.jpg)
ភ្ញៀវទេសចរចូលមកទស្សនាប្រាសាទអង្គរវត្ត នាពេលកន្លងទៅ។ រូបថត ភ្នំពេញ ប៉ុស្តិ៍
ភ្នំពេញៈ វិស័យឯកជនលើកឡើងថា ការសម្រេចបើកប្រទេសឡើងវិញជាបណ្តើរៗ និងតាមដំណាក់កាលប្រកបដោយភាពប្រយ័ត្នប្រយែង តាមរយៈការសម្រួលលក្ខខណ្ឌនៃការផ្តល់ទិដ្ឋាការ និងការធ្វើចត្តាឡីស័កសម្រាប់អ្នកដំណើរមកកម្ពុជានឹងជួយជំរុញឱ្យវិស័យទេសចរណ៍កម្ពុជារស់ឡើងវិញ។
ប្រធានសមាគមទីភ្នាក់ងារទេសចរណ៍កម្ពុជា លោកស្រី ឆាយ ស៊ីវលីន បានប្រាប់ ភ្នំពេញ ប៉ុស្តិ៍ នៅថ្ងៃទី ២៤ ខែតុលាថា ពាក់ព័ន្ធនឹងការឱ្យមានការផ្តល់ទិដ្ឋាការឡើងវិញជូនភ្ញៀវទេសចរ និងអ្នកវិនិយោគនាពេលនេះនឹងអាចទាក់ទាញពួកគេឱ្យធ្វើដំណើរមកកម្ពុជាវិញ ជាពិសេសនឹងជំរុញឱ្យវិស័យទេសចរណ៍កម្រើកឡើងវិញ បន្ទាប់ពីទទួលរងផលប៉ះពាល់ធ្ងន់ធ្ងរក្នុងរយៈពេលជិត ២ ឆ្នាំ។
លោកស្រីបន្តថា ការអនុញ្ញាតឱ្យធ្វើដំណើរចូលមកប្រទេសកម្ពុជាទាំងភ្ញៀវទេសចរ និងអ្នកវិនិយោគនៅពេលនេះ គឺតម្រូវឱ្យធ្វើការស្នើសុំទិដ្ឋាការនៅតាមស្ថានទូតតំណាងកម្ពុជា និងតាមអនឡាញ (e-visa) តែប៉ុណ្ណោះ។ លោកស្រីថ្លែងថា៖ «ជាការល្អ ដែលតម្រូវឱ្យភ្ញៀវសុំវីសាជាមុន ទើបធ្វើដំណើរ។ នេះគឺជាសញ្ញាល្អនៃការរស់ឡើងវិញនូវវិស័យទេសចរណ៍ បន្ទាប់ពីរងគ្រោះជិត ២ ឆ្នាំ»។
ប្រធានសមាគមទេសចរណ៍អាស៊ីប៉ាស៊ីហ្វិកកម្ពុជា លោក ធួន ស៊ីណាន បានឱ្យដឹងដែរថា នេះជាសញ្ញាល្អសម្រាប់វិស័យទេសចរណ៍នៅកម្ពុជា បន្ទាប់ពីទទួលរងផលប៉ះពាល់យ៉ាងធ្ងន់ធ្ងរពីជំងឺកូវីដ ១៩។ លោកបន្តថា ចំពោះការសម្រួលលក្ខខណ្ឌនៃការផ្តល់ទិដ្ឋាការឱ្យភ្ញៀវទេសចរ វិស័យឯកជនធ្លាប់បានស្នើរដ្ឋាភិបាលយូរមកហើយ។
ទោះយ៉ាងណាលោកនិយាយថា ចំពោះការសម្រួលលក្ខខណ្ឌធ្វើដំណើរ ការអនុវត្តវិធានការសុខាភិបាល និងការធ្វើចត្តាឡីស័កនៅកម្ពុជាសម្រាប់អ្នកដំណើរចូលមកកម្ពុជាស្របតាមគន្លងប្រក្រតីភាពថ្មីក្រោមរូបភាពធ្វើចត្តាឡីស័ក ៣ ថ្ងៃ ឬ ៧ ថ្ងៃ នៅមួយកន្លែងបែបនេះនឹងមិនមានភាពទាក់ទាញដល់វិស័យទេសចរណ៍ទេ។
លោក តាំង សុចិត្រគ្រឹស្នា ប្រធានមន្ទីរទេសចរណ៍ ខេត្តព្រះសីហនុបានស្វាគមន៍ដែលរដ្ឋាភិបាលកែសម្រួលគោលការណ៍នៃការផ្ដល់ទិដ្ឋាការ និងលក្ខខណ្ឌធ្វើដំណើរ និងការធ្វើចត្តាឡីស័កសម្រាប់អ្នកដំណើរចូលមកកម្ពុជា ជាពិសេសមកខេត្តព្រះសីហនុ។
លោកថ្លែងថា៖ «ធម្មតាពេលរដ្ឋាភិបាលបើកឱ្យមានអ្នកធ្វើដំណើរចូលមកក្នុងប្រទេសវាពាក់ព័ន្ធនឹងលិខិតបទដ្ឋាន និងសេវាកម្មគាំទ្រមួយចំនួនដែលនេះវាមិនមានអ្វីប៉ះពាល់ទេ ប៉ុន្តែវាផ្តល់ភាពងាយស្រួលដល់ទេសចរ និងអ្នកវិនិយោគដូចជាការកាត់បន្ថយចត្តាឡីស័កជាដើម»។
យោងតាមលិខិតរបស់លោក ប្រាក់ សុខុន រដ្ឋមន្ត្រីក្រសួងការបរទេស និងសហប្រតិបត្តិការអន្តរជាតិ ផ្ញើជូនឯកអគ្គរាជទូត អគ្គកុងស៊ុល និងកុងស៊ុលកម្ពុជា ប្រចាំនៅបរទេសកាលពីថ្ងៃទី ២០ ខែ តុលា ឆ្នាំ ២០២១ គឺបើកឱ្យមានការផ្ដល់ឡើងវិញនូវទិដ្ឋាការទេសចរណ៍ ដែលត្រូវបានផ្អាកដោយសារវិបត្តិនៃជំងឺកូវីដ ១៩ ដើម្បីអាចទទួលភ្ញៀវបរទេស និងភ្ញៀវទេសចរទូទៅ និងដាក់ឱ្យដំណើរការឡើងវិញនូវគោលការណ៍លើកលែងទិដ្ឋាការ (Visa Exemption) និងដាក់ដំណើរការឡើងវិញនូវការស្នើសុំទិដ្ឋាការតាមប្រព័ន្ធអេឡិចត្រូនិក (e-Visa) ដើម្បីសម្រួលដល់អ្នកដំណើរក្នុងការស្នើសុំទិដ្ឋាការចូលមកកម្ពុជា ប៉ុន្តែនៅបន្តផ្អាកការផ្តល់ទិដ្ឋាការនៅពេលមកដល់៕ LA
វីដេអូ៖
