.jpg)
លោក ប៉ាន សូរស័ក្តិ រដ្ឋមន្រ្តីក្រសួងពាណិជ្ជកម្ម ទទួលជួបពិភាក្សាការងារជាមួយក្រុមប្រឹក្សាធុរកិច្ចអឺរ៉ុប-អាស៊ាន(EU-ABC) តាមប្រព័ន្ធវីដេអូ ថ្ងៃទី ២១ ខែតុលា។ រូបភាព ក្រសួងពាណិជ្ជកម្
ភ្នំពេញៈ ក្រសួងពាណិជ្ជកម្មកម្ពុជា និងអឺរ៉ុបបានពិភាក្សាគ្នា ដើម្បីធ្វើយ៉ាងណាជំរុញបន្ថែមទៀតនូវកិច្ចសហប្រតិបត្តិការពាណិជ្ជកម្ម-សេដ្ឋកិច្ច កម្ពុជា-អឺរ៉ុប និងការចូលរួមរបស់វិស័យឯកជនក្នុងការស្តារឡើងវិញនូវខ្សែច្រវាក់ផ្គត់ផ្គង់ និងផលិតកម្មសកល នៅក្នុង និងក្រោយវិបត្តិជំងឺកូវីដ ១៩។
លោក ប៉ាន សូរស័ក្តិ រដ្ឋមន្រ្តីក្រសួងពាណិជ្ជកម្ម ក្នុងអំឡុងពេលជួបប្រជុំតាមប្រព័ន្ធវីដេអូ ជាមួយគណៈប្រតិភូក្រុមប្រឹក្សាធុរកិច្ចអឺរ៉ុប-អាស៊ាន (EU ASEAN Business Council – EU-ABC) ដែលដឹកនាំដោយ លោក Donald Kanak ជាប្រធាន និងនាយកប្រតិបត្តិនៃក្រុមប្រឹក្សាធុរកិច្ច EU-ABC និងមានការចូលរួមពីសភាពាណិជ្ជកម្មអឺរ៉ុបប្រចាំកម្ពុជា (EuroCham Cambodia) និងតំណាងមកពីក្រុមហ៊ុនមួយចំនួនដែលជាសមាជិករបស់ក្រុមប្រឹក្សា EU-ABC បានលើកឡើងថា បច្ចុប្បន្នក្រសួងពាណិជ្ជកម្មកំពុងធ្វើកិច្ចការជាច្រើន ពិសេសការត្រៀមខ្លួនសម្រាប់ឆ្នាំ២០២២ ជាពេលដែលប្រទេសកម្ពុជាត្រូវធ្វើជាប្រធានអាស៊ាន។ លោកបន្តថា ជាមួយគ្នានេះកម្ពុជាក៏កំពុងខិតខំកែសម្រួល និងកសាងច្បាប់ពាណិជ្ជកម្មរបស់ខ្លួន ដើម្បីឈានឆ្ពោះទៅក្នុងដំណើរឆ្ពោះទៅរកសហគមន៍សេដ្ឋកិច្ចឌីជីថលផងដែរ។
នៅក្នុងកិច្ចប្រជុំនេះ ភាគីទាំង ២ ក៏បានពិភាក្សាគ្នាដោយផ្តោតលើការជំរុញបន្ថែមទៀតនូវកិច្ចសហប្រតិបត្តិការពាណិជ្ជកម្ម-សេដ្ឋកិច្ចកម្ពុជា-អឺរ៉ុប និងការចូលរួមរបស់វិស័យឯកជនក្នុងការស្តារទ្បើងវិញនូវខ្សែច្រវាក់ផ្គត់ផ្គង់ និងផលិតកម្មសកល តាមរយៈការពង្រឹងកិច្ចសម្រួលពាណិជ្ជកម្ម ពាណិជ្ជកម្មអេឡិចត្រូនិក (E-Commerce) និងកម្មសិទ្ធិបញ្ញាជាដើម។
ទន្ទឹមនឹងនេះ លោករដ្ឋមន្រ្ដីក៏បានប្រាប់ភាគីអឺរ៉ុប ពីកិច្ចខិតខំប្រឹងប្រែងរបស់រដ្ឋាភិបាលកម្ពុជា ក្នុងការគ្រប់គ្រង និងទប់ស្កាត់ការរីករាលដាលនៃជំងឺកូវីដ ១៩ ជាពិសេសយុទ្ធនាការចាក់វ៉ាក់សាំងជូនប្រជាពលរដ្ឋកម្ពុជា និងជនបរទេសគ្រប់រូប ដែលជាកត្តាសំខាន់សម្រាប់ការស្តារទ្បើងវិញនូវសេដ្ឋកិច្ចសង្គម រួមជាមួយការខិតខំធ្វើឱ្យប្រសើរទ្បើងនូវបរិយាកាសវិនិយោគ និងធុរកិច្ចនៅកម្ពុជា។
លោក Donald Kanak បានថ្លែងអំណរគុណចំពោះក្រសួងពាណិជ្ជកម្ម ដែលតែងយកចិត្តទុកដាក់គាំទ្រ និងសម្របសម្រួលដល់អ្នកវិនិយោគ និងសមាជិកក្រុមប្រឹក្សា EU-ABC នាពេលកន្លងមក។
លោកបានសន្យាថា សមាជិកក្រុមប្រឹក្សា EU-ABC ប្តេជ្ញានឹងជំរុញការវិនិយោគ និងកិច្ចសហប្រតិបត្តិការធុរកិច្ចបន្ថែមទៀតជាមួយប្រទេសកម្ពុជា៕
