ភ្នំពេញៈ មន្ត្រីជាន់ខ្ពស់ក្រសួងទេសចរណ៍រំពឹងថា គម្រោងគាំទ្រ «ការស្តារសហគ្រាសក្នុងវិស័យកសិអាហារ និងវិស័យទេសចរណ៍» នៅក្នុងខេត្តចំនួន ៣ របស់ប្រទេសកម្ពុជាដែលគាំទ្រពីទីភ្នាក់ងារស្វ៊ីសសម្រាប់ការអភិវឌ្ឍ និងកិច្ចសហប្រតិបត្តិការ (SDC) តាមរយៈអង្គការ UNIDO ប្រមាណ ១ លានដុល្លារនឹងជួយជំរុញកំណើនសេដ្ឋកិច្ចនៅក្នុងសហគមន៍ និងស្តារវិស័យទេសចរណ៍ឡើងវិញក្រោយពីវិបត្តិជំងឺកូវីដ ១៩។
លោក ជួប រតនា ប្រធាននាយកដ្ឋានផែនការអភិវឌ្ឍន៍ទេសចរណ៍នៃក្រសួងទេសចរណ៍បានប្រាប់ ភ្នំពេញ ប៉ុស្តិ៍ នៅថ្ងៃទី ២៨ ខែតុលាថា គម្រោង «ការស្តារសហគ្រាសក្នុងវិស័យកសិអាហារ និងវិស័យទេសចរណ៍» គឺជាខ្សែចង្វាក់ផ្គត់ផ្គង់នៅក្នុងវិស័យទេសចរណ៍ដែលវានឹងជួយចូលរួមស្តារសេដ្ឋកិច្ចឡើងវិញ និងលើកកម្ពស់វិស័យទេសចរណ៍ក្រោយវិបត្តិនៃជំងឺកូវីដ ១៩ បានវិលទៅរកការគ្រប់គ្រង។
លោកបន្តថា គម្រោងនេះនឹងត្រូវអនុវត្តនៅក្នុងខេត្តចំនួន ៣ រួមមាន ខេត្តបាត់ដំបង ពោធិ៍សាត់ និងកំពង់ឆ្នាំង ដោយមានសហគ្រាស សហគមន៍ទេសចរណ៍ និងប្រតិបត្តិករទេសចរណ៍ជាង ៦០ ចូលរួមបណ្តុះបណ្តាល ពង្រឹងស្តង់ដាផលិតផល ការវេចខ្ចប់ និងការជំរុញសកម្មភាពឱ្យមានវិធានសុវត្ថិភាពតាមមូលដ្ឋានអាជីវកម្ម។
បើតាមលោក រតនា គម្រោងនេះនឹងត្រូវអនុវត្តរយៈពេល ១ ឆ្នាំ បន្ទាប់ពីនោះ គឺមន្ទីរទេសចរណ៍ និងស្ថាប័នជាដៃគូគម្រោងនឹងត្រូវអនុវត្តបន្តទៀត ព្រោះនេះគឺជាគម្រោងស្តារសេដ្ឋកិច្ច និងទេសចរណ៍ឡើងវិញ ដោយត្រូវធ្វើយ៉ាងណាឱ្យគម្រោងនេះរួចរាល់ សម្រាប់ត្រៀមទទួលភ្ញៀវទេសចរក្រោយស្ថានភាពវិបត្តិជំងឺកូវីដ ១៩។
លោក ជួប រតនា បានថ្លែងថា៖ «អ្វីដែលយើងរំពឹងទុកសម្រាប់វិស័យទេសចរណ៍ គឺប្រតិបត្តិករទេសចរណ៍នៅក្នុងខេត្តគោលដៅរបស់យើងបានត្រៀមខ្លួនរួចជាស្រេចសម្រាប់ស្វាគមន៍ទេសចរនៅក្នុងស្រុក និងក្រៅស្រុក។ នៅពេលភ្ញៀវទេសចរមកដល់ គឺយើងមានអ្វីទាំងអស់មានទាំងសហគមន៍ទេសចរណ៍ សហគមន៍អ្នកផលិត និងប្រតិបត្តិករទេសចរណ៍»។
លោក តុន ណៃ តំណាងសហគមន៍ព្រែកទាល់ស្ថិតនៅឃុំកោះជីវាំង ស្រុកឯកភ្នំ ខេត្តបាត់ដំបង ដែលនៅជាប់ទន្លេសាប បានយល់ឃើញថា គម្រោងនេះនឹងចូលរួមបង្កើនចំណូល និងទេសចរណ៍នៅក្នុងមូលដ្ឋានរបស់លោកឱ្យកាន់តែរីកចម្រើន តាមរយៈការបណ្តុះបណ្តាលឱ្យមានការវេចខ្ចប់នូវផលិតផលរបស់សហគមន៍ឱ្យមានស្តង់ដា និងបច្ចេកទេសត្រឹមត្រូវ។
លោកបន្តថា លើសពីនេះទៀតគម្រោងនេះផ្តល់ឱ្យសហគមន៍ទេសចរណ៍នានាមានទំនាក់ទំនងក្នុងភាពជាដៃគូដើម្បីលក់ផលិតផលចេញ និងចូលជាមួយដៃគូ និងដើម្បីលើកកម្ពស់ផ្នែកផលិតផលដូចជា កសិកម្ម នេសាទ និងសេវាកម្មផ្សេងៗទៀតនៅក្នុងផ្នែកទេសចរណ៍។
លោកបន្តថា៖ «វាមានផលប្រយោជន៍យ៉ាងសំខាន់ក្នុងការចូលរួមផ្តល់ចំណូលសេដ្ឋកិច្ចដល់សហគមន៍ តាមរយៈការទទួលវេចខ្ចប់ និងការស្នាក់នៅប្រកបដោយស្តង់ដា និងភាពកក់ក្តៅដល់ភ្ញៀវដើម្បីទាក់ទាញចិត្តភ្ញៀវមកកម្សាន្តម្តងហើយម្តងទៀតនឹងស្រោចចំណូលដល់សហគមន៍យើងឱ្យមានភាពរីកចម្រើន និងជីវភាពធូរធារ»។
គម្រោងគាំទ្រ «ការស្តារសហគ្រាសក្នុងវិស័យកសិអាហារ និងវិស័យទេសចរណ៍ជាហិរញ្ញប្បទានរបស់ទីភ្នាក់ងារស្វ៊ីស សម្រាប់ការអភិវឌ្ឍ និងកិច្ចសហប្រតិបត្តិការ (SDC) តាមរយៈអង្គការ UNIDO ដើម្បីស្តារសហគ្រាស ធុនតូច និងមធ្យមក្នុងវិស័យកសិអាហារ និងទេសចរណ៍ក្នុងខេត្តបាត់ដំបង ពោធិ៍សាត់ និងខេត្តកំពង់ឆ្នាំង។
របាយការណ៍ស្ថិតិទេសចរណ៍ឆ្នាំ ២០២០ បានបង្ហាញថា ភ្ញៀវទេសចរអន្តរជាតិដែលកម្ពុជាទទួលបានក្នុងឆ្នាំ ២០២០ មានត្រឹម ១,០២៣ ពាន់លានដុល្លារធ្លាក់ចុះ ៧៩,២ ភាគរយបើធៀបនឹងឆ្នាំ ២០១៩ ដែលមានចំនួន ៤,៩១៩ ពាន់លានដុល្លារ។
ភ្ញៀវទេសចរអន្តរជាតិមកប្រទេសកម្ពុជាមានចំនួន ១,៣១ លាននាក់ថយចុះ ៨០,២ ភាគរយធៀប ២០១៩ មានចំនួន ៦,៦១ លាននាក់៕ LA