.jpg)
ភ្នំពេញៈ ការនាំចូលសាច់គោពីប្រទេសឥណ្ឌាអាចមានដំណើរការជាធម្មតាឡើងវិញ បន្ទាប់ពីគណៈកម្មការចំពោះកិច្ចទប់ស្កាត់ការរីករាលដាលនៃជំងឺឆ្លងកូវីដ ១៩ ពាក់ព័ន្ធនឹងការនាំចូលទំនិញមានហានិភ័យខ្ពស់បានពិនិត្យឃើញថា ក្នុងចំណោមទំនិញសាច់បង្កកនាំចូលមកកម្ពុជាកន្លងមក លទ្ធផលនៃការធ្វើតេស្តរកវីរុសកូវីដ ១៩ គឺមានកម្រិត “វិជ្ជមាន” តិចតួចបំផុត ហើយស្ថានភាពនៃការឆ្លងរាលដាលជំងឺកូវីដ ១៩ នៅប្រទេសទាំងអស់នោះក៏កំពុងធ្លាក់ចុះច្រើនផងដែរ។
នៅក្នុងកិច្ចប្រជុំនៃគណៈកម្មការចំពោះកិច្ចទប់ស្កាត់ការរីករាលដាលនៃជំងឺឆ្លងកូវីដ ១៩ ពាក់ព័ន្ធនឹងការនាំចូលទំនិញមានហានិភ័យខ្ពស់ ដែលមានប្រភពពីប្រទេសមានការរីករាលដាលខ្លាំងនូវជំងឺឆ្លងកូវីដ ១៩ ដែលធ្វើឡើងតាមប្រព័ន្ធវីដេអូ (Zoom) កាលពីថ្ងៃទី ២០ ខែតុលា ឆ្នាំ ២០២១ លោក គុណ ញឹម អគ្គនាយកនៃអគ្គនាយកដ្ឋានគយ និងរដ្ឋាករកម្ពុជា និងជាប្រធានគណៈកម្មការចំពោះកិច្ចបានលើកឡើងថា តាមរបាយការណ៍របស់ក្រុមការងារនៃគណៈកម្មការចំពោះកិច្ចបង្ហាញថា ក្នុងចំណោមទំនិញសាច់បង្កកនាំចូលចំនួន ១៥០ កុងតឺន័រ ដែលជាមុខសញ្ញាធ្វើតេស្តរកវីរុសកូវីដ ១៩ មានតែ ៣ កុងតឺន័រប៉ុណ្ណោះដែលបានរកឃើញ “វិជ្ជមាន” និងត្រូវបានដុតបំផ្លាញចោលកាលពីចុងខែកក្កដា ឆ្នាំ ២០២១។
លោកបន្តថា ទន្ទឹមនេះក្រុមការងារតាមដាន និងវាយតម្លៃពីស្ថានភាពនៃការរីករាលដាលជំងឺកូវីដ ១៩ នៅប្រទេសសំខាន់ៗ ដែលនាំចេញមុខទំនិញសាច់បង្កកមកកម្ពុជាក៏បានធ្វើរបាយការណ៍ដោយបញ្ជាក់ថា អត្រានៃការឆ្លងនៅប្រទេសទាំងនោះមានការធ្លាក់ចុះយ៉ាងច្រើន ដែលជាកត្តាកាត់បន្ថយហានិភ័យនៃវត្តមានវីរុសកូវីដ ១៩ លើសាច់បង្កកនាំចូលមកកម្ពុជា។
ជាលទ្ធផលអង្គប្រជុំបានឯកភាព និងសម្រេចធ្វើសំណើស្នើសុំការសម្រេចជាគោលការណ៍ពីថ្នាក់ដឹកនាំលើចំណុចមួយចំនួនដូចជា ១. ដកចេញការតម្រូវឱ្យយកសំណាកសាច់បង្កកនាំចូលមកពីប្រទេសឥណ្ឌា ទៅធ្វើតេស្តរកវីរុសកូវីដ-១៩, ២. រក្សាការតម្រូវឱ្យមានវិញ្ញាបនបត្រ ឬលិខិតបញ្ជាក់ថា គ្មានវីរុសកូវីដ ១៩ លើសាច់បង្កក ចេញដោយអាជ្ញាធរមានសមត្ថកិច្ចនៃប្រទេសឥណ្ឌា, ៣. បន្តអនុវត្តត្រឹមវិធានការអនាម័យ និងវិធានការសុខាភិបាលលើទំនិញត្រជាក់ និងទំនិញបង្កកនាំចូលពីប្រទេសជិតខាង ដោយបាញ់ថ្នាំសម្លាប់មេរោគលើសម្បកវេចខ្ចប់ និងមធ្យោបាយដឹកជញ្ជូនទំនិញ និងទី ៤. វិធានការកែសម្រួលនេះនឹងអនុវត្តចាប់ពីថ្ងៃទី ២៥ ខែតុលា ឆ្នាំ ២០២១ តទៅ ។
កិច្ចប្រជុំក៏បានសម្រេចទៀតថា ក្នុងករណីស្ថានភាពនៃការឆ្លងរាលដាលជំងឺកូវីដ ១៩ នៅប្រទេសនាំចេញកាន់តែធូរស្រាល វិធានការខាងលើនេះនឹងអាចដកចេញទាំងស្រុងចាប់ពីថ្ងៃទី ០១ ខែមករា ឆ្នាំ ២០២២ តទៅ។
ប្រទេសកម្ពុជាកាលពីថ្ងៃទី ១ ខែឧសភា ឆ្នាំ ២០២១ បានសម្រេចផ្អាកការនាំចូលសាច់គោ និងទំនិញដែលបង្កកទុកបានយូរមកពីប្រទេសឥណ្ឌា។ បម្រាមនេះធ្វើឡើង បន្ទាប់ពីមានការសង្ស័យថាប្រភេទសាច់បង្កក និងទំនិញបង្កកគឺមានហានិភ័យក្នុងការចម្លងកូវីដ ១៩ មកកម្ពុជា នៅគ្រាដែលប្រទេសឥណ្ឌាកំពុងផ្ទុះរាលដាលកូវីដ ១៩ យ៉ាងធ្ងន់ធ្ងរ។
ទោះយ៉ាងណា លិខិតរបស់អគ្គនាយកដ្ឋានគយ និងរដ្ឋាករកម្ពុជាកាលពីថ្ងៃទី ១៩ ខែមិថុនា បានឱ្យដឹងថា យោងតាមស្ថានភាពធូរស្រាលនៃការឆ្លងរាលដាលជំងឺកូវីដ ១៩ នៅប្រទេសឥណ្ឌា និងលទ្ធផលអវិជ្ជមាននៃការធ្វើតេស្តលើសាច់បង្កកកន្លងមក រាជរដ្ឋាភិបាលសម្រេចលើកលែងបម្រាមលើការនាំចូលសាច់បង្កក និងមុខទំនិញបង្កក ដែលអាចមានហានិភ័យផ្សេងទៀតមានប្រភពមកពីឥណ្ឌា ដោយដាក់មកជំនួសវិញនូវវិធានការបណ្តោះអាសន្នមួយចំនួន៕
វីដេអូ៖
