.jpg)
រដ្ឋមន្ត្រីក្រសួងឧស្សាហកម្ម លោក ចម ប្រសិទ្ធ(ស្ដាំ) និងមានការអញ្ជើញចូលរួមពីតំណាងស្ថានទូត ក្នុងពិធីប្រកាសដាក់ឱ្យដំណើរការជាផ្លូវការនូវគេហទំព័រ KhmerSME នៅថ្ងៃទី ២៨ ខែតុលា។ រូបភាព សហការី
ភ្នំពេញៈ ក្រសួងឧស្សាហកម្ម វិទ្យាសាស្ត្រ បច្ចេកវិទ្យា និងនវានុវត្តន៍ បានប្រកាសដាក់ឱ្យដំណើរការជាផ្លូវការនូវគេហទំព័រ KhmerSME «ថ្នាលព័ត៌មានឌីជីថលជាតិសម្រាប់សហគ្រាសធុនមីក្រូ តូច និងមធ្យម» ដែលគេហទំព័រនេះនឹងជួយផ្តល់ព័ត៌មានអាជីវកម្មយ៉ាងទូលំទូលាយ និងសម្បូរបែបដល់សហគ្រាសធុនមីក្រូ តូច និងមធ្យមនៅកម្ពុជា។
ការប្រកាសដាក់ឱ្យដំណើរការនេះត្រូវបានធ្វើឡើងតាមប្រព័ន្ធអនឡាញ ដោយមានការចូលរួមពីលោក ចម ប្រសិទ្ធ រដ្ឋមន្ត្រីក្រសួងឧស្សាហកម្ម វិទ្យាសាស្ត្រ បច្ចេកវិទ្យា និងនវានុវត្តន៍ និងមានការអញ្ជើញចូលរួមពីតំណាងស្ថានទូត តំណាងក្រសួងស្ថាប័ន អង្គការអន្តរជាតិ និងតំណាងវិស័យឯកជនផងដែរ។
គេហទំព័រ KhmerSME គឺជាថ្នាលព័ត៌មានឌីជីថល បង្កើតឡើងសម្រាប់សហគ្រាសធុនមីក្រូ តូច និងមធ្យម ក្រោមកិច្ចការជាមួយអង្គការ GIZ។ តាមរយៈ KhmerSME ក្រុមហ៊ុន/សហគ្រាស នឹងអាចពង្រឹងសមត្ថភាពខ្លួន និងពង្រីកវិមាត្រធុរកិច្ចរបស់ខ្លួនក្នុងការផលិត និងផ្តល់សេវាកម្មប្រកបដោយការប្រកួតប្រជែង។
គេហទំព័រ KhmerSME នឹងតភ្ជាប់ទៅគេហទំព័រ ASEAN Access ដែលជាគេហទំព័រមួយសម្រាប់សហគ្រាសធុនតូច និងមធ្យមក្នុងតំបន់អាស៊ាន ហើយត្រូវបានដាក់ឱ្យដំណើរការជាផ្លូវការនៅថ្ងៃទី ១៦ ខែ មិថុនា ឆ្នាំ ២០២១។
រដ្ឋមន្ត្រីក្រសួងឧស្សាហកម្ម វិទ្យាសាស្ត្រ បច្ចេកវិទ្យា និងនវានុវត្តន៍ លោក ចម ប្រសិទ្ធ បានលើកឡើងថា គេហទំព័រ KhmerSME គឺជាថ្នាលព័ត៌មានឌីធីផល (Digital Platform) ដែលនឹងផ្ដល់ឱកាសឱ្យសហគ្រាសធុនមីក្រូ តូច និងមធ្យម ទាំងអស់ទទួលបាននូវព័ត៌មាននៅនឹងកន្លែងដូចជា ផ្នែកច្បាប់ បទប្បញ្ញត្តិ លិខិតបទដ្ឋានគតិយុត្ត ការបណ្តុះបណ្តាលបច្ចេកទេស ការផ្ទេរបច្ចេកវិទ្យា និងនវានុវត្តន៍ ហិរញ្ញទាន ទីផ្សារ ការចាប់ផ្តើមអាជីវកម្មថ្មី ការលើកទឹកចិត្តសម្រាប់ការធ្វើធុរកិច្ចឱ្យកាន់តែមានប្រសិទ្ធភាពខ្ពស់ និងការប្រកួតប្រជែងប្រកបដោយបរិយាប័ន្ន។
អគ្គនាយកនៃអគ្គនាយកដ្ឋានសហគ្រាសធុនតូច និងមធ្យម លោក ហ៊ត ផេង បានលើកឡើងថា សហគ្រាសធុនមីក្រូ តូច និងមធ្យម បាននិងកំពុងដើរតួនាទីយ៉ាងសំខាន់នៅក្នុងការចូលរួមចំណែកជំរុញកំណើនសេដ្ឋកិច្ចកម្ពុជា។ ទោះយ៉ាងណាសហគ្រាសទាំងនោះភាគច្រើននៅមិនទាន់បានមកចុះបញ្ជីនៅអាជ្ញាធរនោះទេ។
លោកនិយាយថា៖ «ដោយពិនិត្យឃើញថាម្ចាស់សហគ្រាសភាគច្រើនមានការពិបាកក្នុងការទទួលបានព័ត៌មានទាក់ទងនឹងការធ្វើធុរកិច្ច ដូចនេះគេហទំព័រ KhmerSME គឺជាថ្នាលព័ត៌មានឌីជីថលផ្តល់លទ្ធភាពដល់ម្ចាស់សហគ្រាសទាំងនោះឱ្យទទួលបានព័ត៌មានសំខាន់ៗដូចជា ច្បាប់ លិខិតបទដ្ឋានគតិយុត្ត ទីផ្សារធុរកិច្ច ហិរញ្ញវត្ថុ ឥណទាន ការអភិវឌ្ឍធនធានមនុស្ស និងការប្រកួតប្រជែងក្នុងតំបន់ ពង្រីកបណ្តាញដៃគូអាជីវកម្មឱ្យបានទូលំទូលាយខ្លាំងជាងមុន»។
បច្ចុប្បន្នសហគ្រាសធុនតូច និងមធ្យមមានប្រមាណជាង ៥២ ម៉ឺនមូលដ្ឋាននៅក្នុងប្រទេសកម្ពុជា។ នេះបើតាមក្រសួងឧស្សាហកម្ម វិទ្យាសាស្ត្រ បច្ចេកវិទ្យា និងនវានុវត្តន៍៕
