.jpg)
សាជីវកម្មធានាឥណទានកម្ពុជា (ស.ធ.ក.) បានចុះហត្ថលេខាជាមួយគ្រឹះស្ថានមីក្រូហិរញ្ញវត្ថុចម្រើនលើកិច្ចព្រមព្រៀងធានាឥណទានជាមួយគ្នា ដើម្បីជាការបើកផ្លូវគាំទ្រដល់សហគ្រាសធុនតូច និងមធ្យម ឱ្យមានលទ្ធភាពទទួលបានហិរញ្ញប្បទានច្រើនជាងមុន។ ហេង ជីវ័ន
ភ្នំពេញៈ សាជីវកម្មធានាឥណទានកម្ពុជា (ស.ធ.ក.) [Credit Guarantee Corporation of Cambodia- CGCC] បានចុះហត្ថលេខាជាមួយគ្រឹះស្ថានមីក្រូហិរញ្ញវត្ថុចម្រើន(Chamroeun Microfinance Plc.) លើកិច្ចព្រមព្រៀងធានាឥណទានជាមួយគ្នា ដើម្បីជាការបើកផ្លូវគាំទ្រដល់សហគ្រាសធុនតូច និងមធ្យម ឱ្យមានលទ្ធភាពទទួលបានហិរញ្ញប្បទានច្រើនជាងមុន ពិសេសក្នុងវិស័យកសិកម្ម។
ពិធីនេះធ្វើឡើងកាលពីថ្ងៃទី២២ ខែតុលា ឆ្នាំ២០២១ នៅទីស្នាក់ការកណ្តាលរបស់គ្រឹះស្ថានមីក្រូហិរញ្ញវត្ថុចម្រើន។
យោងតាមកិច្ចព្រមព្រៀង ការចុះហត្ថលេខានេះ គឺជាការបើកផ្លូវមួយក្នុងការគាំទ្រដល់សហគ្រាសធុនតូច និងមធ្យម ជាពិសេស ក្នុងវិស័យកសិកម្ម ដែលខ្វះទ្រព្យបញ្ចាំ ដើម្បីអាចឱ្យម្ចាស់អាជីវកម្មមានលទ្ធភាពក្នុងការទទួលបានហិរញ្ញប្បទានច្រើនជាងមុន សម្រាប់ការទ្រទ្រង់អាជីវកម្ម និងវិនិយោគ ឬពង្រីកអាជីវកម្ម។
លោក Wong Keet Loong នាយកប្រតិបត្តិសាជីវកម្មធានាឥណទានកម្ពុជា បាននិយាយថា កិច្ចសហប្រតិបត្តិការជាមួយគ្រឹះស្ថានមីក្រូហិរញ្ញវត្ថុចម្រើននឹងអាចជួយឱ្យស្ថាប័នរបស់លោកបង្កើនការគាំទ្រដល់សហគ្រាសធុនតូច និងមធ្យម ក្នុងវិស័យកសិកម្មនៅតំបន់ជនបទ ដែលពិបាកក្នុងការទទួលបានហិរញ្ញប្បទានផ្លូវការពីគ្រឹះស្ថានហិរញ្ញវត្ថុ។
យោងតាមលោក Wong Keet Loong គ្រឹះស្ថានមីក្រូហិរញ្ញវត្ថុចម្រើន នឹងអាចផ្តល់ហិរញ្ញប្បទានទៅកាន់សហគ្រិននៃអាជីវកម្មខ្នាតមីក្រូ ខ្នាតតូច និងមធ្យម (MSMEs) ដែលគ្មានទ្រព្យបញ្ចាំ ឬមានទ្រព្យបញ្ចាំមិនគ្រប់គ្រាន់សម្រាប់ការស្នើសុំកម្ចី។
លោកថ្លែងថា៖ «ជាមួយនឹងការទទួលបានហិរញ្ញប្បទាននេះ យើងសង្ឃឹមថា MSMEs នឹងអាចបង្កើនចំណូលដល់ជីវភាពរស់នៅរបស់ពួកគេ ក៏ដូចជាកាត់បន្ថយនូវភាពក្រីក្រផងដែរ»។
ចំណែកលោក Yannick Nicolas MILEV នាយកប្រតិបត្តិគ្រឹះស្ថានមីក្រូហិរញ្ញវត្ថុចម្រើន បានលើកឡើងថា ការផ្តួចផ្តើមរបស់ CGCC ពិតជាសំខាន់សម្រាប់ជួយទៅដល់សេដ្ឋកិច្ចនៅតំបន់ជនបទ និងប្រព័ន្ធទីផ្សារ។ សហគ្រាសខ្នាតតូច និងមធ្យមក្នុងវិស័យកសិកម្មនៅតាមតំបន់ជនបទ ច្រើនតែជួបការលំបាកក្នុងការទទួលបានកម្ចីផ្លូវការ ដោយសារតែលទ្ធភាពរបស់ SMEs នៅក្នុងវិស័យកសិកម្ម មិនអាចឆ្លើយតបនឹងលក្ខខណ្ឌតម្រូវរបស់អ្នកផ្តល់កម្ចីនៅក្នុងវិស័យហិរញ្ញវត្ថុ។
លោកអះអាងថា៖«គម្រោងធានាឥណទាន នឹងចូលរួមដោះស្រាយបញ្ហាទាំងនេះ ដែលជាលទ្ធផលនឹងពង្រឹងបរិយាបន្នហិរញ្ញវត្ថុ និងការអភិវឌ្ឍអាជីវកម្ម»៕
