ភ្នំពេញៈ លោក គុណ ញឹម អគ្គនាយកនៃអគ្គនាយកដ្ឋានគយ និងរដ្ឋាករកម្ពុជា (អគរ) បានអំពាវនាវជាថ្មីម្តងទៀតដល់ម្ចាស់រថយន្តដែលបាននាំចូល និងមិនទាន់បានបំពេញកាតព្វកិច្ចពន្ធត្រូវរួសរាន់មកបង់ឱ្យបានមុនថ្ងៃទី ៣១ ខែធ្នូ ឆ្នាំ ២០២១ ដើម្បីបានទទួលការអនុគ្រោះពន្ធពីរដ្ឋាភិបាល។
ការលើកឡើងរបស់លោក គុណ ញឹម ធ្វើឡើងក្នុងសន្និសីទសារព័ត៌មានស្តីពីវឌ្ឍនភាពនៃការអនុវត្តការប្រមូលពន្ធលើយានយន្តគ្មានពន្ធ និងអាករនាំចូលដែលមានស្រាប់ក្នុងប្រទេសនាថ្ងៃទី ២៧ ខែតុលា តាមប្រព័ន្ធវីដេអូ។
លោកនិយាយថា បើគិតពីកាលបរិច្ឆេទនៃការចាប់ផ្តើមប្រមូលពន្ធ និងអាករលើរថយន្តគ្មានពន្ធមានស្រាប់នៅក្នុងប្រទេសជ្រកក្រោមស្លាកលេខផ្សេងៗរហូតមកដល់ត្រឹមថ្ងៃទី ២៦ ខែតុលា ឆ្នាំ ២០២១ គឺមានរថយន្តសរុប ៥៤២ គ្រឿង (រថយន្តចង្កូតស្តាំ ១៩០ គ្រឿង) បានស្ម័គ្រចិត្តចូលមកបំពេញកាតព្វកិច្ចពន្ធ និងអាករ។
លោកថ្លែងថា៖ «ដើម្បីជួយសម្រាលបន្ទុកដល់ម្ចាស់រថយន្ត អគរ បានបន្ធូរបន្ថយតម្លៃគិតពន្ធលើរថយន្តគ្មានពន្ធមានស្រាប់នៅក្នុងប្រទេស ជាពិសេសប្រភេទឆ្នាំម៉ូដែលចាស់ៗបន្ថែមលើការអនុគ្រោះទឹកប្រាក់ពន្ធ និងអាករចំនួន ១០ ភាគរយដែលសម្រេចដោយក្រសួងសេដ្ឋកិច្ច និងហិរញ្ញវត្ថុ»។
កាលពីថ្ងៃទី ១២ ខែតុលា អគ្គនាយកដ្ឋានគយ និងរដ្ឋាករកម្ពុជាបានសម្រេចជាថ្មីលើការកែសម្រួលជាបណ្តោះអាសន្នតារាងតម្លៃគិតពន្ធគយសម្រាប់អនុវត្តលើរថយន្តគ្មានពន្ធ និងអាករនាំចូលមានស្រាប់ក្នុងប្រទេសចាប់ពីថ្ងៃទី ១២ ខែតុលា ឆ្នាំ ២០២១ រហូតដល់ថ្ងៃទី ៣១ ខែធ្នូ ឆ្នាំ ២០២១។
លោក សឿន ដារ៉ា នាយកប្រតិបត្តិសហព័ន្ធឧស្សាហកម្មយានយន្តកម្ពុជាបានស្វាគមន៍ចំពោះចំណាត់ការរបស់រដ្ឋាភិបាលលើរថយន្តដែលគ្មានពន្ធ និងរថយន្តចង្កូតស្ដាំ ដែលកំពុងចរាចរណ៍ក្នុងប្រទេសកម្ពុជា និងការប្ដេជ្ញាចិត្តរបស់ប្រមុខរដ្ឋាភិបាលក្នុងការបិទបញ្ចប់បញ្ហារថយន្តខុសច្បាប់ទាំងនេះឱ្យបានឆាប់រហ័ស ដើម្បីធានាដល់កិច្ចការប្រមូលពន្ធ និងការអនុវត្តច្បាប់ចរាចរណ៍ឱ្យមានប្រសិទ្ធភាព។
លោកនិយាយថា ចំពោះការបន្ធូរបន្ថយតម្លៃពន្ធនេះនឹងជួយសម្រួលដល់កិច្ចការប្រមូលពន្ធឱ្យបានឆាប់ និងមានប្រសិទ្ធភាពជាងមុន ហើយនេះជាសាថ្មីមួយទៀតទៅដល់អ្នកប្រើប្រាស់រថយន្តគ្មានពន្ធឱ្យចូលខ្លួនមកបំពេញកាតព្វកិច្ចពន្ធឱ្យបានត្រឹមត្រូវ និងឱ្យបានមុនឱសានវាទ និងបញ្ឈប់រាល់ការនាំចូល និងប្រើប្រាស់រថយន្តផ្ទុយនឹងច្បាប់ដែលបានកំណត់ ដែលធ្វើឱ្យរដ្ឋបាត់ចំណូលពន្ធ និងប៉ះពាល់ដល់ការប្រកួតប្រជែងក្នុងឧស្សាហកម្មយានយន្តកម្ពុជាផងដែរ។
លោក គុណ ញឹម លើកឡើងថា ការអនុគ្រោះនេះនឹងត្រូវបញ្ចប់ត្រឹមថ្ងៃទី ៣១ ខែធ្នូ ឆ្នាំ ២០២១ សម្រាប់រថយន្តចង្កូតឆ្វេង។ ទោះយ៉ាងណា ម្ចាស់រថយន្តនៅតែអាចបង់ពន្ធអាករបាន ប៉ុន្តែត្រូវបង់ពន្ធ និងអាករពេញ ដោយគ្មានការបន្ធូរបន្ថយទៀតឡើយរហូតដល់ថ្ងៃទី ៣០ ខែមិថុនា ឆ្នាំ ២០២២។ សម្រាប់រថយន្តចង្កូតស្តាំ ការអនុគ្រោះនឹងត្រូវបានបន្តរហូតដល់ថ្ងៃទី ៣០ ខែមិថុនា ឆ្នាំ ២០២២ ដោយសារម្ចាស់ត្រូវការពេលវេលាយូរក្នុងការកែចង្កូត។
លោកបន្ថែមថា ការកែចង្កូតកំពុងតែជាក្តីបារម្ភរបស់ម្ចាស់រថយន្តចង្កូតស្តាំ ដោយសារតែយានដ្ឋានកែចង្កូតដែលទទួលស្គាល់ដោយក្រសួងសាធារណការ និងដឹកជញ្ជូនមានចំនួនតិចតួច។ ដើម្បីដោះស្រាយបញ្ហានេះ ក្រសួងសេដ្ឋកិច្ច បានស្នើឱ្យក្រសួងសាធារណការពិនិត្យលទ្ធភាពផ្តល់អាជ្ញាប័ណ្ណបន្ថែមដល់យានដ្ឋានដែលមានជំនាញ និងសមត្ថភាពកែចង្កូត ដើម្បីបម្រើសេចក្តីត្រូវការជាក់ស្តែងរបស់ពលរដ្ឋដែលកំពុងប្រើប្រាស់រថយន្តចង្កូតស្តាំមានស្រាប់។
លោកបញ្ជាក់ថា៖ «បន្ទាប់ពីថ្ងៃទី ១ ខែកក្កដា ឆ្នាំ ២០២២ អគរ នឹងអនុវត្តយ៉ាងម៉ឺងម៉ាត់ និងសកម្មនូវវិធានការរបស់រាជរដ្ឋាភិបាលក្នុងការបង្ក្រាបរថយន្តគ្មានពន្ធ និងអាករនាំចូល។ នៅពេលនោះ រថយន្តចង្កូតស្តាំដែលបង្ក្រាបបាននឹងត្រូវកម្ទេចចោល ឬដោះបំបែកជាគ្រឿងបន្លាស់»។
«នេះជាឱកាសចុងក្រោយដែលរដ្ឋាភិបាលបានអនុគ្រោះឱ្យម្ចាស់រថយន្តគ្មានពន្ធ និងអាករ ទាំងចង្កូតឆ្វេង និងចង្កូតស្តាំចូលមកបំពេញកាតព្វកិច្ចពន្ធ និងអាករ, ដូច្នេះម្ចាស់រថយន្តគ្មានពន្ធ ចូលមកបំពេញកាតព្វកិច្ចឱ្យបានគ្រប់ៗគ្នា និងទាន់ពេលវេលា»។ នេះបើយោងតាមលោក គុណ ញឹម៕ LA
វីដេអូ៖