ភ្នំពេញៈ ការនាំចេញផលិតផលពីកម្ពុជាទៅទីផ្សារប្រទេសជប៉ុន ក្នុងរយៈពេល ៨ ខែដើមឆ្នាំ ២០២១ មានទឹកប្រាក់សរុបជាង ១,១ ពាន់លានដុល្លារ កើនជាង ៧ ភាគរយបើធៀបនឹងរយៈពេលដូចគ្នាធៀបនឹងឆ្នាំ ២០២០ ទោះបីជាប្រទេសទាំង ២ បាននិងកំពុងប្រយុទ្ធប្រឆាំងនឹងការរីករាលដាលនៃជំងឺកូវីដ ១៩ ក្តី។ នេះបើយោងតាមទិន្នន័យពីអង្គការពាណិជ្ជកម្មក្រៅប្រទេសជប៉ុន Jetro។
ទិន្នន័យបង្ហាញថា ចាប់ពីខែមករា ដល់ខែសីហា ផលិតផលដែលកម្ពុជានាំចេញទៅជប៉ុន មានតម្លៃសរុប ១ ១២៤,២៣ លានដុល្លារ កើនឡើង ៧,៣ ភាគរយ ពីចំនួន ១ ០៤៨,៩៨ លានដុល្លារ នារយៈពេលដូចគ្នាឆ្នាំ ២០២០។ ចំណែកការនាំទំនិញពីជប៉ុនមកកម្ពុជាក្នុងអំឡុងពេលខាងលើមានទឹកប្រាក់ ៣៨៥,១៤ លានដុល្លារ កើន ២៨ ភាគរយពីចំនួន ៣០០,៩ លានដុល្លារ។
ផលិតផលដែលកម្ពុជានាំទៅជប៉ុនមានដូចជា សម្លៀកបំពាក់ គ្រឿងផ្គុំអគ្គិសនី និងគ្រឿងផ្គុំអេឡិចត្រូនិក ខណៈការនាំចូលពីជប៉ុនមានដូចជា គ្រឿងម៉ាស៊ីន និងផលិតផលប្រើប្រាស់បច្ចេកវិទ្យាទំនើបៗ។ ចំណែកផលិតផលជប៉ុននាំមកកម្ពុជា មានភាគច្រើនជាគ្រឿងម៉ាស៊ីន គ្រឿងអេឡិចត្រូនិក និងបច្ចេកវិទ្យាទំនើបៗ។
លោក លឹម ហេង អនុប្រធានសភាពាណិជ្ជកម្មកម្ពុជា បានប្រាប់ភ្នំពេញប៉ុស្តិ៍ថា ទោះបីវិបត្តិនៃការឆ្លងរាលដាលជំងឺកូវីដ ១៩ នៅលើពិភពលោកនៅមិនទាន់មានភាពធូរស្រាល ប៉ុន្តែគេសង្កេតឃើញការនាំចេញ-នាំចូលទំនិញរវាងកម្ពុជា ជប៉ុនបានចាប់ផ្តើមកើនឡើងវិញជាបណ្តើរៗហើយ ខុសពីឆ្នាំមុនដែលការនាំចេញ និង នាំចូលធ្លាក់ចុះព្រមៗគ្នា។
លោកបន្តថា នេះជាសញ្ញាល្អសម្រាប់ទិដ្ឋភាពជារួមនៃទំនាក់ទំនងពាណិជ្ជកម្មរវាងកម្ពុជា និងជប៉ុន ចាប់ពីដើមឆ្នាំ ២០២១ មក ខណៈសញ្ញាវិជ្ជមានបន្ថែមទៀតត្រូវរំពឹងថា នឹងមានសម្ទុះខ្លាំងនៅពេលការបើកផ្លូវហោះហើរផ្ទាល់រវាងប្រទេសទាំង ២ ចាប់ផ្តើមឡើងវិញ។
លោកថ្លែងថា៖ «បន្ទាប់ពីបង្កើតបានកិច្ចព្រមព្រៀងពាណិជ្ជកម្មសេរីជាមួយប្រទេសចិន និងកូរ៉េ ខ្ញុំរំពឹងថា កម្ពុជាក៏អាចនឹងសម្រេចបានកិច្ចព្រមព្រៀងពាណិជ្ជកម្មសេរីជាមួយប្រទេសជប៉ុនផងដែរ។ នៅពេលមានកិច្ចព្រមព្រៀងនេះ ការនាំចេញ និងនាំចូលរវាងប្រទេសទាំង ២ ប្រាកដនឹងមានកំណើនខ្ពស់បន្ថែមទៀត បើធៀបនឹងពេលបច្ចុប្បន្ន»។
លោកប្រាប់ទៀតថា ទាក់ទងនឹងកំណើនខ្ពស់ (គិតជាភាគរយ) នៃការនាំចូលរបស់ជប៉ុននាពេលនេះ គឺមិនមែនជាចំណុចអវិជ្ជមានសម្រាប់សេដ្ឋកិច្ចកម្ពុជាទេ ព្រោះផលិតផលដែលនាំចូលពីជប៉ុន គឺភាគច្រើនលើសលប់ជាគ្រឿងចក្រ និងគ្រឿងអេឡិចត្រូនិក ដែលជាឧបករណ៍សំខាន់សម្រាប់ប្រើប្រាស់ក្នុងចង្វាក់ផលិតកម្មនៅកម្ពុជា។ លោកអះអាងថា៖ «ផលិតផលទាំងអស់នោះ អាចជាគ្រឿងម៉ាស៊ីនសម្រាប់ផលិត ផលិតផលនាំចេញទៅកាន់ទីផ្សារអន្តរជាតិ»។
ពាណិជ្ជកម្មទ្វេភាគីកម្ពុជា ជប៉ុន ក្នុងឆ្នាំ ២០២០ មានទឹកប្រាក់សរុប ២ ១០១,៧៨ លានដុល្លារ ធ្លាក់ចុះ ៨,៣៥ ភាគរយធៀបឆ្នាំ ២០១៩ ក្នុងនោះការនាំចេញមានទឹកប្រាក់ ១៦១៧,០៨ លានដុល្លារ ធ្លាក់ចុះ ៦,៦ ភាគរយ និងនាំចូលមានទឹកប្រាក់ ៤៨៤,៧០ លានដុល្លារ ធ្លាក់ ១៣,៨ ភាគរយ។ នេះបើតាមទិន្នន័យពី អង្គការពាណិជ្ជកម្មក្រៅប្រទេសជប៉ុន Jetro៕ LA