ភ្នំពេញៈ កម្ពុជាបាននាំចេញស្វាយស្រស់ និងផលិតផលពីផ្លែស្វាយទៅទីផ្សារអន្តរជាតិជាង ២២ ម៉ឺនតោនក្នុងរយៈពេល ១០ ខែ ឆ្នាំ ២០២១ ខណៈទីផ្សារប្រទេសវៀតណាមបានស្រូបយកជាង ១៧,៥ ម៉ឺនតោន។ នេះបើយោងតាមរបាយការណ៍ក្រសួងកសិកម្ម រុក្ខាប្រមាញ់ និងនេសាទ។
ប្រព័ន្ធទិន្នន័យគ្រឹះភូតគាមអនាម័យជាតិនៃក្រសួងកសិកម្មបានឱ្យដឹងថា ចាប់ពីខែមករា ដល់តុលា ឆ្នាំ ២០២១ ការនាំចេញផ្លែស្វាយស្រស់ តំណាប់ស្វាយ និងទឹកស៊ីរ៉ូស្វាយមានចំនួនសរុប ២២២ ២០០,១២ តោន ក្នុងនោះការនាំចេញទៅវៀតណាម ១៧៥ ៣២៤,៤៨ តោន។
បើតាមទិន្នន័យខាងលើនៅក្នុងរយៈពេលនេះការនាំចេញផ្លែស្វាយស្រស់មានចំនួន ២០២ ១៤១,៨១ តោនកើនឡើង ១៥៧,៨៣ ភាគរយបើធៀបនឹងរយៈពេលដូចគ្នាឆ្នាំ ២០២០ ដោយប្រទេសវៀតណាមទទួលទិញ ១៧៤ ៧៦៥,១៨ តោន, ថៃ ២៦ ៩៦៩,២៨ តោន, ចិន ២១៥,៩៨ តោន កូរ៉េ ១២៤,៣៨ តោន, ទីក្រុងហុងកុង ៥០,៧៨ តោន, សិង្ហបុរី ១៦,២០ តោន និងកូវ៉ែត ០,០១ តោន។
ដោយឡែកក្រៅពីផ្លែស្វាយស្រស់ កម្ពុជាក៏បាននាំចេញតំណាប់ស្វាយ ១៥ ៦៥១,៤២ តោន កើន ១៩៥,៤១ ភាគរយ ដោយនាំទៅចិន ១២ ៣៣០,៥៤ តោន, ថៃ ១ ៣១៤,៥៣ តោន, ហ្វីលីពីន ៨៨៤,៣០ តោន, វៀតណាម ៥៥៩,៣០ តោន, ជប៉ុន ៥១២,៥០ តោន, ចក្រភពអង់គ្លេស ២១,១៤ តោន កូរ៉េ ១៧,៥០ តោន, អាមេរិក ៨,៥៦ តោន, កោះតៃវ៉ាន់ ៣ តោន, កាហ្សាក់ស្ថាន ០,០៥ តោន និងរុស្ស៊ី ០,០០២ តោន។ ទឹកស៊ីរ៉ូស្វាយនាំចេញ ចំនួន ៤ ៤០០,៨៩ តោនកើន ៤១,០៤ ភាគរយដោយទៅហ្វីលីពីន ៤ ២៥២,៨៩ តោន និងចិន ១៤៨ តោន។
លោក ហ៊ុន ឡាក់ អគ្គនាយកក្រុមហ៊ុន រីចហ្វាម អេស៊ា ឯ.ក ដែលវិនិយោគលើចម្ការស្វាយ និងនាំចេញផ្លែស្វាយទៅក្រៅប្រទេសបានប្រាប់ភ្នំពេញ-ប៉ុស្តិ៍នាថ្ងៃទី ១ ខែវិច្ឆិកាថា ទីផ្សារនាំចេញ និងតម្លៃផ្លែស្វាយក្នុងឆ្នាំ ២០២១ មានលក្ខណៈល្អប្រសើរបើធៀបនឹងឆ្នាំកន្លងៗមក ជាពិសេសកាលពីខែឧសភាកម្ពុជាទើបទទួលបានទីផ្សារនាំចេញផ្លូវការទៅប្រទេសចិន។
លោកបន្តថា ការនាំចេញផ្លែស្វាយនឹងមានសម្ទុះច្រើនបន្ថែមទៀតចាប់ពីចុងខែវិច្ឆិកានេះទៅ ព្រោះជារដូវប្រមូលផល ហើយការនាំចេញទៅប្រទេសចិនរំពឹងនឹងមានបរិមាណកើនឡើងច្រើន។
លោកលើកឡើងថា៖ «ដោយសារផ្លែស្វាយស្រស់កម្ពុជាទើបត្រូវបានអាជ្ញាធរគយចិនអនុញ្ញាតឱ្យនាំទៅប្រទេសចិនជាផ្លូវការកាលពីខែឧសភា ដូច្នេះការនាំចេញនឹងមានកំណើនខ្ពស់បន្ថែមទៀតនៅពេលខាងមុខ»។
ទោះយ៉ាងណា លោក ហ៊ុន ឡាក់ លើកឡើងថា ដើម្បីឱ្យការនាំចេញផ្លែស្វាយទៅទីផ្សារអន្តរជាតិសម្រេចបានបរិមាណកាន់តែច្រើន អ្នកវិនិយោគក៏ដូចជាប្រជាកសិករចាំបាច់ត្រូវតែខិតខំបន្ថែមទៀតក្នុងការដាំដុះ ថែទាំ វេចខ្ចប់ និងដឹកជញ្ជូន ដើម្បីឱ្យស្របតាមស្តង់ដាកំណត់របស់ប្រទេសគោលដៅនាំចេញនីមួយៗ។
លោកនិយាយថា៖ «បច្ចុប្បន្នក្រៅពីបញ្ហាគុណភាព និងភូតគាមអនាម័យដែលជាការកំណត់របស់ភាគីចិន ការនាំចេញរបស់កម្ពុជាក៏កំពុងប្រឈមនឹងតម្លៃនៃការដឹកជញ្ជូនខ្ពស់ផងដែរ»។
រដ្ឋបាលគយចិនកាលពីថ្ងៃទី ២៦ ខែមេសា ឆ្នាំនេះបានអនុម័តទទួលស្គាល់ជាផ្លូវការបញ្ជីឈ្មោះចម្ការស្វាយចំនួន ៣៧ និងរោងចក្រវេចខ្ចប់ ៥ អាចនាំចេញផ្លែស្វាយស្រស់ទៅកាន់ប្រទេសចិន។ ការនាំចេញផ្លែស្វាយស្រស់ ជាផ្លូវការពីកម្ពុជាទៅប្រទេសចិនបានចាប់ផ្តើមកាលពីថ្ងៃទី ៧ ខែឧសភា ឆ្នាំ ២០២១។
បើតាម លោក ហ៊ុន ឡាក់ បច្ចុប្បន្នផ្លែស្វាយស្រស់កម្ពុជាត្រូវបានដាក់លក់ក្នុងប្រទេសចិនតម្លៃពី ១,២ ទៅ ១,៥ ដុល្លារក្នុង ១ គីឡូក្រាម៕ LA