.jpg)
រាជធានីភ្នំពេញ–ក្រុមហ៊ុនទូរគមនាគមន៍ឈានមុខគេនៅកម្ពុជា មិត្តហ្វូន បានប្រកាសថា ផែនការអភិវឌ្ឍន៍ឌីជីថលគ្រប់ជ្រុងជ្រោយ និងប្រកបដោយបរិយាប័ន្នបំផុតដែលខ្លួនប្ដេជ្ញាអនុវត្ត នឹងមិនទុកចោលអ្នកណាម្នាក់ នៅក្នុងសង្គមឌីជីថលដែលប្រែប្រួលយ៉ាងឆាប់រហ័សឡើយ។
នៅក្រោមផែនការនេះ ក្រុមហ៊ុននឹងពង្រីកហេដ្ឋារចនាសម្ព័ន្ធនិងសេវាទូរគមនាគមន៍ឲ្យបានគ្របដណ្ដប់ទៅដល់គ្រប់ច្រកល្ហក រួមទាំងតំបន់ដាច់ស្រយាលបំផុត នៅក្នុងប្រទេសកម្ពុជា ដើម្បីផ្ដល់លទ្ធភាពដល់ប្រជាជនគ្រប់រូបឲ្យទទួលបានសេវាកម្មរបស់មិត្តហ្វូន។ នេះបើយោងតាមអគ្គនាយករង របស់ក្រុមហ៊ុន មិត្តហ្វូន ។
លោក ញ៉ុង ឌិនថន អគ្គនាយករង ក្រុមហ៊ុន មិត្តហ្វូន បានមានប្រសាសន៍ថា ផែនការអភិវឌ្ឍន៍ឌីជីថលរបស់ក្រុមហ៊ុននឹងធានាថា ប្រជាជនទាំងអស់នៅទូទាំងប្រទេសអាចទទួលបាន និងប្រើប្រាស់បណ្ដាញទូរគមនាគមន៍ដែលមានគុណភាព បច្ចេកវិទ្យានិងសេវាកម្មឌីជីថលទំនើបបំផុត ដែលក្រុមហ៊ុនបានដាក់ពង្រាយឲ្យប្រើប្រាស់។
លោក ញ៉ុង ឌិនថន មានប្រសាសន៍យ៉ាងដូច្នេះថា៖ «គោលដៅរបស់យើង គឺពង្រីកបណ្ដាញនិងសេវាកម្មទូរគមនាគមន៍ឲ្យបានទូលំទូលាយបំផុត ទៅដល់គ្រប់ទិសទីនិងទៅដល់តំបន់ដាច់ស្រយាលបំផុត ដើម្បីឲ្យប្រជាជនគ្រប់រូបអាចទទួលផលប្រយោជន៍ពីបច្ចេកវិទ្យានិងសេវាកម្មឌីជីថលទំនើបរបស់ក្រុមហ៊ុន»។
លោកបានបន្តថា៖ «នៅក្រុមហ៊ុនមិត្តហ្វូន យើងប្ដេជ្ញាចិត្តមិនទុកចោលអ្នកណាម្នាក់ឡើយ នៅក្នុងសង្គមឌីជីថលដែលយើងបាននិងកំពុងកសាងឡើង ដោយរួមចំណែកលើកកម្ពស់ការអភិវឌ្ឍឌីជីថលប្រកបដោយបរិយាប័ន្ននិងនិរន្តរភាពរបស់ប្រទេសកម្ពុជា»។
ជាមួយនឹងយុទ្ធសាស្ត្រ ៥ ឆ្នាំ ពីឆ្នាំ ២០២១ ដល់ឆ្នាំ ២០២៥ របស់ខ្លួន ក្រុមហ៊ុនមិត្តហ្វូនបន្តការអភិវឌ្ឍប្រកបដោយចិរភាពរបស់ខ្លួនបន្ថែមទៀត ដើម្បីដើរទន្ទឹមគ្នានឹងនិន្នាការអភិឌ្ឍន៍ក្នុងបរិបទបច្ចេកវិទ្យាឌីជីថលបច្ចុប្បន្ន។ នៅក្រោមយុទ្ធសាស្ត្រអភិវឌ្ឍន៍នេះ ក្រុមហ៊ុនដាក់ចេញនូវបេសកកម្មមួយដើម្បីកសាងទំនាក់ទំនងសង្គមឌីជីថល ក្នុងគោលដៅដើម្បីធ្វើឲ្យមិត្តហ្វូន ឈានមុខគេនៅក្នុងវិស័យទូរគមនាគមន៍និងបច្ចេកវិទ្យាឌីជីថលនៅកម្ពុជា។
មិត្តហ្វូន បានវិនិយោគដ៏ច្រើនសន្ធឹកសន្ធាប់ទៅលើការបង្កើតនិងពង្រីកសេវាកម្មឌីជីថល ដែលរួមផលិតផលបច្ចេកវិទ្យាលេចធ្លោ ដូចជា CamID (Super app), ប្រព័ន្ធគ្រប់គ្រងព័ត៌មានសាលារៀន (SIS), E-money (E-wallet) ជាដើម ក្នុងកិច្ចប្រឹងប្រែងដើម្បីកសាងសង្គមទំនាក់ទំនងឌីជីថលមួយនៅកម្ពុជា។ សម្រាប់ផលិតផលទាំងនេះហើយ ដែលមិត្តហ្វូន បានទទួលពានរង្វាន់ Grand Globee ពីកម្មវិធីប្រកួតប្រជែងពានរង្វាន់ធុរកិច្ចឆ្នើមអន្តរជាតិឆ្នាំ ២០២១ លើកទី៨ របស់ស្ថាប័ន Globee Awards។
មិត្តហ្វូន បាននិងកំពុងនាំមុខគេនៅក្នុងការជួយគាំទ្រដល់រាជរដ្ឋាភិបាលកម្ពុជា ដើម្បីអនុវត្តកម្មវិធីអភិវឌ្ឍន៍ឌីជីថលជាតិរបស់ខ្លួន។ កន្លងមក ក្រុមហ៊ុនបានធ្វើការយ៉ាងជិតស្និទ្ធិជាមួយក្រសួងស្ថាប័នរដ្ឋសំខាន់ៗ ដើម្បីអនុវត្តគម្រោងឌីជីថលូបនីយកម្មនៅក្នុងវិស័យជាច្រើន ដូចជា វិស័យអប់រ សុខាភិបាល និងដឹកជញ្ជូន។
ជាក្រុមហ៊ុនឈានមុខគេមួយនៅក្នុងវិស័យទូរគមនាគមន៍ និងបច្ចេកវិទ្យាឌីជីថល មិត្តហ្វូន មានហេដ្ឋារចនាសម្ព័ន្ធបណ្ដាញធំជាងគេបំផុត ដែលបម្រើសេវាកម្មដល់ប្រជាជនកម្ពុជាប្រមាណ ៩ លាននាក់ នៅទូទាំងប្រទេស៕
