.jpg)
ការិយាល័យកណ្តាលនៃធនាគារ HSBC នៅទីក្រុងហុងកុងប្រទេសចិន។ AFP
ទីក្រុងហុងកុងៈ ធនាគារ HSBC កំពុងងើបពីបញ្ហាវីរុសកូរ៉ូណា និងការរៀបចំហេដ្ឋារចនាសម្ព័ន្ធឡើងវិញ ក្លាយជាស្ថាប័នមានប្រាក់ចំណេញដែលគួរទុកចិត្តកាន់តែខ្លាំង។ យោងតាម លោក Noel Quinn ប្រធានធនាគារ HSBC ពេលដែលគាត់ប្រកាសចាប់ផ្តើមទិញត្រឡប់ភាគហ៊ុនតម្លៃ ២ ពាន់លានដុល្លារ។
ស្ថាប័នផ្តល់កម្ចីដែលពឹងផ្អែកខ្លាំងលើទីផ្សារតំបន់អាស៊ីមួយនេះមានភាពច្របូកច្របល់នៅឆ្នាំ ២០២០ នៅពេលដែលជោគវាសនារបស់ខ្លួនបានប៉ះទង្គិចជាមួយស្ថានភាពមេរោគឆ្លង និងភាពតានតឹងផ្នែកភូមិសាស្ត្រនយោបាយ។
ចាប់តាំងពីលោក Quinn បានត្រួតពិនិត្យការរៀបចំហេដ្ឋារចនាសម្ព័ន្ធគួរឱ្យកត់សម្គាល់បានកាត់បន្ថយកម្លាំងពលកម្មរបស់ធនាគារប្រហែល ៣៥ ០០០ នាក់ និង ការផ្តោតជាថ្មីលើវិស័យដែលអាចរកប្រាក់ចំណេញច្រើនរបស់ខ្លួនក្នុងតំបន់អាស៊ី និងមជ្ឈឹមបូព៌ា ដែលជាល្បិចដែលគាត់និយាយថា ឥឡូវនេះកំពុងតែចែកភាគលាភ។
លោក Quinn បានសរសេរភ្ជាប់ទៅនឹងរបាយការណ៍ត្រីមាសទី ៣ របស់ធនាគារថា៖ «ខណៈពេលយើងរក្សាការព្យាករដោយប្រុងប្រយ័ត្នលើបរិយាកាសហានិភ័យពីខាងក្រៅ យើងជឿថា មានហានិភ័យទាបក្នុងត្រីមាសថ្មីៗនេះនៅពីក្រោយយើង»។
លោកបានបន្ថែមថា៖ «ទំនុកចិត្តនេះរួមជាមួយជំហរហិរញ្ញវត្ថុរឹងមាំរបស់យើង ធ្វើឱ្យយើងអាចប្រកាសទិញត្រឡប់មកវិញនូវភាគហ៊ុនតម្លៃរហូតដល់ទៅ ២ ពាន់លានដុល្លារ ដែលយើងយើងរំពឹងចាប់ផ្តើមក្នុងពេលដ៏ខ្លីខាងមុខ»។
សេចក្តីប្រកាសពីលទ្ធផលបានបង្ហាញថា ប្រាក់ចំណេញមុនបង់ពន្ធរបស់ HSBC កើនឡើងច្រើនជាងទ្វេដងក្នុងត្រីមាសទី ៣ ធៀបនឹងរយៈពេលដូចគ្នានៃឆ្នាំមុនដល់ចំនួន ៥,៤ ពាន់លានដុល្លារ។ ប្រាក់ចំណេញបន្ទាប់ពីបង់ពន្ធរួចមាន ៤,២ ពាន់លានដុល្លារ កើនឡើងពី ២,២ ពាន់លានដុល្លារកាលពីរយៈពេលដូចគ្នាក្នុងឆ្នាំមុន។
ធនាគារ HSBC បានទទួលប្រាក់ចំណេញ ៩០ ភាគរយពីទីផ្សារអាស៊ី ដោយចិន និងហុងកុងជាទីតាំងជំរុញកំណើន។
កាលពីខែកុម្ភៈ ធនាគារនេះបានផ្សព្វផ្សាយយុទ្ធសាស្ត្រថ្មីដែលបង្ហាញផែនការ ដើម្បីបង្កើនការប៉ុនប៉ងរបស់ខ្លួនចាប់យកទីផ្សារអាស៊ីកាន់តែច្រើនថែមទៀត៕ RR
