.jpg)
លោក សុខ ចិន្តាសោភា ក្នុងកិច្ចប្រជុំកាលពីថ្ងៃទី ២២ ខែតុលា។ សហការី
ភ្នំពេញៈ អគ្គលេខាធិការក្រុមប្រឹក្សាអភិវឌ្ឍន៍កម្ពុជា (CDC) លោក សុខ ចិន្តាសោភា បានថ្លែងថា ការបង្កើតបរិស្ថានវិនិយោគមានលក្ខណៈអំណោយផល និងការសម្រួលដល់រំហូរវិនិយោគទៅប្រទេសអភិវឌ្ឍន៍តិចតួច និងប្រទេសកំពុងអភិវឌ្ឍន៍ គឺជាការចាំបាច់ដើម្បីទ្រទ្រង់ និងពន្លឿនការស្តារសេដ្ឋកិច្ចក្រោយការរីករាលដាលជំងឺកូវីដ ១៩។
ការថ្លែងបែបនេះរបស់លោក សុខ ចិន្តាសោភា បានធ្វើឡើងក្នុងកិច្ចពិភាក្សាតាមប្រព័ន្ធអនឡាញអំពីវិធីធ្វើឱ្យប្រសើរឡើងនូវសមត្ថភាពរបស់បណ្តារដ្ឋាភិបាលនៃប្រទេសអភិវឌ្ឍន៍តិចតួច (LDCs) ដើម្បីជំរុញ និង សម្រួលវិនិយោគ ដែលរៀបចំដោយវេទិកាវិនិយោគពិភពលោក កាលពីថ្ងៃទី ២២ ខែតុលា ឆ្នាំ ២០២១។
លោកបានលើកឡើងពីភាពចាំបាច់ក្នុងការបង្កើតបរិស្ថានវិនិយោគមួយដែលមានលក្ខណៈអំណោយផល និងសម្រួលដល់រំហូរវិនិយោគទៅកាន់ប្រទេសអភិវឌ្ឍន៍តិចតួច និងប្រទេសកំពុងអភិវឌ្ឍន៍។ លោកបន្តថា ការបង្កើតបរិយាកាសវិនិយោគ និងរំហូរវិនិយោគ គឺជាធាតុផ្សំដ៏សំខាន់ដើម្បីទ្រទ្រង់ និងពន្លឿនការស្តារសេដ្ឋកិច្ចក្រោយការរីករាលដាលជំងឺកូវីដ ១៩។
លោកអះអាងថា៖ «កិច្ចខិតខំប្រឹងប្រែងរួមគ្នានៃបណ្តាប្រទេស LDCs និងប្រទេសកំពុងអភិវឌ្ឍន៍នឹងក្លាយជាគន្លឹះ ដើម្បីបង្កើតបរិស្ថានប្រកបដោយប្រសិទ្ធភាពថែមទៀតសម្រាប់ការធ្វើធុរកិច្ច វិនិយោគ និងបង្កើតលក្ខខណ្ឌអាចប៉ាន់ប្រមាណបាន ដើម្បីទាក់ទាញលំហូរវិនិយោគប្រកបដោយចីរភាព»។
រដ្ឋមន្ត្រីក្រសួងពាណិជ្ជកម្ម លោក ប៉ាន សូរស័ក្តិ បានថ្លែងក្នុងកិច្ចពិភាក្សាតុមូលថ្នាក់រដ្ឋមន្ត្រីលើកទី ១៥ នៃសន្និសីទសហប្រជាជាតិស្ដីពីពាណិជ្ជកម្ម និងការអភិវឌ្ឍ (UNCTAD 15) កាលថ្ងៃទី ៤ ខែតុលា តាមប្រព័ន្ធវីដេអូថា ការរីកចម្រើនយ៉ាងឆាប់រហ័សនៃពាណិជ្ជកម្ម និងសេដ្ឋកិច្ចឌីជីថលក៏បានពង្រីកគម្លាតឌីជីថលរវាងប្រទេសអភិឌ្ឍន៍ និងប្រទេសកំពុងអភិវឌ្ឍន៍ ជាពិសេសប្រទេសអភិវឌ្ឍន៍តិចតួច។
លោកនិយាយថា៖ «ក្នុងន័យនេះ កិច្ចសហប្រតិបត្តិការទ្វេភាគី និងពហុភាគី ជាមួយប្រទេសជាដៃគូពាណិជ្ជកម្ម ដៃគូអភិវឌ្ឍន៍ និងអង្គការអន្តរជាតិពាក់ព័ន្ធនានាគឺមានតួនាទីសំខាន់ក្នុងការជួយគាំទ្រដល់ការអភិវឌ្ឍ និងការទទួលបានផលប្រយោជន៍ពីពាណិជ្ជកម្មឌីជីថល តាមរយៈការជួយកសាងហេដ្ឋារចនាសម្ព័ន្ធ ការផ្ទេរបច្ចេកវិទ្យា ការពង្រឹងប្រព័ន្ធច្បាប់ និងគោលនយោបាយ និងការអភិវឌ្ឍសមត្ថភាព ដើម្បីលើកកម្ពស់ភាពច្នៃប្រឌិត និងនវានុវត្តន៍របស់ប្រទេសកំពុងអភិវឌ្ឍន៍ និងប្រទេសអភិវឌ្ឍន៍តិចតួច»។
ជាមួយគ្នានេះលោក សូរស័ក្តិ ក៏បានអំពាវនាវឱ្យ UNCTAD បន្តជួយគាំទ្រដល់ប្រទេសអភិវឌ្ឍន៍តិចតួចរួមទាំងកម្ពុជា លើការពង្រឹងសមត្ថភាពផលិត ការអភិឌ្ឍសមត្ថភាពស្ថាប័ន និងធនធានមនុស្ស និងជំនាញបច្ចេកទេសផងដែរ។
បើតាមលោក ចិន្តាសោភា មាគ៌ាសម្រាប់កិច្ចជំរុញការអភិវឌ្ឍប្រកបដោយចីរភាព រួមមាន ការទាក់ទាញវិនិយោគឯកជន និងការសម្រេចបាននូវការធ្វើពិពិធកម្មនាំចេញតាមរយៈការលើកកម្ពស់ពាណិជ្ជកម្មឆ្លងព្រំដែន និងកិច្ចសម្រួលវិនិយោគ។ បន្ថែមពីលើនេះ បណ្តាប្រទេស LDC ក៏ត្រូវចាំបាច់ការធ្វើពិពិធកម្មសេដ្ឋកិច្ចរបស់ខ្លួនតាមរយៈការទាញយកនូវសក្តានុពលពេញលេញនៃសមាហរណកម្មតំបន់ ដែលមានលក្ខណៈស៊ីជម្រៅ ដើម្បីរួមចំណែកដល់ការធ្វើឱ្យប្រសើរឡើងនូវកំណើនសេដ្ឋកិច្ច និងភាពធន់ ព្រមទាំងបង្កើតរបបគតិយុត្ត និងបទប្បញ្ញត្តិដែលជំរុញការវិនិយោគក្នុងស្រុក និងបរទេស។
បន្ថែមពីលើនេះ លោកក៏បានចែករំលែកនូវធាតុស្នូលនៃច្បាប់វិនិយោគថ្មីរបស់កម្ពុជា ដែលទើបប្រកាសឱ្យប្រើប្រាស់ ដើម្បីបង្កើតនូវក្របខ័ណ្ឌគតិយុត្តបើកចំហ មានតម្លាភាព និងអាចប៉ាន់ប្រមាណទុកជាមុនបាន ព្រមទាំងពង្រឹងភាពទាក់ទាញ និងសមត្ថភាពបំពេញបន្ថែម ជាពិសេសផ្តល់ការលើកទឹកចិត្តដ៏ឆ្លាតវៃដល់គម្រោងវិនិយោគដែលប្រើប្រាស់បច្ចេកវិទ្យា, បង្កើតការងារ, បណ្តុះបណ្តាលជំនាញ, បណ្តុះការស្រាវជ្រាវ អភិវឌ្ឍន៍, និងនវានុវត្តន៍ ផងដែរ។
ការវិនិយោគផ្ទាល់ពីបរទេស (FDI) គឺជាប្រភពដ៏មានសក្តានុពល និងសំខាន់នៃហិរញ្ញវត្ថុអភិវឌ្ឍន៍សម្រាប់ប្រទេស LDCs និងអាចបំពេញបន្ថែមដល់ជំនួយអភិវឌ្ឍន៍ផ្លូវការ (ODA)។
យោងតាម UNCTAD រំហូរវិនិយោគផ្ទាល់ពីបរទេសទូទាំងសកលលោកបានឈានដល់ប្រមាណ ៨៥២ ពាន់លានដុល្លារក្នុងឆមាសទី ១ ឆ្នាំ ២០២១ ដែលបង្ហាញពីសម្ទុះងើបឡើងវិញខ្លាំងជាងការរំពឹងទុក។ ការកើនឡើងក្នុងរយៈពេល ២ ត្រីមាសនេះបានស្តារជាង ៧០% នៃការថយចុះដែលបណ្តាលមកពីជំងឺរាតត្បាតកូវីដ ១៩ ក្នុងឆ្នាំ ២០២០៕ LA
