ទីក្រុងស្តុកខុមៈ Volvo ដែលជាយីហោរថយន្តរបស់ប្រទេសស៊ុយអែត បានឱ្យដឹងនៅថ្ងៃចន្ទថា ខ្លួនបានកំណត់តម្លៃភាគហ៊ុនថេរក្នុងតម្លៃ ៥៣ ក្រូន័រ (៦,២០ ដុល្លារ) សម្រាប់ការបោះផ្សាយមូលបត្រនៅផ្សារភាគហ៊ុន Stockholm នៅចុងសប្តាហ៍នេះ។
តម្លៃដែលស្ថិតនៅចុងក្រោយបង្អស់នៃតារាងដែលក្រុមហ៊ុន Volvo បានប្រកាសកាលពីសប្តាហ៍មុន ដែលមានចន្លោះពី ៥៣ និង ៦៣ ក្រូន័រក្នុងមួយភាគហ៊ុន នៅមុនការបោះផ្សាយជាសាធារណៈលើកដំបូង (IPO)។
នៅក្នុងសេចក្តីថ្លៃងការណ៍នៅថ្ងៃចន្ទ ក្រុមហ៊ុនផលិតរថយន្តរបស់ប្រទេសស៊ុយអែតនេះក៏បានទម្លាក់ចំនួនដែលខ្លួនមានផែនការកៀរគប្រាក់ពីការបោះផ្សាយជាសាធារណៈពី ២៥ ពាន់លានក្រូន័រ (២,៩ ពាន់លានដុល្លារ) មកនៅ ២០ ពាន់លានក្រូន័រ (២,៣ ពាន់លានដុល្លារ)។
ក្រុមហ៊ុននេះបាននិយាយថាថ្ងៃជួញដូរដំបូងនឹងធ្វើឡើងនៅថ្ងៃទី ២៩ ខែតុលា យឺតជាងមួយថ្ងៃដែលបានប្រកាសកាលពីលើកមុន។
ក្រុមហ៊ុន Volvo កាលដំបូងនិយាយថា ផែនការរបស់ខ្លួនបោះផ្សាយមូលបត្រជាសាធារណៈនៅដើមខែតុលា ខណៈដែលមានការកត់សម្គាល់ថា ក្រុមហ៊ុន Geely របស់ចិននឹងនៅតែជាភាគហ៊ុនិកធំបំផុត។
ក្រុមហ៊ុនផលិតរថយន្តនេះបាននិងកំពុងក្រាញននៀលរហូតដល់ក្រុមហ៊ុន Geely ទិញផ្តាច់ខ្លួនពី Ford ដែលជាក្រុមហ៊ុនរថយន្តយក្សរបស់អាមេរិកក្នុងតម្លៃ ១,៨ ពាន់លានដុល្លារក្នុងឆ្នាំ ២០១០។
កិត្តិស័ព្ទរបស់ Volvo និង ការលក់បានប្រសើរឡើងយ៉ាងខ្លាំងចាប់តាំងពីពេលនោះមក ដោយឈរលើប្រជាប្រិយភាពនៃបច្ចេកវិទ្យា SUVs ។ ក្រុមហ៊ុនមានផែនការផលិតរថយន្តអគ្គិសនីទាំងអស់នៅឆ្នាំ ២០៣០។
លោក Hakan Samuelsson នាយកប្រតិបត្តិក្រុមហ៊ុន Volvo បាននិយាយនៅក្នុងសេចក្តីប្រកាសថា៖ «ដំណើរការបង្កើនប្រាក់ពីការបោះផ្សាយមូលបត្ររួមជាមួយតារាងតុល្យភាពរឹងមាំរបស់យើង នឹងធានាមូលនិធិនៃយុទ្ធសាស្ត្រកែប្រែកាន់តែឆាប់រហ័ស និងការផ្តល់ជូននៃមហិច្ឆតាកណ្តាលទសវត្សរ៍របស់»៕ RR