដែលជាប្រទេសមានអត្រាការចាក់វ៉ាក់សាំងប្រឆាំងនឹងជំងឺកូវីដ ១៩ ខ្ពស់បំផុតនៅក្នុងតំបន់ត្រូវបានរំពឹងថា នឹងអាចបើកសេដ្ឋកិច្ចរបស់ខ្លួនក្នុងពេលឆាប់។ ជាមួយគ្នានេះដែរ វិនិយោគិន ឬភ្ញៀវទេសចរអន្តរជាតិ ដែលបានចាក់វ៉ាក់សាំងគ្រប់ដូសមកកម្ពុជានឹងអាចកាត់បន្ថយរយៈពេលនៃការធ្វើចត្តាឡីស័ក។
លោកថ្លែង៖ «ខ្ញុំជឿជាក់ថា ផែនការកាត់បន្ថយរយៈពេលការធ្វើចត្តាឡីស័ក និងការបើកដំណើរការសេដ្ឋកិច្ចឡើងវិញនឹងបើកចំហឱកាសកាន់តែច្រើនសម្រាប់ក្រុមវិនិយោគិនមកកម្ពុជា»។
ទោះយ៉ាងណា លោក លឹម ហេង បានឱ្យដឹងថា ប្រសិនបើផែនការបើកសេដ្ឋកិច្ចក្នុងពេលឆាប់ៗ មិនទទួលបានជោគជ័យ សេដ្ឋកិច្ចរបស់ប្រទេសកម្ពុជានឹងមានបញ្ហាប្រឈមកាន់តែខ្លាំង។
លោក សុក ចិន្តាសោភា ថា កម្ពុជានឹងជំរុញវិសាលភាពប្រកបដោយចីរភាពនៅក្នុងច្បាប់វិនិយោគិន ដើម្បីទាក់ទាញការវិនិយោគកាន់តែខ្លាំងមកកម្ពុជា៕ LA
