.jpg)
ទំហំពាណិជ្ជកម្មទ្វេភាគី កម្ពុជា-កូរ៉េ ក្នុងរយៈពេល ៩ខែឆ្នាំ ២០២១ មានតម្លៃប្រមាណជាង ៧២០ លានដុល្លារ ធ្លាក់ចុះជាង ១៨ភាគរយ បើធៀបនឹងរយៈពេលដូចគ្នាឆ្នាំ ២០២០។ រូបថត យូសុះ អាប់ឌុលរ៉ាស់ហ៊ីម
ភ្នំពេញៈ ការធ្វើពាណិជ្ជកម្មទ្វេភាគីរវាងកម្ពុជា និងកូរ៉េ រយៈពេល ៩ ខែឆ្នាំ ២០២១ មានតម្លៃសរុបជាង ៧២០ លានដុល្លារ ថយចុះជាង ១៨ ភាគរយធៀបនឹងរយៈពេលដូចគ្នាឆ្នាំ ២០២០ ខណៈអ្នកជំនាញលើកឡើងថា កិច្ចព្រមព្រៀងពាណិជ្ជកម្មសេរីទ្វេភាគីកម្ពុជា កូរ៉េ (CKFTA) ដែលទើបចុះហត្ថលេខានាពេលថ្មីៗនេះនឹងជួយធ្វើឱ្យពាណិជ្ជកម្មប្រទេសទាំង ២ មានកំណើនឡើងវិញ។
ទិន្នន័យរបស់សមាគមពាណិជ្ជកម្មអន្តរជាតិកូរ៉េ (Kita) បង្ហាញថា ការនាំចេញ-នាំចូលទំនិញរវាងកម្ពុជា កូរ៉េ ពីខែមករា ដល់ខែកញ្ញា ឆ្នាំ ២០២១ មានតម្លៃសរុប ៧២០,៥២ លានដុល្លារ ធ្លាក់ចុះ ១៨,៦ ភាគរយធៀបនឹងរយៈពេលដូចគ្នាឆ្នាំ ២០២០។ ក្នុងនោះការនាំចេញទំនិញពីកម្ពុជាមានទឹកប្រាក់ ២៥៩,០៨ លានដុល្លារ ធ្លាក់ ១៨,៥៥ ភាគរយ និងការនាំចូលមានទឹកប្រាក់ ៤៦១,៤៣ លានដុល្លារធ្លាក់ចុះ ១៨,៦៤ ភាគរយ។
កាលពីថ្ងៃទី ២៦ តុលា ឆ្នាំ ២០២១ រដ្ឋមន្ត្រីក្រសួងពាណិជ្ជកម្មកម្ពុជា លោក ប៉ាន សូរស័ក្ដិ បានចុះហត្ថលេខាលើកិច្ចព្រមព្រៀងពាណិជ្ជកម្មសេរីទ្វេភាគីតាមប្រព័ន្ធអនឡាញជាមួយរដ្ឋមន្ត្រីពាណិជ្ជកម្មនៃសាធារណរដ្ឋកូរ៉េ លោក YEO Han-Koo។ កិច្ចព្រមព្រៀងនេះរំពឹងថា នឹងជំរុញកំណើននៃការនាំចេញកំណើនផលទុនសរុបក្នុងស្រុក និងឱកាសការងារ ព្រមទាំងជួយស្តារឡើងវិញនូវសេដ្ឋកិច្ចរបស់ប្រទេសទាំង ២ ឱ្យបានឆាប់ពីវិបត្តិកូវីដ ១៩។
តាមរយៈកិច្ចព្រមព្រៀងនេះ កម្ពុជាសង្ឃឹមនឹងអាចមានការនាំចេញផលិតផលខ្លួនទៅទីផ្សារប្រទេសកូរ៉េកាន់តែច្រើន ជាពិសេសផលិតផលសម្លៀកបំពាក់ ស្បែកជើង កាបូប គ្រឿងបន្លាស់ ឧបករណ៍អេឡិចត្រូនិក កៅស៊ូ និងផលិតផលកសិកម្ម ជាដើម។
អនុប្រធានសភាពាណិជ្ជកម្ម លោក លឹម ហេង បានប្រាប់ភ្នំពេញប៉ុស្តិ៍នាថ្ងៃទី ៣១ ខែតុលាថា ក្នុងឆ្នាំ ២០២១ ចង្វាក់ផលិតកម្មនៅកម្ពុជាបានជួបនឹងបញ្ហាជាច្រើនដែលបណ្តាលមកពីផលរំខានពីជំងឺកូវីដ ១៩ ខណៈផលិតផលកូរ៉េដែលនាំចូលមកកម្ពុជាក៏មិនសូវមានច្រើនដែរ។ ម្យ៉ាងទៀតផលិតផលផលិតនៅកម្ពុជាក្នុងពេលនេះក៏នៅមិនទាន់ឆ្លើយតបនឹងការចង់បានរបស់អ្នកប្រើប្រាស់នៅកូរ៉េផងដែរ។ ទោះយ៉ាងណា CKFTA នឹងជួយធ្វើឱ្យការធ្វើពាណិជ្ជកម្មប្រទេសទាំង ២ កើនឡើងក្នុងពេលឆាប់ៗ។ លោកលើកឡើងថា៖ «កិច្ចព្រមព្រៀងពាណិជ្ជកម្មទ្វេភាគីនឹងមិនត្រឹមតែជួយទាក់ទាញឱ្យក្រុមហ៊ុនកូរ៉េចូលមកវិនិយោគនៅកម្ពុជាប៉ុណ្ណោះទេ សូម្បីតែក្រុមហ៊ុនបរទេសមួយចំនួនដែលផលិតសម្រាប់នាំចេញទៅទីផ្សារកូរ៉េ ក៏អាចនឹងមកបើករោងចក្រផលិតនៅកម្ពុជាដែរ»។
អ្នកស្រាវជ្រាវសេដ្ឋកិច្ចអន្តរជាតិនៃវិទ្យាស្ថានទំនាក់ទំនងអន្តរជាតិនៃកម្ពុជា លោក ហុង វណ្ណៈ និយាយថា វិបត្តិកូវីដ ១៩ បានធ្វើឱ្យចង្វាក់ផលិតកម្មមួយចំនួនធ្លាក់ចុះ ហើយតម្រូវការប្រើប្រាស់ផលិតផលមួយចំនួនក៏បានធ្លាក់ចុះផងដែរ ព្រោះប្រាក់ចំណូលរបស់ប្រជាជនធ្លាក់ចុះ។ យ៉ាងទៀតការវិនិយោគរបស់កូរ៉េនៅកម្ពុជា ដើម្បីផលិតនាំចេញទៅប្រទេសកូរ៉េ ក៏នៅមានចំនួនតិចតួចនៅឡើយ។ លោកបន្ថែមទៀតថា ទោះយ៉ាងណាទំហំពាណិជ្ជកម្មរវាងប្រទេសទាំង ២ នឹងមានសម្ទុះឡើងវិញ បន្ទាប់ពីកម្ពុជា និងកូរ៉េ ចុះហត្ថលេខាលើកិច្ចព្រមព្រៀងពាណិជ្ជកម្មសេរីទ្វេភាគី (CKFTA)។
លោកបន្តថា៖ «ដោយសារកូរ៉េមានផលិតផលចម្រុះជាច្រើន ហេតុនេះកម្ពុជាត្រូវតែខិតខំបន្ថែមទៀតក្នុងការទាក់ទាញវិនិយោគិនកូរ៉េឱ្យចូលមកវិនិយោគនៅកម្ពុជា និងត្រូវសិក្សាពីការផលិតផលិតផលណាដែលមានតម្រូវការខ្ពស់នៅកូរ៉េ»៕ LA
